Eedula 27 demanguluko oda eta tuu elunduluko

0
99

Metivali loshivike eshi Namibia okwa ninga eedula 27 okudja eshi a manguluka modula yo1990, adja moupika waSouth Afrika.

Eedula dinini da pita po, ovaNamibia oohandimwe ova kala nokunyeyeta kutya epangelo laNamibia ina li longa po sha ngeenge tashi ya keputuko nexumokomesho loshilongo.

Vamwe nokuli ove udite kutya onghalonawa yovaNamibia ngeenge tashi ya konghalo yoluhepo oya naipala shidulife eshi ya li omanga oshilongo shali inaa shi manguluka.
Itaku tiwa ina tu popya apa tu wete pa endama, ashike omuNamibia ngeenge to nyenyeta, onawa ngaho ngee to konaaakona ngeenge omanyenyeto oye okuna tuu omungo, ile pamwe owa fa omuIsraeli ta kwenene keembiya deembelela oko a li ta li ta pi.

Tete pamwe natu tale koshikondo shouhaku oko okudja pefimbo loukoloni, ndele fiyo opeedula 25 demanguluko, moNamibia pali pehe na nande ondohotola imwe ya deulwa moshilongo. Nokuli omanga oshilongo ina shi manguluka otwa fa nokuli twali hatu dilaadila kutya ita shi shiva Namibia a kale ta deula eendohotola neeingenia nosho tuu omaifano mahapu ena oshilonga kuye mwene, shaashi otwali ashike twa tala muSouth Afrika, onga tu wete oye tate yetu.

Ashike nena Namibia ota deula eendohotola daye mwene nodoilongo ikwao mounyuni. Keshe shimwe otwa li ashike twa yuka moSouth Afrika, unene tuu ngeenge oshe ya komatando manene, shaashi nonande otwali tu naa ngoo eendohotola odo da li tadi valwa oilongifo kayali po. Ashike paife ngaha moNamibia omwa twikwa omunhu oshitishanafiyo, osho nokuli etwiko lasho la enda nawa nanakutwikwa oshitishanafiyo ou paife okuli monghalo youkolele, sha ningilwa moNamibia. Oshilongo oshina yoo oilongifomwa ihapu yonghatu yopombada, noipangelo neekilinika oya hapupala noya tungwa pomufika uli nawa. Namibia okwa findana yoo nande haneepelesenda 100 mekondjifo letandavelo lombuto yoHIV/AIDS, sha pitila mokukeelela etandavelo lombuto pokati komukainhu eli meteelelo nokaana kaye oko keli medimo, mekengho lovalumenhu naikwao ihapu.

Heeno shili oinima ei oya ningwa ya etwa kemanguluko, nonande papumbiwa elunduluko penya naapenya, Roma inashi tungwa momutenya umwe. Pamwe shimwe shomwaayo oshikondo shouhaku sha lwa ondede oku efa ealuko lomukifi womalaria oo kwali sha finda, noshali shi li wetikile mo moikondo youndjolowele moilongo yomounyuni. Ashike pamwe otwaka lwa vali ondede tu wete twe shi denga ndele hatu tele oudila hatu kofa, nomolwaasho oshilongo sha shuna vali konghalo yomomido 1990 eshi omalaria ya twaalelele eemwenyo dihapu.

Kakele koshikondo shouhaku oshilongo osha kwatakanifwa yo kumwe ngee tashi ya keendjila. Ovanhu ngee tava i keenhele dimwe paife iha va dingonoka vali ngaashi shali hashi ningwa. Ovo va ile koRundu mEtivali oveshi mona kutya ngeenge oto dilille konooli, ino pumbwa vali ukeli denge kOshivelo noTsumeb noGootfontein shaaashi opate yoRundu- Elundu opo ili okudja mEenhana wa yukilila moRundu. Nale ngeenge oto di kOkunene ile kOmusati nakeshe tuu pamwe moNooli yaNamibia wayuka koushimba, opali ashike pena oB1 Road oyo ya pita mOshakati ya yuka kOmuthiya nOshivelo, ashike paife kutya nee oto i ile to di koWindhoek ile komunghulofuta oto dulu ashike okuendela kOmakange wa yuka koKamanjab. Oiholelwa oihapu, Omupresidende mukulu Hifikepunye Pohamba okwa tile ngee exumokomesho kuli wete nomesho, kufa nande elaka ndele to lafa nande okeepate, pamwe to itavele.

Ashike nande oshilongo sha xuma komesho metungo leepate, okwa pumbwa kutalike meendelelo eepate deengalama odo hadi longifwa neenghono opo di tulwe oteya shaashi ngeenge osho ita shi ningwa, epangelo otali tula ashike oimaliwa momeva shaashi oupate ovo otava halakana po diva, ndele eemiliyona adhishe da tulwa mo tadi i momeva.

Kakele keepate, oshikondo shelongo onghee ngoo tashi shongola, omo omudo nomudo ovanyasha omayovi hava i mostalata shaashi va dopa oGra10 ile o12.

Heeno shili oshilongo paife oshina ovalongwanhu vahapu, okuyelekanifa naavo va li po pefimbo lemanguluko, ashike natango itatu longo sha wana opo tu amene ovanyasha koku ya momapandaanda, oo eli odjo nomidi oimbuluma ihapu mwa kwatelwa oumbudi nomadipao, etapemo lomadimo nokuekelashi eehanana, naikwao ihapu.

Hano oshilongo osha pumbwa okutala elongo loungoba nounangeshefa wopetameko onga oshitwa shopokatielela sheputuko neyambule po loshilongo nokulwifa oluhepo.

Vo ovo tava di meefikola doungoba, nava nghonopalekwe opo va tote po eepoloyeka, vo vakale ovo tava kutu omahangano okondje yoilongo ngee omokutunga naikwao ihapu, shi dulife eshi tuna ovanhu vadja meefikola doungoba veli ashike momaumbo, omanga eepoloyeka tadi pewa po ovo tava di pondje yoilongo. Omulandu wokuyandja oilonga kovanailongo nau kale wa yela, wo naukale mouwa wovanangeshefa ovaNamibia tete.

LEAVE A REPLY

Please enter your comment!
Please enter your name here