A dipaelwa obiila

0
1274

Komutoolinghundana
_________________________

EENHANA -Opolifi yaKongo moshitukulwa shaHangwena oya kwata po ovalumnhu vavali vomomukunda Ongudi, omolwefyo laJosef Samuel womido 34, a dipaelwa poukamba vopOngudi mefiku exuliloshivike ladja ko.
Okwa hokololwa Samuel oo a dile komukunda Oshimha a dipawa vati eshi a nwa mo obiila yovanhu, osho sha eta vamwe vomwaavo vali tava nu va handuke nokumu ponokela nombele nonoshiti. Opo a twilwa nokudengwelwa noshiti ina dja po, opo a fila.
Ehokololo lopolifi otali ti, manga a li momwenyo, nakufya Samuel naye okwa ningile eedula modolongo yaKongo shaashi a dipaele yoo omunhu nomukonda eshi ningila poukamba vopOngudi tuu opo.
Omupopiliko wopolifi yoshitukulwa shaHangwena Shisante Kaume Itumba okwa koleka ouyelele ou.
Otaku hokololwa oikolokosha ya tukuka lwokeengulasha doSoondaxa yadja ko poukamba vopOngudi omukunda u lyaafane oushiinda nomukunda Oshimha oko kwa dja Samuel.
Sisante Itumba okwa ti, oikolokosha oya tukuka eshi Samuel a pima nokunwa mo obiila yovanhu ina pewa epitikilo. Eenhangu oda tukuka nomulumenhu weedula 26 wedina Shingo Willem okwa pweya mo ombele nokutwa Samuel monhulo. Pefimbo tuu opo, omulumenhu mukwawo wedina Vakola Tuyoleni weedula 28 okwe mu dengaula noshikulumbwati. Samuel okwa xulifila opo. Iitumba okwa ti ekonaakono lomudimba olo ta li ka ulika kutya omulumenhu ou kwa dipawa kombele ile okoshikumbwati.
Opolifi yaKongo, oya kwata po ovakonenenwa ava, noku va patulula oshibofa shedipao. Ova idililwa modolongo yaKongo nova holoka monhangululilo yaMangestalata mEenhana mEtitatu.
Oufiku wokupendukila Etitatu, omulumenhu womido 26 naye okwa fya efyo loipundjamenye, sha ningilwa poundingosho pOnangolo , natango moshitukulwa shaHangwena.
Nonande kapena naanaa ouyelele wofaafaa una sha noshiningwanima, Itumba okwa hokolola kutya omulumenhu taku tengenekwa ena omido 26, wedina Salom Mandume oo a li a shivika nedina Haulyomai na Erastus Elias (36), vali mokandingosho konhumba poukamba vopOnangolo, eshi va tameka tava tanguna.
Kaku shivike naanaa kutya ova li tava tangunine shike.
Konima yeenhangu, Elias okwa ya pondje, nopo nee konima yokafimbo, Mandume naye okwa pita mo mokakamba nokuya pondje. Ka ku shivike naanaa kutya oshike sha ningwa po pondje opo ashike otaku hokololwa Elias akufa ombele nokutwa Mandume omanga vali pondje.
Mandume okwa ongotela nokufila ponhele opo tuu opo.
Elias okwa kwatwa po nokwa holoka momhangulilo yaMangestalata mEenhana, nova pambele va Elia ova shivifilwa.
Nakufya Mandume okwali omukalimo womomukunda Ohaimbudu, nomufekelwa okwa dile komukunda Onamundidi moshitukulwa shaHangwena.
Oshiningwanima eshi osha ningwa mOmaandaxa oshivike eshi lwopotundi 22h00.

LEAVE A REPLY

Please enter your comment!
Please enter your name here