Malaria oshike?

0
151

Malaria omukifi hau etwa keemwe. Ngee omwe ina omalaria ya li omunhu, omai ohaa hapupala nee mexuli, opo nee taa tameke oku dipaa oitungifi imwe yohonde, oyo hai ifanwa oudopi vohonde itilyana [red blood cells].
Omalaria ohai dulu okukeelelwa nokuhakulwa ngee ya monika kuyele. Ashike fimbo limwe ihai monikila po diva, unene tuu keenhele domaushai, naaku kuhena ounamiti wa wana.

Ovanongononi onghee ngoo tava longo noudiinini opo kumonike ovenda yetunhilo yokukeelela opo ovanhu va ha kwatwe komalaria.
Oitwa ishi okudidilikwa kombinga yomalaria

OMalaria okwa monika tete mo1880
Oshitya Malaria osha dja Melaka loshiItaly Mal’aria, osho tashi ti omhepo ii.
Omalaria ohaa tandavelifwa keemwe, nomunhu ota kwatwa komalaria ngee alika komwe ina omalaria
Ongongahangano yopaunamiti mounyuni (WHO), oya tengeneka opo omafyo taa etwa komalaria a kale a shunifwa pedu neepelesenda omilongo omuwoyi (90%) moku ka fika komudo 2030.

Ouministery woundjolowele moNamibia owa hala yoo oku shunifa pedu etandavelo lomalaria, noshikonga shokupombela nokuhakula ovo va kwatwa komalaria koitopolwa yetu osha tameka nale.
Ngee oMalaria inaa hakulwa otaa dulu oku dipaa omunhu. Omai eemwe ohaa indjipalele mexuli nosho yoo mohonde yomunhu.
Omalaria ohai etwa koshike?

OMalaria ohai etwa ngee omunhu a lika komwe yonghainhu yedina Anopheles. Ei oyo ashike Omwe oyo hai dulu ku tandavelifa oMalaria. Eemwe odi hole oshimuke nopefimbo loupyu.
Ngee Omwe ya li omunhu oparasite (omai) ohaa i mohonde ndele taa kala mexuli omafiku onhumba. Eshi omai aa eli mexuli, omunhu iha ulike ta ehama manga, nefimbo eli omai otaa indjipala nee mexuli. Omai mape ohaa di nee mexuli taa shuna mohonde omo taa tameke oku kwata ko oitukulwa imwe yomohonde no taa twikile oku indjipala. Omai amwe ohaa fyaala nee mexuli.
Omwe ei ihena omalaria ohai kwatwa nee komalaria ngee ya li omunhu ena omalaria, opo nee nayo otai dulu oku tandavelifa omalaria.
Omadidiliko eli pi taa ulike kutya omunhu okwa kwatwa komalaria:

Uutalala wa pitilila
Okukakama
Okupupyala kwa pitilila
Okuvela omutwe
Okukambuka
Okufuda noudjuu
Okushungala kwomesho.

Natu didileke kutya omadidiliko aa taa popiwa apa ohaadulu yoo okuhangika movanhu vena omikifi dimwe dilili. Otashi ti nee omalaria okuna okufekelwa ngee omunhu ehe udite nawa, nonande omadidiliko aa kae po aeshe.
OMalaria ohaa kolekwa ngahelipi koshipangelo (Diagnosis)?

Omalaria okwa pumbwa okupangwa kuyele shaashi otaa dulu okudipaya omunhu. Keshe omunhu ta ulike omadidiliko a tumbulwa pombada, okwa pumbwa oku konaakonwa meendelelo pokaklinika ile poshipangelo shi li popepi naye, ile kundokotola waye. Opena ekonaakono losheendelela (rapid test) olo hali ningwa noidjemo otai monika moule wominute dishona lela.
Omadidiliko omalaria oo omunhu ena okukala a kotokela ongaashi a tumbulwa pombada. Ashike nee omadidiliko aa ohaa monika yoo momikifi dimwe dilili. Ohonde oi na okukonaakonwa diva. Ngee omunhu okwa ile konhele ina omalaria ngaashi pondje yoshilongo, ile konooli yoshilongo shetu, onawa ehokololo olo li yandjwe kovapangi nosho yoo eendokotola opo ku dilaadilwe diva kombinga yomalaria.
Moitukulwa imwe oyo ina omalaria mahapu, ovanhu otava dulu ku kala va humbata omalaria ndele voo itava ehama. Eshi ohashi ifanwa moshiingilisa taku ti: oimmunity.

Omalaria ohaa pangwa ngahelipi?
Ngee omalaria inaa pangwa, otaa dulu oku dipaya omunhu. Elalakano loku hakula omalaria oku dipaya mo omayi mohonde yomunhu. Naavo nee va humbata ashike omalaria, otava pumbwa oku hakulwa opo aha tandevele noshiwana.
Opena omiti odo da ufwa okuhakula omalaria, hadi yandjwa kouclinika ile moipangelo. Omalaria otaa duluoku hakulwa ndele omunhu ta veluka filu filu.

Omiti dali hadi longifwa nale mokuhakula omalaria ngaashi oChloroquine, ihadi longifwa vali shaashi eemwe oda kolonda paife, ita di dipawa vali komiti odo twali twa ikilila. Mona nee omupangi ile ndokotola woye, ile inda poshipangelo u pule kombinga yomalaria nepango lao.

Ekeelelo lomalaria
Ngaashi yoo omikifi dimwe, ekeelelo lomalaria olina oshilonga. Omikalo odo hadi longifwa oku keelela omalaria ongaashi:
Okulongifa eenete deemwe
Okunwa omiti dokukeelela omalaria. Ngeee omunhu ta i konhele ina omalaria na pule ndokotola waye kombinga yomhiti edi.
Omiti dokudipaa nokukeelela eemwe ngaashi eeDoom, noumuti vokuvava veli meefitola nomeeaputeka, nosho tuu
Ngee okuna eemwe, djala oikutu ile ya tuvikila olutu alishe.

Ovenda yokukeelela omalaria
Ovanonghononi onghee ngoo tava kendabala okukonga ovenda oyo tai dulu kutunhila ovanhu opo vaha kwatwe komalaria nande ova like keemwe. Ovenda ei ina i monika natango.

LEAVE A REPLY

Please enter your comment!
Please enter your name here