Nena efiku laxuuninwa leyandjo leepermeta kovalihongi

0
84

Komutoolinghundana

WINDHOEK – Konima yoivike ivali ya wedwa ko, efiku laxuuninwa leyandjo leepermeta kovalihongi va dja koilongo itali ka wedelwa vali. Edi, oda tumbulwa komupopili ko woshikondo shoikwameni yoshilongo nepashukilo loivelo youpitilo weengaba, Sakeus Kadhikwa.

Kadhikwa okwa kumaida ovalihongi vokoilongo kutya, ou taka kala inaa mona opermeta yokwiihongela omu, konima yefiku laxuuninwa Maalisa, 17,2017 ita va ka wedelwa ko vali omafiku okukonga eepermeta. Etokolo ola kufwa eshi efiku laxuuninwa la li la tulwa po koshikondo lo 28 Febuluali, ovalihongi vahapu va li eefika pombelewa tava kongo eembapila doufemba welihongo moNamibia.

Moule woivike oyo ivali ya wedwa ko, oshikondo shoikwameni yoshilongo osha tuma ovanambelewa koiputudilonongelo yopombada vaka yakule ovalihongi ovo va pumbwa eepermeta dokwiihongela moNamibia. Onghendabala ei, oya etwa po omolwekemo loshiwana sha li sha ndubalala momikweyo kombelewa tashi kongo eembapila.

Epangelo laNamibia okupitila moshikondo shoikwameni ola tula po eudafano opo ovo tava di koilongo tave ya oku lihonga meefikola dopombada moNamibia va kale ha ve li shangifile eembapila edi keembelewa doukaleliposhilongo waNamibia moilongo yavo ile moshiindalongo manga inave ya moshilongo.

Inashi pitikwa okwi ilongela moshilongo omulihongi eehe na eembapila edi, nongeenge opaka kala ovo ta vi ilongo vehe na eedokumente entry visitors permit, otava ka shunifwa koilongo yavo.

Kadhikwa ota ti, vamwe ova dopa ku mona eembapila edi omolweishangifo hali futilwa N$80.00 nombapila ei i na ongushu youle wodula ohai futilwa N$380.00

LEAVE A REPLY

Please enter your comment!
Please enter your name here