Ominista yEhongo ya yandja omaano kovanafikola moAus

0
53

KuTuulikki Abraham

Aus – Ominista yEhongo Katrina Hanse – Himarwa okwa yandja omaano oshimaliwa kongudu yokushika omanghuma pofikola yaMarmer Primary School, moAus moshikandjohoololwa sha !Nami#nus, moshitopolwa sha //Karas.

Omaano eedola N$2 500-00 okwa yandjwa ku Minista yee mwene oshivike shaya, pehovelo lo lweendo laye lokutalela po eefikola, okupopya novanafikola nokukundafana yoo novadali.
Minista ota talele po oitopolwa ya yooloka moshilongo, nolweendo laye okwe lihovela oshivike sha ya moshikandjohoololwa sha !Nami#nus moshitopolwa sha //Karas.

Ongudu yokushika omanghuma moAus oya pewelwe omaano omanghuma ongushu yeN$74 000, a yandjwa odula yadjako kehangano lo Anglo American Namibian Foundation. Efiku olo tuu olo ovanafikola vopo Marmer Primary ova pewa yoo omaano omidjalo dofikola, da yandjwa kehangano laShali Mining Exploration. Ehangano eli ohali longele popepi no Aus, nola yandja omaano omidjalo dofikola dongushu N$10 000.00. Omaano omidjalo dofikola okwa yandjwa kovanafikola moipafi yaMinista. Oprima fikola yaMarmer oina eengudu okudja po Pre Primary fiyo ondodo onhi 7.

Minista okwa shiivifa ta talele po oitopolwa moshilongo, a dule okupopya novadali novakwashiwana aveshe, noku mona kutya ounghundi ouli naanaa peni mehongo, na onghatu ilipi, tai dulu okukatutwa, ku xwepopekwe oidjemo yehongo yanghundipala moitopolwa imwe po moshilongo.

Etalelepo la Minister ola hovela momafiku a 06 – 09 March 2017 moLüderitz moshitopolwa sha //Karas, ta twikile a yuka ko Rosh Pinah nOranjemund, fiyo oko Keetmanshoop.
Moshitopolwa sha Hadrap etalele po laMinista ola hovele oshivike eshi .

Moshoongalele osho aninga vovakwashiwana vomoLüderitz Himarwa okwe va indila opo va yambidide ovana mehongo. Vatameke alushe oku tala moifo yovana ngee vadja kofikola, nova landule nawa nokutala, oukonaakono ovo hava nyolwa kovana, omanga veli pehovelo lomudo.

Nongeenge nee ovadali ova didilike kutya ovana itave shi endifa nawa, nava katuke onghatu manga kuyele, va kundafane novalongi, koo kutalike kutya onomukalo uli pi po omulongwa ta dulu oku vatelwa.

Minista okwa tumbula kutya omapekapeko okwa ulika kutya okwa didilikwa oidjemo ishambula yovalongwa ovo ovadali vavo hava fi oshisho okulandula ehongo lovana.

“Ovadali vamwe kofikola ohave li huluko ashike efiku tava ka tambulifa ovana, ohaluka eshi oidjemo yondodo 10 no 12 tai shiivifwa, opo ovadali ovo, hava kala nomapulo mahapu, noku yandja eembedi kovahongi. Owali nee peni, mo mukokomoko womudo?” Himarwa osho apula ovadali. Ominista yEhongo, oya tumbula kutya , oidjemo yovalongwa mondodo 10, no 12, otai nyemateke unene moitopolwa sha//Karas naHardap.

Okwa yelifa momutumba oo kutya, opo, kukandulwepo omukundu oo tau eta oidjemo yehongo ya nghundipala moshitopolwa aveshe ova pumbwa okulngela kumwe.
Ta tumbula kutya, ehongo kalifi ashike oshinakuwanifwa shouminsteli wehongo, ndele olo oshinakuwanifwa shomukwashiwana keshe, nouMinisteli waye, okwa tumbula kutya otau pumbwa eyambidido okudja movadali nokomukwashiwana keshe.

Minista okwa kunghilila yoo ovalongi va longe noudiinini nova yandje ehongo longushu koshiwana shokomongula. Okwa kumaida yoo ovalongi, ovakulunhufikola, novataleli, va longe nelitulemo, ko kudidilikwe omulongi oo oshilongwa shaye tashi dopiwa neenghono, a lundululwe.

Efiku olo tuu olo Minista okwa yeulula pambelewa ombelewa yomutaleli wehongo moshikandjo sha Namib, nokwa yeulula yoo Ongulumabo, oyo ili lela pamufika woshinanena moLüderitz.

2. Omukulunhu wehongo moshitopolwa sha //Karas Johannes //Hoeseb, Minister wehongo Katrina Hanse – Himarwa, Kansela woshikandjohoololwa sha !Nami#nus Jan Scholtz, omukulunhu fikola po Marmer Primary School Josephina Mathe, Omunambelewa omukulunhu mo Settlement ya Aus Elizabeth Koopman, na vamwe po vomovanafikola hava fikola po Marmer Primary mo Aus, vekwete omaano omidjalo dofikola odo vapewa.

LEAVE A REPLY

Please enter your comment!
Please enter your name here