OTB ya kolonda uupyakadhi mOshikoto

0
86
OLYMPUS DIGITAL CAMERA

KuMaria Namupala

ONIIPA – Omukuluntu guundjolowele wopetameko moshipangelo shaNandjokwe Alina Nepela okwa yelitha kutya oya tsakaneke omashongo nomikundu kombinga yokukondjotha omukithi goTB maavu moshitopolwa shoka.

Nepela okwa li a mono ompito okukopitha aakwashigwana petameko lyomwehdi nguka nelalakano lyokugandja uuyelele kombinga yomukithi ngoka, ta ti okwa konekiwa aavu oyendji yena oTb ya kolonda, yo yamwe ihaya landula epango lyawo sigo tali pu.

“Oshikondo shuundjolowele osha koneke nkene iitopolwa yasho tayi hepekwa nayi koTB ya kolonda. Ndjoka ya kolonda ondhigu okukondjitha shi vule oTB yowala, omwaalu gwaavu okuza sho oTB ya kolonda ya konekiwa kumwe ogwe tu pe aavu yeli 37, mboka ayehe ya pangwa noyendji oya monikila kiitopolwa iyali mOshikoto shono sha kwatelamo Onandjokwe,” Nepela ta ti.

Pethimbo ndika okwa konekwa woo oshikandjohogololo Oniipa osho shina aavu oyendji taya hepekwa koTB ya kolonda, Nepela ta gwedha po kutya oTB ya kolonda ohayi pangwa uule woomwedhi hamano, uuna omuvu iitula mo mepango ndyoka sigo opehulilo.

Nepela ta ti ohayi etwa kokwaaha dhiginina epango, aavu yamwe ihaya nu omiti dhawo ngaashi shuuthwa, yo yamwe ohaya etha owala epango lyawo thilu, oTB ndjoka ya kolonda ohayi taandele moku kolola noku teshima uuna omayeye gomuntu ngoka ena oTb nenge epunga taga tuka gu uka mombepo.

“Ohayi taandele woo pomagongalelo nenge momangundumano gaantu oyendji, unene pomahala mpoka pwaana ombepo yopaushitwe ya gwana, ashike otwa hala okukwashilipaleka kutya nonande oyi kale ya kolonda ohayi vulu okupangwa etayi aluka thilu, oomwedhi hetatu dhopetameko omuvu oha kala moombete no kaapuna nande ekwatathano naataleli po, manga taku kondjithwa ku tonwe oonkondo dhokuyi taandeleka,” Nepela ta ti ngaaka.

OTB ya kolonda ohayi eta uulema, okutsika omeho, okuthita omakutsi, nesipa lyombunda tali lemana. Oshikondo shuundjolowele osha mono woo eindjipalo lyaavu yoTB ya kolonda, onkene osha thaneke tashi tsikile oku konakona kehe ngoka ta fekelwa ena oTB yowala ye a talike ngele okuna ndjoka ya kolonda.

Okwa thanekwa oshikonga shokugandja uuyelele moshigwana kombinga yomukithi nguka shi tameke omwedhi nguka, oshigwana otashi kunkililwa kutya omiti opo dhili ashike naya landule epango lyawo sigo uuna ndoka lyapwa thilu.

Aavu otaya kunkililwa ya longele kumwe naapangi, molwaashoka omunwe gumwe ihagu ikutha ona.

LEAVE A REPLY

Please enter your comment!
Please enter your name here