Eputuko lyandje

0
1550

Ngame onda putukile paakuluntu yandje. Kombinga yandje opu na oshinima shimwe ihandi shi dhimbwa nandonando. Meme okwa li a lombwele ndje kutya, sho nda li okahanana aniwa onda li handi lili noonkondo oshikumitha. Momukunda Omatando mUukwanyama, moka nda valelwa, hamo nda putukila. Aakuluntu yandje oya ka za ko kUukwanyama e taa shuna kUukwambi. Tate sho a galuka kUukwanyama, okwa tula tango momukunda Omusimboti, opo ihe hugunina okwa ka tunga egumbo lye momukunda Iishikilo. Momukunda Iishikilo, onde ya mo okamati okashona lela, nomo nduno nda putukile.

Momukunda gwetu Iishikilo, otandi dhimbulukwa wo aamati mboka twa putuka pamwe nayo, ihe oya li aakuluntu kungame. Aamati mboka twa li hatu kala nayo nokulitha pamwe iimuna, oyo nakusa Jafet yaShivolo, a tseyika nawa nedhina Kantalelo kaShivolo nomumwameme, nakusa Ilius hi ithanwa Nanyalo yiIndongo. Uuna tu li kuusita nenge megumbo otwa li hatu zala oombende nenge uupa woombambi wa hikwa nawa. OoKantalelo kaShivolo, ooIilius yiIndongo nooAngula yaKalukuta oyo ya li haye tu hongele oondayi. Okuhongelwa oondayi, otaku ulike ekwatathano nuukuume wa kola mokati kaamati yopethimbo lyetu. Uuna tatu litha, ooKantalelo ka Shivolo, ooIlius, nooAngula yaKalukuta ngoka a li ha kala moohekulu Amagola sho taa yogo, tse aanona ohatu kala tatu galula oongombe.

Aamati mabaka konyala nda putuka pamwe nayo notwa li tut hike pamwe nayo, ongaashi; ooIitembu yatate, ooAsser yaKalola omutekulu gwatate, ooAthingo yaSaulu, nomushiinda shetu Tomas Amagola. Omumati ngono Tomas Amagola, otwa putuka pamwe notu thike konyala pamwe moomvula, oku vule owala oomwedhi dhimwedhimwe. Niitya yimwe, Tomas yaAmagola omakula gandje, twa litha naye. Sho twa kala mIishikilo, aakuluntu yetu oya li ye na ekwatathano ewanawa noonkondo. Sho twa li uumatyona shampa nda yi ndi ka tokelwe kootate Amagola, nena otwa li hatu lala ashike mondjugo ya yina yaTomas.

Shampa ishewe twa tokelwa maandjetu, nena tse naTomas ohatu ka lala ishewe mondjugo yameme. Kepipi lyonena egundjuka okuhokolola kutya otwa li hatu lala moondjugo dhoomeme, ngiika oshinima itaa shi tisha, sho ishewe ngiika osha fa sha nika iiyolitha nuukatalume, ashike pethimbo ndiyaka osha li tashi holola uukuume nuukumwe wetu unene pokati komagumbo getu gaali. Otwa putuka ishewe nokamati kamwe kedhina nde li dhimbwa, ka li haka kala mooGwamunale ashike okamanene oondjenda pethimbo ndiyka. Pakudhimbulukwa kwandje, aamati aakwetu mboka twa li hatu litha nayo, kongashingeyi ope na ashike yatatu ye li momwenyo, ngaashi: Iitembu yiIndongo, Tomas Amagola naAthingo yaSaulu.

Kakele kiilonga yomegumbo nokulitha, otwa kala wo hatu yi kuukongo. Ngame mwene omukongo, nonda kala ndi hole uukongo.Uuna ndi li kuusita, ngame otandi weye, naasho tandi shuna kegumbo, ano okufala iimuna kegumbo, ihandi kala inaandi faalela ongwali, nenge onkanga nenge ondhila kehe. Ngame onda li omwoodheki kamana nondjumbeta wo. Uutati wetu mbu hawu li oonguti nuuhanda, shampa wa adha ndele tandi wu ganeke oshinamwenyo sholudhi kehe nomuvi nenge nondjindja, oshi na okugwila pevi. Sho nde ki ilonga okuyaha nondjembo, uukwatya mboka wokushoneka nawa owa ka faathana naamboka wuuta wanangongo. Ngele owa adha tatu yaha iiyamakuti mbyono iinene, omuvi ngoka otashi vulika gu pite mo moshinamwenyo, nenge omalwenya goshikuti ogo ga hugunine moshinamwenyo, ndele kombinga onkwawo ogwa pita mo.Omivi dhetu odha li hadhi upikwa nawa, dhi na oondungu dha tsa dho dhi na omayego.

Iinamwenyo mbyoka twali hatu yaha unene, ongaashi; uulimba, uupundja, oombambi noomenye. Pethimbo mpoka oomenye odha hadhi napa mumwe noongombe, notwa li nduno hatu dhi hondjunine twi ipela ko oongombe. Otwa li wo hatu dhipaga oompugulu, ashike katwa li hatu dhipaga dhomuloye. Omuleshi, koneke kutya open a eyooloko pokati kuukongo nomuloye. Oshiyamakuti sha dhipagwa muukongo oshamwene ngoka eshi yaha, ihe shoka sha dhipagwa tashi taakana moshilongo, ano omulowe, kasha na mwene. Ooholongo nadho pethimbo ndyono putse odha lid hi lip o otututu. Oondhila ndhino dhomomeya, ngaashi : oonkololo, oonkuwa, oondjokwe, oongata nuukwikwiti ito mana, onkene megumbo lyetu kamwa li hamu liwa omukaga nandenande. Yaandjetu yomooIndongo, shampa owala ye shi kutya onda ya kuusita nenge kuukongo, ohashi kala olwindji she ya yelela kutya iinamwenyo mbyoka tandi zi ko nayo, tandi yi eta megumbo , itaye ke yi lya esiku limwe alike, ndele otaye ke yi lya omasiku ogendji.

LEAVE A REPLY

Please enter your comment!
Please enter your name here