Ohanona yasi omeya poshipale

0
1392

KuLoide Jason

ONGWEDIVA- Opolisi moshitopolwa Omusati oya kumagidha aakuluntu opo ya kotokele oyana aashona, yaa kale taya dhana omeya molwashoka ngaka oga nika oshiponga no haga dhipaga aantu.

Ekumagidho ndika olya ningwa komupopiliko gwopolisi moshitopolwa shoka sha landula eindjipalo lyiiningwanima yomaso gaanona taya sile momeya.

Oshiwike shayi ashike, aanona yaali gumwe gwomimvo omugoyi nomukwawo gwoomvula mbali oya lopotwa ya si omaso ge etwa komeya ngoka ga yelula oshitopolwa shoka.

Opolisi oya koleke kutya omunona goomvula mbali okwa si sho a gwile momeya moshipale shi li mepya lyaandjawo omanga ya li taya dhana momeya naanona ooyakwawo.

Oshiningwanima shika osha ningwa pIishanaputa moshikandjohogololo shaNesi moshitopolwa shaMusati mehuliloshiwike lya yi.

Paulus Dankie Cloete gwomimvo mbali okwa hulithile momeya moshipale moka sho a gwile mo moka ye naanona ooyakwawo ya li taya dhana.

Uuyelele wa gandjwa nokukolekwa kuWarrant Officer Lineekela Shikongo omupopiliko gwopolisi moshitopolwa shaMusati a ti kutya nakusa okwa li ta dhana na yakwawo ihe inashi yela kutya momeya okwa gwile mo ngiini.

Warrant Officer Shikongo okwa ti ka pena naanaa uuyelele wothaathaa mboka ta wu ulike kutya nakusa okwa gwile mo ngiini momeya.

Moshiningwanima sha fa shika, moshitopolwa omo tuu muka , omunona gomumati mUukwandongo okwa si omeya natango omanga ali anuwa ta yogo naamwayinamati medhiya lili popepi negumbo.

Okwa hokololwa kutya oshiningwanima shika osha ningwa wo mehuliloshiwike lya zi ko.Omanga mbaka yali ta ya dhanene omeya.

Nakusa nguka omunamimvo omugoyi okwa li mondondo ontintano posikola Uukwandongo Combined naakwanezimo lye oya tseyithilwa nale eso lye.

LEAVE A REPLY

Please enter your comment!
Please enter your name here