Mokaxwa omulongi dhingi mOnyaanya

0
947

KuMaria Namupala

ONYAANYA – Omulongiskola mosekundeskola yUukule moshikandjolongo Onyaanya okwa tothwamo oye dhingi miilonga yElongo moshikandjolongo ashihe. Mokaxwa oku ulikwa pethimbo lyegandjo lyomapapa ga ningilwa pombelewa yoshikandjolongo shoka omasiku ga zi ko.

Poshiithanene shoka hashi ningwa omumvo kehe aalongi naalongwa oya pewa omapapa osho wo oonzapo molwiilonga pondoli yawo, Mokaxwa ngoka a tseyika nawa koyendji okwa kangele ayehe, sho a pititha nawa konyala miilongwa ye ayihe noopelesenda 100.

Aalongi oyendji oya pewa omakopi, oonzapo noombandi shi ikwatelela kiilonga yawo. Emilia Ananias ngoka ta kwatele komeho Olupandu Pharmacy oye gumwe gomaakwashilipaleki yomakopi ngoka ga gandjwa kaalongi no kaalongwa esiku ndyoka.

Ananias okwa gandja omakopi gane ngoka taga kala nokukondjelwa omumvo kehe moPhysical Science, Biology, Mathematics osho wo Life Science. Omakopi ngoka otaga gandjwa kaalongi dhingi kumwe noshimaliwa shooN$300 kehe limwe.

Oshikandjolongo shika oshina aalongi 304 inaa mu kwatelwa aalongi mboka haya yakula pakathimbo osho wo aanaskola yeli 6 695, ota shi wilikwa pakathimbo ku Moses Natangwe Uugwanga.

Uugwanga okwa endulula kutya oshikandjolongo shoka osho shimwe shina oosikola tadhi longo nuudhiginini, a ti ohaye shi pondola aluhe miizemo yondondo onti-10 nonti-12, nokwa ti otashi nyanyudha uuna omuntu a longa nawa ta pewa olupandu ndoka iilongela.

“Konyala oomvula adhihe dha piti ohatu unganeke oshituthi shegandjo lyomapapa mono hatu pandula aalongi, aalongwa naavali woo mboka yiitulamo melongo lyaana yawo, nuumvo otwa tokola opo wo tu gandje kaaniilonga aaopaleki na kehe ngoka ha kuthombinga melongo,” Uugwanga a ti.

“Ngaashi oosikola odhindji moshilongo dha taalela omashongo ogendji, natse moshikandjolongo shetu otwa taalelwa keshongo lyaanona taya etha oosikola, yo yamwe aakuluntu yawo inaa yi itulamo melongo nopendji otaya tindi okutuma aanona komanongelo,” Uugwanga ta ti.

Uugwanga okwa ti otaya kambadhala yu ulukile aanona uuwanawa wokukala moosikola, yo ya gandje woo elongo kaavali mboka yeli pomidhingoloko ndhoka. Uugwanga okwa ti aalongi oye shi ulike miizemo yomvogu kutya oyi ilongekidha noyi itulamo melongo lyaanona yawo.
Okwa uvaneke taya longo nuudhiginini shi vulithe shito opo ya kale ponomola yotango moshilongo ashihe.

Poshiithanene mpoka opwa ningwa woo eegululo pambelewa lyombelewa yoshikandjolongo ompe, ndjoka ya tamekele okulongithwa lwotango mo2015.

LEAVE A REPLY

Please enter your comment!
Please enter your name here