Vahapu va dimbuluka emanguluko eti-27

0
22

Komutoolinghundana

Rundu –Omangungo ovaNamibia okudja keembinga okwa waimina Omukokoli Presidente Sam Nujoma, Omupreisdente omutivali Hifikepunye Pohamba, eeministeli dokabinete novanambelewa ovakalelipo veembelewa doilongo okupwilikina oshipopiwa shOmupresidente Hage Geingob poshivilo shemanguluko sha danenwa moRundu moKavango-Ushilo.

Edimbuluko lemanguluko laNamibia hali danwa alushe mefiku-21 laMaalisa, okudja kemanguluko loshilongo 1990, keshe mudo ohali dimbulukilwa moitukulwa ya tofwa mo. .

President Geingob okwa koleka efimano lomhepo youkumwe woshiwana, tai pangele ombili yoshilongo, omhepo yokukombelelafana koshi yeingido One Namibia, One Nation eingido loukumwe.

Ta weda po kutya , nande moshilongo mu na omihoko ya yooloka, ye okwa hala ovaNamiba va twikile noukumwe.

Pokati opo omupresidente Geingob okwa holola kutya, konima yeedula 27 oshilongo sha manguluka, epangelo ola didilika omaupyakadi a taalela oshiwana a kuma omaxupilo nonghalafano mokati koshiwana, noshilongo oshi shiivike kutya oshimwe shoilongo yomounyuni yeliko inali tukulwa shi fike pamwe.

Okwa yelifa kutya epangelo ola tula po omikalo dokuyambula po oshilongo ngaashi Vision 2030, eenghatu deyambulepo loshiwana mwa kwatelwa oHarambee Prosperity kutya kape na ou ta fyaala konima ngee tashi ya kehepuluko, nande omukalo ou inau ya ponhele yomafaneko a kala po.

Epangelo laNamibia ola faneka okweeta po eefabulika, okuyambula po ounamapya, eenhele doutalelipo, nelongifo lounongo moikandjolonga ya yooloka mepangelo.
Omupresidente Geingob okwa ti, kakele kekandulepo loluhepo noufyoona moshiwana, epangelo otali yakula ovakali momalukanda okupitila mombaanga yoikulya oyo tai ningilwa omalolelo moWindhoek, ndele otali kutu yo moilonga ovanyasha, mokutota po eekomitee da yooloka okutopola oikulya oyo.

Omupresident okwa weda po kutya, ovakali komikunda vahapu ohava xupu moilikolwa yomomapya, onghee epangelo otali faneke kuva kwafela eembuto noilongifo va dule kulonga oikulya ihapu.

Keshe mudo, ovaNamibia ohava tyapula edimbuluko lemanguluko loshilongo, kakele edimbuluko eti-27 koshitukulwa shaKavango oshikando shotete ola valulwa le li kalekelwa, nomupresidente Geingob okwa yandja oushima kuvamwe va li tava tumu omatumwalaka okushololifa oshiwana shiha ye koshivilo shehafo tashi tange ombili.

Omupresidente okwa ti, oto dulu ngaipi okuya moshipala oshivilo shemanguluko nediminafanepo lopashiwana, omhito ta yi ulike oukumwe woshiwana?
Oshikando shotete oshivilo tashi tyapulilwa kombinga yoKavango ya tukulwa , moitukulwa Kavango ushilo naKavango uninginino.Oshivilo osha nana vahapu unene ounona va li va hafifwa komadeulo ovakwaita tava nuka meedila, needila tadi tuka novakwaita tava denge omanghuna voo tava saluta.

LEAVE A REPLY

Please enter your comment!
Please enter your name here