Iiyemo yoonkulungu ya ndumbalala koNascam

0
30

KuHelvy Shaanika
____________________

Ongwediva
Iimaliwa mbyoka hayi futwa uuna oshiimbo nenge omaimbilo gomwiimbi ga longithwa kOradio, nenge koTiivii yontumba, omwaalu ogundji gwaambika oguli ashike moshiketha shehangano lyedhina Namibia Society of Composers and Authors (Nascam).

Iimaliwa mbika oya ndumbalala moshiketha shehangano ndyoka olyo hali taamba iimaliwa mbika noku yi futa ooyene yiiyimbo noongalo. Ihe molwashoka aakwanezimo yaa imbi yamwe osho wo yaahikingalo mboka ya mana oondjenda ina yi ishangitha na Nascam, iimaliwa mbyoka ita ya vulu okuyi pewa.Onkene shoka mbaka ya pumbwa okuninga osho oku ki ishangitha naNascam, opo ya vule okupulako iimaliwa yaakwawo.

Ooradio dhoNBC, ooradio dhopaumwene osho wo ndhoka dhoshigwana ohadhi futu omwaalu gwontumba kuNascam meimbilo kehe nenge mongalo kehe ya dhanwa mombepo kosasiona ndjika. Ndele nee iipambu yimwe yoshimaliwa shika sigo oompaka inayi indilwa ko kooyene opo ye yi futwe.Shika oshi li ngaaka molwashoka aahikingalo yamwe oya hulitha nenge oya mana oondjenda no inaa ya ulika nokushangitha mboka yena okupewa iimaliwa yokupandula oonkulungu nuunkulungu.

Shika oshi li ngaaka molwashoka kapena euveko mokati koonkulungu oonkulu osho wo aakwanezimo lyadho. Oyendji yomwaamboka inaaya shangitha oondjimbo ndhoonkulungu ndhika oomboka iilonga yawo hayi longithwa mOradio yOshiwambo yaNBC ,osho wo Iilonga yomOmbepo yoShilozi.

Omunambelewa omukuluntupitithi gwa Nascam, John Max okwa kolekele shika a ti opena iimaliwa mbyoka yoonkulungu dha mana oondjenda inaa yi pulwako kaakwanezimo lyawo uule womimvo odhindji.

Okwa ti Nascam iimaliwa mbika oheyi pungula moshiketha shomapungulo ya yooloka kiimaliwa iikwawo omanga a tegelela ooyene yayo opo ye ye okuyi indilako.

“Ndele nee ngele kapena ngoka a holoka oku indilako iimaliwa mbika konima yethimbo nena mbika ohayi tulwa moshiketha shonkalathano. Oshiketha shika ohashi longitha iimaliwa mbika miinyangadhalwa yopahedhi osho wo yilwe mbyoka yi na ekwatathano nomithigululwakalo,” Max a ti.

Nando Max ina vula okutumbula kutya iimaliwa yomwaalu gu thike peni ya tulwa moshiketha shonkalathano, okwa ti NBC omvogu okwa li a futu konyala oodola omiliona yimwe oshinkwanu ne , noodola omayovi 140 000 yomwaambika oya pungulwa moshiketha shonkalathano. Nascam okwa dhika po wo oshiketha shomafumviko uuna onkulungu ndjoka yi ishangitha naye ya mana oondjenda.Ehangano ndika ohali kutha mo wo oshipambu shalyo miimaliwa mbyoka omanga mbyoka ya hupapo inaa yi topolelwa oonkulungu dhomoshilongo osho wo ndhoka dhokiilongo yilwe muuyuni mboka oongalo nomaimbilo gawo ga dhanwa moosasiona dhomoNamibia.

Omiyalu dhimwe ndhoka hadhi tulwa moshiketha shonkalathano odha nuninwa aashangi, aatoti nosho wo aanduluki yomusika mboka inaaya shangitha omaimbilo gawo natango naNascam.

Ngele onkulungu inayi ishangitha nena eimbilo ndyoka otali talika ko lyi imbwa konkulungu yaashiwike, onkene iimaliwa yomusiki ndjoka otayi kala ashike moshiketha shaNascam.Uuna eimbilo lya dhanwa moradio, mwene gwalyo oha pewa ooperesebda 25, ye omutulikumwe gwalyo ooperesenda wo 25, dho ooperesenda 50 tadhi futwa omunduluki gweimbilo ndyoka. Ihe pompito ndjoka onkulungu oyo ya longa iilonga ayihe mbika nena omwaalu aguhe gooperesenda 100 ohe gu futwa ku Nascam.
Max okwa ti opena omaimbilo geli moshitopolwa shaangoka ooyene yago kaaye shiwike.

Okwa kumike aakwanezimo lyoonkulungu ndhoka dhaako we, nenge oonkulungu ndhoka inaa dhi ishangitha naNascam opo dhi kwatathane nehangano kombinga yoshinima shika.

LEAVE A REPLY

Please enter your comment!
Please enter your name here