Chesta a ningi omuhikingalo

0
331

KuPinehas Nakaziko

Windhoek- Chesta ngoka e shiwike nawa ongomundaanisi dhingi gwomuhikingalo omunene moNamibia The Dogg, osho aningi omuhikingalo pakuudha.

Chesta nedhina lye pa kuudha Gideon Eiseb okwa tamekele okundaanisa manga ena oomvula heyali posikola yawo, nokwa ka kala noku ndaanisila The Dogg uule woomvula 10.

Chesta okwa kala omundaanisi gwa The Dogg oomvula dhaadha po 10. Chesta ngoka ena oomvula 25 nokwa kokela moshilando shaVenduka okwa ti nonando okwa kala i itula unene mokundaanisa, The Dogg okwa li emu pe omayele opo a tameke okuiimba sho a kala nokumufaalela kostudio, mpoka a kwatelwa kohokwe yokuiimba.

“Onda kala ngaa nda sa ohoni kashona, oshoka okwa li ndishi aantu otaya kala taya yolo ndje. Ashike The Dogg ina sholola oku pandje oonkondo, nonena otandi ti onda thika pondondo ndjoka nda kala nda tegelela,” Chesta ta ti ngaaka.
Chesta okwa li a joina ongundu yoMshasho mo-2006 moka a kala ta longo nuudhiginini. Okuiimba okwa li eku tameke mo 2013, ashike ethimbo ndyoka okwa kala omundaanisi natango.

Okuiimba pa ku udha okwali eku tameke omvula ya ziko sho ali a pititha oalbuma ye yotango yedhina Beginning of My Hustle, shoka sha hala kutya etameko lyokukondjitha kwandje.

Oalbuma okwa li yi na oongalo dhili 16, moka muna oongalo dhoKwaito noHouse. Uungalo mboka wakala wuholike ongaashi Sabi, Tsanana na Sukuma. Chesta okwa pititha okavidio kokangalo Sabi hoka ka kala noku inyenga nawa komapandja go intaneta, hoka kali kathaanekwa noku pita omvula yaziko.

Chesta okwa kala ishewe noku ulika uunongo we noku nyanyudha miitopolwa oyindji yoshilongo.
Nuumvo Chesta ota ilongekidhile oku pititha oalbuma ye nokwa hala oku longa nuudhiginini noku longa pamwe naahikingalo yopondje yoshilongo ngaashi Black Motion.

LEAVE A REPLY

Please enter your comment!
Please enter your name here