Shondili i ikanyuna omapopyo gaakwashigwana

0
204

KuMaria Namupala

ONDANGWA – Elenga enene moshikandjo Onalusheshete, Eino Johannes Shondili Amutenya okwa ekelehi kokule omapopyo nomalundilo ngoka a ningilwa kaakwashigwana yomoshikandjo she.

Amutenaya oshiwike shayi okwa li eekelehi omapopyo nomalundilo ngoka pethimbo lyoshigongi shiikundaneki mOndangwa , moku gandja ombinga ye mehokololo ndyoka.
Omasiku ga zi ko aakwashigwana yomoshikandjo she, oya kala taya nyenyeta noku mu lundila kutya ita longo pauyuuki. Yamwe yomoonakunyenyeta mboka oya li wo ya thaneke andola opo a kuthwe mo muuwiliki wopamuthigululwakalo manga.

Amutenya poshigongi shoka okwa yelitha kutya okwa hala edhina lye li opalekwe sha landula omapopyo gaakwashigwana, a ti omahokololo agehe ngoka ga kala taga taandelithwa ka ge shi goshili, no kapena uumbangi tawu holola ndhoka ta popilwa.

“Okwa kala uupyakadhi tawu lilwa komukunda Elavi no-2, mono aakwashigwana taya popi kutya onda landitha po ehala lyofaalama lyuule wookilometa-50, ashike onda hala okushi yelitha kutya tse momikunda dhetu kamuna oofaalama molwaashoka omahala goofaalama ogi ikalekelwa,” Amutenya a yelitha. Aakwashigwana yamwe oyali ya holola kutya elenga enene ndyoka otali piyaganeke iinima nomilandu dhelelo lyoshilongo shOndonga, noye li lundile kutya oha li tidha omalenga melelo, nokukutha oonkondo, ku shika Amutenya okwa ti ina koneka a kutha mwene gomukunda koshipundi molwaashoka kena uuthemba woku kutha omalenga miipundi, nonande a yelitha kutya okwa kutha owala mwene gomukunda, Ohainghete oonkondo dhokulangeka aantu momahala ,ashike sigo onena okuli mwene gomukunda ogo tuu ngoka.

“Otandi gandja omayamukulo ngaka montaneho yeni opo mu tseyithile oshigwana, sho nasho shi mone kutya nani omapopyo ngoka tashi ningile ndje ogo wala elela, onda popiwa anuwa ndili mokangundu ka totwa komunyekadhi goshilongo shOndonga, ashike nandi shi yeleke nena mpaka kutya kandishi ngele opuna okangundu ka totwa po moka ndili, ndino ekakeko nenyateko lyedhina lyandje” Ta tsikileko ngaaka.

Amutenya okwa koleke kutya eikuthilo lyevi moshikandjo she otali dhana onkandangala unene, nokwa konekiwa aakwashigwana oyendji taya tete noku lala moondhalate nenge momankolo ga yakwawo, ta ti oveta oya tulwa po kelelo lyopamuthigululwakalo oshowo yoshilongo ndjoka tayi gamenene po omaliko gaakwashigwana.

Ta tsikileko ta ti moshikandjo shOnalusheshete kamuna ombepo yuukwamuhoko ndjoka tayi popilwa mo, molwaashoka oya taambako aantu ayehe no taya pangelwa kombepo ya Namibia limwe noshigwana shimwe.

Amushanga gwelelo lyOndonga nokuli wo mwene goshikandjo Oniiwe tatekulu Joseph Simaneka Asino, ngoka naye woo ali moshigongi shoka okwa pula aalelwa naaleli ya longele kumwe, yo taya pangelwa kombili yuumwayinathana.

LEAVE A REPLY

Please enter your comment!
Please enter your name here