Omukulupe a tindilwa i ifutile mondholongo

0
720

KuMaria Namupala

ONDANGWA– Omukokele gomimvo 63 ngoka ta tamanekelwa oshipotha shekwatonkonga lyokatekulu komimvo 13 komOkapuku moshitopolwa Oshikoto, ina pewa ompito yokwiifutila mo mondjedhililo.

Frans Ndalengelwe okwa mangelwe po oshiwike shayi nokwa holokele lwotango mompangu ya mangestrata gwOndangwa Etitatu lyoshiwike sha ziko, komeho gamangestrata Peter Nangula, nomutamaneki Brunah Mutelembi.

Ompangu oya fatululile omutamanekwa uuthemba we, Ndalengelwe okwa tindilwa obooloha, noshipotha she oshuundulilwa komasiku 30 gaMai nuumvo, opo shi gandje ompito kopolisi yi tsikile nomakonakono gayo. Omutamanekwa pethimbo ndika okuli natango mondjedhililo, nokwa tegelelwa a tulemo omukanda gweindilo lyeifutilemo, ko ku talike ngele ota vulu okupewa ompito yokwiifutilamo, ngaashi shi li paveta yoshilongo. Esiku a holokele mompangu ina pulwa a tye sha.

Otaku hokololwa okanona hoka ka kwatwa koonkondo okatekulu komutamanekwa, ka valwa komwana gomumati, nokeli mondondo ontihamano. Omutamanekwa okwa ponokele anuwa omutekulu ngoka noku mu hula iikutu ye noku lala naye mepya.

Omukonakoni nomukwatakanithi koshikondo shiimbuluma mopolisi yomoshitopolwa Oshikoto Komufala gopevi Naomi Katjiua okwa holola omaipulo ge sho esiku nesiku moshitopolwa shoka tamu lopotwa iipotha yomakwatonkonga. Katjiua ta ti iihakanwa yomakwatonkonga ngoka aluhe aanona aashona, noyendji yo mwaa mboka oye li aanasikola.Okwa gwedha po a ti oonakulongela aanona mboka omiyonena olundji oyo aakokele naamboka yomimvo dhopokati.

“Iiningwanima yoludhi nduka otayi yemateke unene, nokuteya po oshigwana, aalumentu taya longele aanona omiyonena dhopaihulo, nolundji aavali oyena uumbanda oku thiga aanona momake nenge metonatelo lyaalumentu molwaashoka otaye keya kwata onkonga lwanima,” Katjiua a ti.

Ta tsikileko kutya aanona oyo aaleli yokomongula onkee naya gamenwe , opo ya ka kwathele monakuyiwa mokutunga oshilongo shika. Katjiua ta londodha kutya kehe ngoka taka lopotwa a longa omiyonena mOshikoto, opolisi oyi ilongekidha oku mu kwata po ye a kale mondholongo, a tyapule iiyimati yiilonga ye iiwinayi mbyoka a longa moshigwana.

Okwa indile wo aavali ya kale haya tonatele aanona yawo, yo taye ya longo iinima ya pamba onkalamwenyo,opo ya kale ya kotoka ethimbo alihe.

LEAVE A REPLY

Please enter your comment!
Please enter your name here