Olundjinda otalu tsikile nokutyapula oshituthimanguluko

0
123

KuShipi Elago

OLUNDJINDA-Omukunda Okathitu kaMbanda moshitopolwa shaMusati otagu tsikile noku ninga ondjokonona ngele otashi ya petyapulo lyoshituthi dhimbuluko shemanguluko lyoshilongo.

Omukunda nguka ogwa li gwa ningi oshituthi oshinene mo 1990 sho Namibia ali a manguluka muupika womutondi, na oya li ya tsele ongombe opo ya tyapule emanguluko.

Okuza tuu momumvo 1990 sigo onena ndjika aakalimo yomomukunda nguka nomikunda dhopuushiinda ohaya gongala pehalandjandja li li puukamba pOlundjinda nokutyapula pamwe emanguluko, no inaa ya nuka po nando omvula yimwe.

Oshinima tashi kumike osho shika kutya nando yamwe mboka ya li ya toto po esiku ndika oya ka lala, aagundjuka ya zi konima oya kutha ko shili oshinakugwanithwa shika nomaako agehe nomumvo kehe ohaya si oshimpwiyu opo ya konge ongombe opo ya pakele po oshigwana.

Daniel Megameno Iilende gumwe gwomaalongekidhi yesiku ndika okwa ti nuumvo etyapulo lyemanguluko natango oko li li nota li ka ningwa momasiku 25 ga Maalitsa pehalandjandja pOlundjinda mOngandjera.

Onkene ota indile aakalimo yOkathitu kaMbanda opo ya holoke momiyalu ominene opo ya tyapule esiku pamwe.
Olundjinda oluli mondjila onene ya za kOshakati yathinda kOkahao ookilometa konyala 15 okuthika modoolopa yaKahao.

Etiyali oshiwike shika Namibia okwa gwanitha omimvo 27 dhemanguluko. Omimvo ndhika odha etele aaNamibia oyendji uuwanawa nonando pena natango omashongo gamwe ngoka ga taalela oshilongo, aakalimo ayehe otaya pandula komayambeko ngoka ya mono okuyeleka nomaupyakadhi ngoka ge ya taalela. Lyo ndika olyo etompelo lyaaKathiku kaMbanda okutyapula aluhe esiku ndika okwi idhimbulutha mpoka oshilongo nomukunda gwawo gwathikama konima yomumvo kehe omupe gwemanguluko.

LEAVE A REPLY

Please enter your comment!
Please enter your name here