Okankela yexuli (Liver Cancer)

0
421

Nena ohatu popi kombinga yexuli nokankela yexuli. Oshina oshilonga unene okukundafana kombinga yomikifi edi da holama meni lolutu, shaashi luhapu ohatu holoka unene koipangelo nokeendokotola detu eshi efimbo letu pwila po. Manga ina tu ya mokankela yexuli natu tofe mo manga kutya exuli oshike nohali longo shike molutu lomunhu.

EXULI

Exuli oshilyo sholutu shi na oshilonga noshi na oinakuwnifwa ihapu molutu, yakwatela mo:
Okuungaunga nomaadi molutu (cholesterol)

Okuungaunga nosuuka, oitungifi nosho yoo oitukulwa imwe yomohonde
Oku dinda oyekelwashi ihapu molutu, mwa kwatelwa yoo nomiti odo hatu pewa keendokotola detu.

Ohali pungula yoo oipumbiwa yolutu ngaashi eevitamine dayooloka
Mulo omo ha mu longwa onyango

Exuli olo limwe lomoilyo yolutu ili medimo, kombinga yokolulyo (tala kefano). Ehuli ola kula li dule oilyo ikwao medimo, nola kwatafana nomandjadja.

Ohali kwatwa komikifi dihapu, mwakwatelwa eembakiteli dilili nokulili, omikifi ngaashi cirrhosis nosho yoo okankela yexuli.

Exuli ohali nyonaunwa koingangamwifi nosho yo okunwa omalodu a pitilila.

OMADIDILIKO OMIKIFI DEXULI?
Omesho ashunga
Ouyehame medimo, unene tuu lwokolulyo koshi yeemati
Edimo tali fulu
Okukanifa omadilaadilo, ile omunhu ta popi oinima ita i tu kumwe nawa
Okutika ohonde shapitilila
Okukanifa oshiviha
Okuloloka diva

OKANKELA YEXULI
Exuli, ngaashi oilyo ikwao yolutu, ohali dulu yoo okukwatwa kokankela. Oupyakadi ouli apa kutya ola holama unene. Olili kolulyo lwokoshi yeemati, naluhapu omunhu ita dulu okuli kwata naanaa shaashi olaholama (tala kefano la landula). Oukwatya ou luhapu ohau eta okankela yexuli i monike efimbo la pwapo neenghono.

Okankela yexuli oya ninga ihapu moshiwana shetu, ngaashi naana ya ninga ihapu yoo mounyuni aushe. Molwa nee eshi i hai monikila po, otashi ti yoo epango layo ohali kala li xupi, shaashi meemhito dihapu ohai hangika nale ya tandavela nolutu.
Okankela yexuli oya tukulwa pavali
Okankela ya tameka mexuli loovene
Ile okankela ya dja koshilyo shimwe sholutu, tai tandavele nee kexuli

OKANKELA YOMEXULI MWOOVENE
Okankela oyo ya tameka mexuli mwoovene oili yoo pamaludi mahapu, ashike madina omaludi aa kaena naanaa unene oshilonga koshiwana.

OKANKELA YEXULI OHAI ETWA KOSHIKE?
Opena oinima oyo ya monika paunongononi, hai eta okankela yexuli:
Eembuto (viruses) domadina aa: Hepatitis C noHepatitis B
Okunwa omalodu sha pitilila
Ovalumenhu ohava kwatwa kokankela yexuli, shidulife oomeme
Okankela yexuli ohai hange unene ovakulunhu veedula da koya omilongo hamano
Oshiviha shihapu osha kwatakanifwa yoo neholokepo lokankela yexuli
Ovanhu ava veli koilongo yokuAsia nomuAfrica ova monika tava kwatwa luhapu koKankela yexuli

Ovalaule vomuAmerica ova monika hava kwatwa kokankenla ei shidulife ovatilyane
Okunana omakaya nako okwa kwatakanifwa nokankela ei

Opena yoo ekwatafano lamonika pokati komukifi wosuuka neholokepo lokankela yexuli.
Ombakiteli imwe yedina aflatoxin, hai hangika moikulya inai pungulwa nawa, ngaashi eembuto nosho yoo eembudukufwa, omapungu nosho tuu. Oikulya ei oina okupungulwa nawa opo ombakiteli ei iha mone omhito yokuya molutu lomunhu.

OMADIDILIKO OKANKELA YEXULI OKULI NGAHELIPI?
Petameko omunhu iha kala nande ena omadidiliko asha, unene shaashi exuli ola holama lela molutu lomunhu. Opena nee omadidiliko oo haekeya ngaashi:
Omesho taa ningi mashunga
Ehalo lokulya tali kana
Oshiviha tashi kana
Ouyehame uli medimo

OKANKELA YEXULI OHAI MONIKA NEE NGAHELIPI?
Nghaashi sha tumbulwa metetekelo, okankela yexuli oi djuu okumonena po. Ohai monikila po ashike ngee omunhu ha i ku ndokotola waye, yee ta talwa nokukonaakonwa, nande ngoo lumwe modula. Oshina nee oshilonga opo ngee omunhu oku udite ena oshitumbuka medimo, nande itashi ehama, a lotokole koshipangelo, ile pu ndokotola woye opo shi talike.
Luhapu petameko eekankela ihadi ehama. Ouyehame ohau ke uya naanaa konima lela.
Ngee omunhu okwa didilike omadidiliko a tumbulwa metetekelo, na mone ndokotola waye, ile na ye koshipangelo opo a konaakonwe.

Ndokotola woye otaka kufa nee ohonde opo a tale kutya exuli otali longo ngahelipi. Oteku tumu yoo komafano.

OKANKELA YEXULI OHAI HAKULWA NGAHELIPI?
Ngee oya monikila po, epango lokankela olo okui tanda mo molutu opo i dje mo. Ngee oya handika ya tandavela nale koilyo ikwao yolutu, omunaudu oha tuminwa nee koOncologist (ndokotola ou ha yandje omiti dokankela).

ETUMWALAKA LILI MOSHINYOLWA ESHI OLELI:
OKankela yexuli oya indjipala unene nomoshiwana shetu
Natuli keelele koinima oyo yakwatakanifwa noKankela yexuli, paunongononi
Natu kale hatu talele po oipangelo oondokotola vetu, ile ovapangi, nande lumwe ngoo modula. Inatu teelela ashike ngee hatu ehama

Ngee omunhu owa koneke omadidiliko a nyolwa pombada, endelela u mone ndokotola woye, ile omupangi, ile uye koshipangelo.

Epango loKankela okuitanda mo molutu omanga inaayi tandavela. Eshi otashi dulu ashike okuningwa ngee ya moikila po.

LEAVE A REPLY

Please enter your comment!
Please enter your name here