Omalaria mOhangwena oya shuna poshi

0
44

Komutoolinghundana

EENHANA – Oshikondo shouhaku otashi kondjifa noudiinini omalaria moshitukulwa shaHangwena.
Edi oda kolekwa kOmunambelewa omukwateli komesho woundjolowele moshitukulwa eshi John Hango oo a tumbula kutya oshikondo osha lopotelwa omivalu yovanaudu vomalaria va hakulwa moipangelo yomoshitukulwa da enda nokuya pombada okudja moshivike oshitiheyali petameko loneudo.

Okwa ti ouyelele owa kwatela mo fiyo omafiku 19 Maalisa neudo eshi ovanhu 1 641 va kolekwa va hakulwa molwomalaria moipangelo yeedistricta moshitukulwa. Okwa ti omivalu oya yooloka peenhele neenhele, kokOngo okwa hakulwa ovanaudu 440, omanga kEenhana ovanaudu 654, nokEngela okwa hakulwa ovanaudu 547 va hakulwa poupangelo Odibo, Edundja, Hamukoto aKapa, Ongenga , Okambebe nOngha. Okwa lopotwa ashike omafyo ovanhu 5 komukifi womalaria mokati kovanaudu va hakulwa. Omunambelewa okwa twikile ko a ti, fiyo omoshivike oshitivali shaMaalisa ovanaudu ashike vane ve li moshipangelo. Ta weda po kutya, koitukulwa ine kolundume oko kwa shiivika kuyadi oyoombo yovanaudu vomalaria novanaudu vamwe hava hakulwa moipangelo yaNamibia vahapu ohava di poshishiindalongo Angola.

Hango okwa ti oshikondo osha ninga po eenghendabala dokupombela eenhele da xupile ko kepombelo odula ya dja ko. Ta dimbulukifa ovakwashiwana vamwe hava anye ovapombeli va pombele omaumbo avo kutya, mokwaanya opombela osha yandja omhito keemwe di dale noku tendula nawa omai ado mahapu. Oshikondo shouhaku osha tameka kuyandja omapukululo pamikalo dihapu koshiwana, peefikola, meengeleka, sha longifa ovaleli veendodo da yooloka.Ta yelifa vali kutya, ovanambelewa vouhaku ova ka konaakona ovanhu komaumbo kwa dja ovanaudu vomalaria va dule kuva hakula.

Hango okwa weda po kutya, eshi ovanhu vahapu komikunda va kondekelwa ko komeva male, osha etifa opo Oministeli yoshikondo shouhaku omundokotola Bernard Haufiku a talele po eenhele/ omikunda itaadi fikwa noyeendifo moshitukulwa shaHangwena oshivike shadjako nokuyandja eyakulo kovanaudu va tokonenwa oko.

Omunambelewa wouhaku moshitukulwa shaHangwena ta kumaida oshiwana shi laamene opo shi ha like keemwe,mokudjala oikutu ya tuvika olutu ngeeshi li pondje, okulongifa eenete deemwe, nokulongifa oilyaamenifi yopamufyuululwakalo, okufya oshisho omaumbo a kale a pombelwa, shoo shi fufile oilambo yomeva popepi nomaumbo opo tapa dulu kudalelwa keemwe. Ta yelifa kutya oshikondo otashi yandje omiti poupangelo vomoshitukulwa okukeelela omalaria.

LEAVE A REPLY

Please enter your comment!
Please enter your name here