Atheletika mOshikoto ye enda nawa

0
74

KuMaria Namupala

OSHAKATI – Aavali yaanona mboka haya kuthombinga momaudhano gokumatuka nenge ngoka goatletika oya kumikwa opo ya kongele aanona yawo omizalo dhomaudhano.

Ekumiko ndika olya ningwa komunambelewa gomaudhano mOshikoto pethimbo lyuudhano wokomumvo wo atletika yoosikola dhomoshitopolwa shoka mboka wa ningilwe moshiwike oshitiyali shomwedhi nguka pokapale kEmanguluko mOshakati.

Nicodemus Amadhila okwa holola kutya uuna aanona ye na omizalo dhuudhano dha gwana po , ohaya tondoka nenge ohaya kuthombinga ya manguluka nawa osho wo yi itulamo.

Okwa ti ethimbo limwe ngele aanona ka ye na omizalo dhuudhano dhi igwana po nena ohaya teka omukumo goku dhana yi itulamo nenge otaya dhana inaa ya manguluka nawa.

Ethigathano lyokomumvo lyokutondoka lyaanaskola yo moosikola dho moshitopolwa Oshikoto olya hokololwa lye endele nawa ngaashi lya longekidhwa.

Pethimbo lyuudhano mbuka aanaskola yeli 180 yo moosikola dhomoshitopolwa shoka oya li ya kuthombinga methigathano ndika.

Amadhila okwa koleke kutya uudhano, wa wo mbuka oweenda nawa okuyelekanitha nomimvo dha piti. Ethigathano lyopashitopolwa ohali ningwa aluhe konima sho aanaskola ya kuthombinga no ya sindana muudhano mboka wa ningwa kiikandjolongo yawo.

“Uudhano mbuka owa longekidhwa opo ku monike nokutothwemo aatondoki omanyankwa mboka taya ka kuthombinga muudhano wopashigwana ta wu ka ningilwa koWindhoek muApiilili,” Amadhila a ti.

Amadhila okwa pandula aanona naalongi sho yu ulike eitulemo lyawo momaudhano,nokwi itaala kutya onakuyiwa yaanona mboka kombinga yuudhano oyi li miikaha iiwanawa. Okwa ulike enyanyu lye wo, sho aanona oyendji mboka ya kuthombinga ya li ya thindikilwa kaalongi yawo noya kala mesiloshimpwiyu ewanawa.

“Uudhano mbuka ohawu kalako omumvo kehe nuuministeli wetu owo hawu kwatele komeho uudhano kehe tawu inyenge moshitopolwa shetu, kutya nee oomboka hawu longekidhwa koosikola nokiikondo yilwe,” Amadhila ta gwedha po.

Okwa ti pethimbo lyuudhano mboka pokapale opwa li pu udha aatali naaholi yuudhano wo ateletika, ta ti oyendji oya zi koosikola ndhoka dhili moshikandjolongo Oshivelo sigo okiikandjolongo mbyoka yili pondingandinga yoshitopolwa.

Amadhila ta ti nando aanona oyendji ya kuthombinga methigathano ndika oshitopolwa oshina eshongo enene molwaashoka aanona yamwe mboka ya kuthombinga ka ye na iizalomwa yomaudhano na yamwe ohaya tondoka ashike ya zala oombulukweya oonde nonande ya pumbwa uumbulukweya uufupi, opo ya matuke nawa nonuupu.

LEAVE A REPLY

Please enter your comment!
Please enter your name here