Moussongela onkene tuu eli mongali

0
808

KuMaria Namupala

ONDANGWA – Omusita Pedro Marcelino Moussongela, omunamimvo 57, ngoka ta tamanekelwa iipotha ya yooloka okwa holoka ishewe mompangu yamangestrata gwaNdangwa oshiwike shika omolwepwilikino lyeindilo lyobooloha.
Moussongela okwa mangelwe po muJuni omvogu konima sho a lopotwa ta longo iilonga inaa yi ukilako moshigwana.
Omukwashigwana gwaKongo nguka, oye omutotipo goskola yoMennonite Brethren Community Private School tayi adhika mOmafo moshitopolwa shaHangwena osho wo ongeleka Evangelical Mennonite Brethren Church.

Omulumentu nguka okwa holoka mompangu ngashingeyi iikando oyindji nota tamanekelwa iipotha oyindji. Ngaashi ekwatonkonga, ekwate po lyombanzona lyaanona ye mboka ta ya hokololwa yaamo moshilongo sigo onena.
Epwilikino lyeindilo lyobooloha ye olya uundulilwa komasiku 20 no 21 Apiilili nuumvo, mono ohofa tayi ka tokola ngele omutamanekwa nguka ota vulu okupewa ompito yokwi ifutilamo mondholongo.

Shino osha landula natango sho mu Febuluali nuumvo a li a holoka mompangu a pwilikine ngele ota vulu oku tulamo eindilo lyobooloha, ashike natango olya undulilwa komeho. Omweeti gwiipotha Dollien //Gowases okwa ti iipotha mbyoka Moussongela a taalela iinene, no ita vulu okumangululwa manga, oshoka ota vulu a ye omakonakono gopolisi moshipala.

//Gowases ta ti momakonakono nomapekapeko ngoka yena po ngaashingeyi oya mono kutya omufekelwa okuna iipotha oyindji, yimwe oyili koshitopolwa shaHangwena, koshilandopangelo naambyoka a taalela mOndangwa, ishewe kiipotha mbyoka okwa tegelelwa ku gwedhwe natango.
“Epangelo itali vulu okupa Moussongela obooloha pethimbo ndika, molwaashoka olina uumbanda kutya ohashi vulika a ka tsikile nokulonga omiyonena ndhoka a longa nale, ye aka gwedhe ko natango nokupiyaganeka mboka ya holola iilonga mbyoka a longa,” //Gowases ta ti.

Pethimbo lyetsikilo lyiihokolola mbyoka Ngoie-a-Ngoie gumwe gomoombangi dhe, okwa li naye a gandja uumbangi we kombinga yomahokololo niipotha mbyoka Moussongela ta tamanekelwa. Ngoie okwa gandja ayihe kepangelo osho wo kompangu opo yi ninge etokolo lyahugunina.
Ngoie oye ta kwathele ponkatu yuukuluntuskola pethimbo ndika okuza sho Moussongela a mangwa po omvogu, okwa li a pula epangelo li mangulule Moussongela opo a vule oku ke endekulula enongelo ndyoka ta ti olya halakana ngashingeyi, nonande uumbangi mboka wa monika po owu ulike kutya osikola oyo tuu ndjoka otayi yi nawa komeho.

Omasiku gaziko aakwashigwana mwa kwatelwa naavali yamwe yaanona mboka, oya li ya ningi ehololomadhiladhilo taya pula epangelo nompangu kaayi pe Moussongela ompito yokwiifutilamo.

Epwilikino lyobooloha otali ka tsikila momwedhi tu uja no kwa tegelelwa omutseyinawa guuthemba womuntu, nokuli Omukuluntu wiliki gwehangano lyoNamRights Phil Ya Nangoloh a ka gandje uumbangi.
Moussongela okwa holoka komeho gamangestrata Jurina Hochobes, nokwa kalelwa po komunongompango Tuwilika Shailemo.

LEAVE A REPLY

Please enter your comment!
Please enter your name here