Okulonga oikulya naku kale komesho yomalodu

0
49

Eli olo efimbo liwa omo Namibia a pumbwa oku tala eisho lininene noku li tula mo melongo loikulya komesho yoinima ihapu.
Oshi li omukalondjikilile moNamibia ngeenge omunhu ta dilaadila oku tota ongeshefa luhapu oludi longeshefa olo hali ya momadilaadilo aye ongeshefa yomalodu. Na luhapu ovanangeshefa vahapu vopetameko ohava patulula tete eembaa. Moilongo ihapu mounyuni omalodu okwa pumba, ngee owa hala oku nwa, ouna oku konga lela lela opo u mone onhele ta mu landifwa omalodu.

Ashike moNamibia, keshe oka tungo to hange ngee kake na obiila, otaka landifa otombo ile epwaka, nonande ofye ngaho tuna oikulya hai di kondje yoshilongo. Eshi nee tashi kumwifa osheshi kutya ngee owa hala oikulya, ouna na naanaa oku konga noudjuu opo u mone okakulya. Shapo ongeenge wa hala ondooxa yobifa ile okashi kondungu shaashi oyo, oyo hai liwa ngee omunhu to nu omalodu.
Ngeenge omunhu ouna po okamaliwa koku tameka ongeshefa omolwashike mbela ito ka longifa oku tota ongeshefa yokulonga oikulya?
Ngaashi odula yoneudo oshilongo osha yambekwa nomuloka muwa, ngeno okwali pena ovanhu vahapu neudo va tula oimaliwa yavo mokulonga oikulya ngeno neudo ota pa kala ovanhu vahapu va mona eteyo liwa.

Ngeenge ngeno okwa li twa tula imwe yoimaliwa yetu oyo twa tula moumbaa mongeshefa yokulonga oikulya, ngeno oimaliwa oyo epangelo la tula po oku eta oikulya kudja kondje yoilongo, ngeno oimaliwa oyo ngeno otai i kondje yoilongo, ngeno otai i kovanangeshefa vomoshilongo ponhele yoku kala alushe twa yukifa oimaliwa kondje yoshilongo nopefimbo apa hatu dulu oku shi keelela. Omudo nomudo epangelo laNamibia oku pitila moUniversity yaNamibia, ola kala tali deula ovanafaalama noku yandja eshivo lokukuna olwishi, olo hali wapalele odula ihapu ngaashi naanaa ei yoneudo.

Kakele kolwishi opena ngoo vali eembuto dihapu doikulya mwa katelwa eefukwa nomakunde noilya yoovene vene oyo kwali hatu dulu okukuna pamukalo wongeshefa lo efimbo loshikukuta eshi tali keya ovanengeshefa ngeno otave li mange kumwe tava tula oilikolomwa yavo mumwe ndele tave i landifa kepangelo ponhele yoku landa kondje yoshilongo oilongomwa oyo tai dulu okulongwa moshilongo.
Ngeno oimaliwa oyo ha i longifwa kepangelo oku landa oikulya koilongo yokondje ngeno oha yii meendjato dovanangeshefa ovaNamibia. Komukalo oo okutya ngaho ove owa mona oshimaliwa sha kola, ove owa xupifa oshiwana koupika womalodu oo a pika oshiwana shetu.
Kakele koikunwa mo yomomapya, omolwa odula iwa oyo twa mona Kalunga okwe tu pa omhito iwa ngeno twa hakela omeva ndele hatu ningi nande ovanafaalama veeshi. Oo omeva oo okwayi natango hatu dulu oku a longifa oku tekela oimeno, unene tuu oingumutulu noihape oyo hatu dulu okukuna nokutwika moule aushe wodula. Ashike ponhele yaasho, otwa tala ashike omeva taa pwiinine moyana, fye hatu pula epangelo kutya omolwashike ita li hakele omeva. Ove onga omukwashiwana omuNamibia, una oshinakuwanifwa koshiwana noshilongo shoye, omolwashike ito unganeke nande ovanamukunda vakweni ndele ta mu fe omatale oku hakela omeva, nye mu kale muna ehoololo ngee, olounafaalama weeshi, ile omeva oo mu a longife okutekela oihape noungumutulu?

Oshivike sha dja ko moshifo shimwaina naKundana shoNew Era omwali muna omunangeshefa umwe oo a fiya po ongeshefa yaye yokupangela eeaiskasa nee air conditioner okuka tameka ofaalama youdila voimote, a ya mongeshefa yoku longa oikulya, ndele ote i endifa nawa.
Eshi ota shi ulike ashike kutya mongeshefa yoikulya omuna oimaliwa nonande ina tu hala oku shii tavela. Keshe efiku ohatu li. Juni ile Juli eshi ta fiki epangelo ota li tameke oku tukula oikulya yoshikukuta oyo ta i landwa pondje. Ashike ngeenge ohatu longo ohatu kwafa epangelo letu opo li lande oikulya yombilixa, fye vali ohatu indjipaleke eliko loshilongo shaashi oimaliwa ita i dimo vali inaa shi pumbiwa, fye vali oha tu kondjifa ondjala noluhepo.

LEAVE A REPLY

Please enter your comment!
Please enter your name here