Meme Queen okwali yina yoyendji -Mbumba

0
113

KuHelvy Shaanika

Amushangandjai gwoSwapo Nangolo Mbumba okwa hokolola nakusa Queen Namundjebo a li yina gwoyendji.
Meekulu Queen Elizabeth Mwahangelai Namundjebo okwa mana oondjenda dhe mepipi lyomimvo omilongo 83, Etitano lya yi moshipangelo shepangelo shaShakati konima yuuwehame wethimbo ele.

Moonkundathana naKundana, Mbumba okwa ti meekulu Namundjebo okwa li omuntu a yooloka kaantu yalwe molwohole yoshilongo she nokwiimpwiyika naantu ye. Omolwohole ndjika, ye okwa monithwa iihuna kolutu, pamadhiladhilo nopamahupilo, nokuehamekwa kepangelo lyuukoloni.

“Kali ena oyana yemwene oyendji ndele nee okwe tu taamba noku tu edhilila otundji etu tala ongo aana yemwene.Okwa li shili omunyekadhi nu una omuntu wu li puye , ye okwa si oshimpwiyu aluhe opo wu kale wa yakulwa nawa. Okwa longitha iinima ye mwene mwa kwatelwa negumbo lye moka a li eedhilile nokuyakula aantu oyendji, mumboka mwakwatelwa, kuume kandje kopothingo Ben Zaaruka. Ben nangame otwa li twa dhiladhila kutya otse twa li oyana ye aaholike, ihe nani ye okwa li ashike ehole omuntu kehe,” Mbumba a ti.
Meekulu Elizabeth Namundjebo naamwayina aalumentu yaali Joel naEliakim Namundjebo oyo yamwe mokati kaaluudhe yotango mboka ya dhike oongeshefa dhaaluudhe muumbangalantu waNamibia..

Pahokololo lye ndyoka a li a hokololele omutoolinkundana nguka omimvo ndatu dha piti po, Meekulu Namundjebo okwa holola kutya okwa joina Ovambo People Organisation (OPO) momumvo 1963 nokwa mona nkene ehangano ndika lya lunduluka noku ninga Swapo.
Momumvo 1975, okwa ningi omukokoli omunandholongo gwondholongo yaShakati.Utya ondjedhililo ndjoka oya li ye mu tungilwa opamwe noonkwatwa oonkwawo ndhoka dha li dha kwatwa pamwe naye molwashoka oya li iilyo yoSwapo.

“Kamwa li ondholongo mOshakati pethimbo ndyoka, onkene oonakutu kwata oya dhengele uundunda wiipeleki omolwatse. Otandi dhimbulukwa kutya pethimbo nde edhililwa mokandunda kiipeleki moka, olupanda lwosamande olwali natango olutalala. Otwa li twa hepekwa nokufikwa nomalusheno, okufikwa hoka okwa li okudhigu nokuwinayi naahuka okwe eta opo poompito odhindji ndi ihatepo. Sho shika osho she etele ndje uunkundi wiiti yanathigo osho wo uuwehame wombunda ihaa wu polo.” Osho nakusa Queen a hokololele pethimbo eli momwenyo.
Okwa li a edhililwa oomvula mbali mondholongo, omimvo ndhika okwa li edhi kala moondholongo ngaashi mOshakati, Ogongo, Otavi, Windhoek nomoSwakopmud, nethimbo alihe okwa kala nokuhepekwa nayi kwaamboka ye mu edhilila.

“Omulandu gwedhiminathanepo lyopashigwana ondi gu uvuite, ndele ombili ngaa, Otandi gana, Kandina esiku nandi dhimine po aahepeki yandje. Ondi inekela Kalunga oteya dhimine po esiku limwe”osho nakusa Namundjebo a tile kuyele omimvo ndatu dha piti.
Ye pamwe naatamanekwa ooyakwawo oya li ya mangululwa inaaya monika ondjo moku taaguluka oveta yuukulo , na oya egululwamo mondholongo omumvo 1977.

Aapopepi naye naamwayina aalumentu mboka ya li yi itula moshinima shekondjelomanguluko, nayo oya li ya monithwa iihuna. Mokati kaambaka omuna omunona gomukadhona gwomimvo 14 ngoka naye a li a tulwa mondholongo. Pethimbo omumwayina omukuluntu Joel a dhipagwa kuwalye meekulu Queen nomumwayinamati omushona Eliakim inaya vula okulila mumwayina ngoka oshoka oya adhika ya kwatwa po esiku olyo tuu ndyoka. Omumwayi gomulumentu Eliakim okwa manene oondjenda moshiponga shoshihauto konima ashike yemanguluko lyoshilongo.

“Shoka ndishi osho shoka kutya sho twa li tatu kondjo , katwa li tatu kondjele iimaliwa, ndele otwa li tatu kondjele emanguluko lyaNamibia.Ihe pomasiku ngaka nomathimbo ngaka aantu oyi impwiyika ashike nohole yoshimaliwa, tu longeni tango nuudhiginini nokutunga oshilongo shetu nohole yoshimaliwa nayi ninge ontiyali,” osho a li a kumagidha pethimbo lyoonkundathana naKundana omimvo ndatu dha piti po.

Pahapu dhomwanagona Phillep Namundjebo, nakusa Queen Namundjebo ota dhimbulukilwa pegumbo lye mOngwediva nena , na otaka fumvikwa okuza mongeleka yegongalo Odibo St Mary Anglican noku falwa komaendo gopOmafo.
Okwa thiga ko aamwayina Fillipus Hanyemunange Namundjebo na Monika Namundjebo.

LEAVE A REPLY

Please enter your comment!
Please enter your name here