AaSan ina ya hala okulonga omapya

0
219

KuMaria Namupala

OMUNYEKADI – Aantu yomuhoko gwaaSan mboka yeli moshikandjohogololo shaNehale lyaMpingana ina ya hala okulonga omapya nonando omvula otayi loko.

Omukuutumbithi gwelelo lyoshitopolwa shaOshikoto noku li kansela goshikandjohogololo Omuthiya, Samuel Shivute, pamwe na Kansela goshikandjohogololo Nehale lyaMpingana Leevi Reinhold oshiwike shika oya talele po yamwe yomaayelele moshikandjohogololo shoka.
Osheendo shika osha thikama nelalakano ya tale nkene aayelele taya hupu, okwa konekwa oyendji yomaayelele mboka yeli moshikandjo hogololo shoka inaa ya hala okulonga omapya nonande yena omahala ga andjuka.

Gumwe gomaakokele Kiriana Sakaria okwa holola kutya kena epya, ye ishewe iha longo mepya molwaashoka ohaya hupu momankete naakwanegumbo lye, ta ti oyendji yomaayelele ohaya li owala omankete ngoka haya kongo yo yene miihwa.
Konyala aaNamibia oyendji otaya kambadhala ngaashi taya vulu opo ya gandje omakwatho nomayambidhidho kaantu mboka taya nyengwa okwi ikwatha yoyene.Noshiwike sha ziko yamwe yomaakalimo yomOshikoto oyali ya gandja oondjato dhiikutu kaayelele yomoshitopolwa moka opo yaye ye ki ikwathe nayo , yo ya hume komeho nonkalamwenyo.

Maria Kadhila omuniilonga melelo lyoshitopolwa shaShikoto pamwe na Tresia Shipanga omukalimo gomoshikandjohogololo Onyaanya oyali ya tokola opo ya kuthe mwaashoka ye na yo ya yambidhidhe aayelele yomoshitopolwa moka.

Iikutu mbika oyali ya pewa Ngoloneya goshitopolwa shaShikoto Henock Kankoshi a tale iikandjohgololo mbyoka yi na aayelele oyendji. Iizalomwa mbika oyali ya gandjwa kiikandjohogololo shaNehale lyaMpingana, Quinas osho wo Eengodi.
Kankoshi okwa ti iikandjohogololo mbyoka oyo ya konekiwa yi na aayelele oyendji taya hupu nuudhigu noya pumbwa omakwatho.

“Otwa pandula unene kaakwashigwana yetu sho taya kambadhala nokukwathela aakwashigwana yetu mboka taya nana nuudhigu, ondiwete kutya ngele osho tatu longo ngeyi nena otashi tu ningile oshipu, shino osha kumike ndje kutya nani opuna aantu yena oshigwana komutima no taa longo ngaashi taya vulu ya kandulepo dhimwe dhomoompumbwe dhoshigwana,’ Kankoshi a ti ngaaka.

Ngoloneya ta endulula kutya iikandjohogololo mbyoka a tothwamo opo yi pewe iikutu mbyoka oyo ya konekiwa yi na omwaalu gwaayelele ogundji. Ta indile aakwashigwana mboka yena oonguwo nenge iikutu ihaa ye yi zala yeyi gandje po kaayelele nenge kwaamboka ya pumbwa iikutu. Okwa pandula sho Tresia na Maria ya tokola ya gandje moshigwana ta ti shino otashi gandja oshiholelwa oshiwanawa.

Maria Kadhila okwa ti okwali a kwatwa kedhiladhilo opo a gandje iikutu mbyoka ihaa zala, ye a kwathele oshigwana shoka shi li mompumbwe. Okwa uvaneke ta ka gandja natango iikutu oyindji nuumvo ongomagano kaakwashigwana goKrismesa osho wo gomumvo omupe..
Kansela gwoshikandjohogololo Nehale lyaMpingana Leevi Reinhold okwa ti moshikandjohogololo she omuna aayelele oyendji taya hupu shokadhila. Reinhold ta pandula komakwatho ngoka aakwashigwana ye ya pewa kaasamalia aanamutimahenda, ta ti naya tsikile noku yambidhidha mpoka taya vulu.

LEAVE A REPLY

Please enter your comment!
Please enter your name here