Yandja ohonde ndee to xupifa

0
78

Komutoolinghundana

WINDHOEK -“Eta lohonde keshe tali di momuyandji wohonde, otali xupifa eemwenyo dovanhu vatatu”. Titus Shivute omupopiliko wehangano lOkwoongela ohonde NAMBITS, edi okwe di tumbula pefimbo va ongela ohonde moshitukulwa shaShana oshivike sha djako.

Shivute ta weda po kutya moule womafiku avali, ova kufa ohonde movanhu 149 moshipangelo shaShakai nokoGabriel Taapopi. Okwa ti, okamwaalu ashike kovaNamibia veepelesenta 8% di lile po omayovi 16 000 hava yandje ohonde moshilongo..

Omunambelewa wehangano lokwoongela ohonde okwa yelifa kutya, omuyandji wohonde petameko ota yelifilwa ongudu yohonde yaye mokati komaludi eehonde deengudu da yooloka di li hetatu.

Odo da kwatela mo nee honde yo O+ noO-, A+ noA-, B+ noB-, AB+ noAB. O- oyo aike ongudu yohonde hai dulu okuyandjwa moipangelo komunaudu keshe a pumbwa ohonde meendelelo pehe na omhito yomakonaakono.

Okwa weda po kutya, ovanhu vahapu ove na ohonde O+ oyo hai dulu oku yandjwa keengudu deehonde adishe deengudu do+.

Omolwomhumbwe inene moipangelo omo mu na ashike ohonde ya wana oule womafiku a heyali, Shivute okwa shiva aveshe ve na eedula 16-65 ve na oukolele va fike poupangelo nopeenhele dokuyandjela ohonde va yandje ohonde. Omuyandji wohonde keshe oha yandje eemililita 450 poshikando ta dulu kuyandja vali ohonde konima yeemwedi mbali, omafiku 56. Onghee eepelesenta 55% dohonde ya pumbiwa oi na ku kala mongudu yohonde yoO+ moipangelo aishe.

Manga ohonde inai yandjwa komunaudu, ohai konaakonwa moLabora haku talika omikifi domaludi ngaashi HIV, Hepatitis B & C noshinena. Omunambelewa wehangano loNAMBITS ota ti, ovo hava pumbwa ohonde neenghono, ovamwali ovo hava kanifa ohonde mokweeta ounona, mouhanana va dalwa efimbo inaali fika, nouhanana ovo va dalwa va shunga koshipa, ovanaudu va tandwa,ilo voMalaria, naavo va dja moiponga yomatuwa ilo va tuwa. NAMBITS oi na oshinakuwanifwa shokweenda noitukulwa okwoongela ohonde mo va yandjihonde vakulu naavo vape.

Shivute okwa yelifa kutya, omuyandji wohonde oye oo ena oukolele e na ondjudo yeekilograma okudja 50 ilo, di dule po aamenwa komikifi dopamilele, nokwi ilongikida kukwafela ovanhu vamwe.

Manga omunhu inaa yandja ohonde na kale a lya konima yeevili nhatu. Omuyandjihonde ngee mohonde yaye omwa monika ounghundi wa sha konima yekonaakono, oha ifanwa noku konaakonununwa noku tumwa kondokotola yaye a ka mone ouhaku.

Shivute ta kumike ovayandjihonde va diinine okuxupifa eemwenyo, konima yomafiku 56 ohonde oya wana po onghee okwa shiva keshe ou e li pepipi la tumbulwa e na oukolele a tameke kuyandja ohonde ku xupifwe eemwenyo dihapu neudo eshi taku shivifwa kuna oiningwanima ihapu yomalaria.

LEAVE A REPLY

Please enter your comment!
Please enter your name here