PoChris Junior ya dhana oshituthivalo

0
32

KuMaria Namupala
____________________

ONETHINDI – Osikola yopaumwene yaChris Junior oshiwike sha zi ko oya dhana oshituthivalo shayo, shomimvo 10 dhokuthikama po kwayo. Osikola ndjika otayi adhika mOnethindi, no yili moshikandjolongo Oshigambo.
Oshituthi shika osha endele pamwe negandjo lyomakopi nomapapa posikola oyo tuu ndjoka. Osikola oyina ondondo yopetameko sigo ondondo onti-10,noyili mewiliko lyomukuluntuskola Sarah Wamambo.

Opuna aalongwa yeli 420 naalongi yeli 20. Petameko lyoskola ndjika sho ya egulula omiyelo dhawo tango momumvo 2007, oyali owala naalongwa 70 lwaampoka, oyo ya nongekwa momvula ndjoka.

Omukuluntuskola Wamambo okwa ti osikola ndjika oyo yimwe ya tothwamo hayi longo nawa moosikola ndhoka dhi li moshikandjolongo Oshigambo, nomoomvula dha piti oya kala noku pewa omakopi nomapapa molwiilonga yayo mbyoka hayi kala yi iwetikile.

Wamambo okwa pandula aalongi, aavali naalongwa yoyene sho aluhe hayi itula melongo. Ta ti osikola oya taalelwa komashongo ogendji ngaashi ndyoka lyoongulu dhoskola inaadhi gwana osho wo iikwathitholongo tayi kanda omapunya.

Poshiithanene opwali pwa kalwa kiilyo yehangano nenge olutu lwokutalulula nokutonatela olusheno ndoka halu ithanwa Electricity Control Board, lwo nduka olwo lu li omunani gosikola oyo tuu ndjoka.

Omunambelewa omukuluntu koshikondo shemona molutu ndoka talu lele osikola ndjika, Mara Uazenga, pethimbo ta popitha aanaskola okwe ya kumagidha ya kale ye shi omalalakano gawo moonkalamwenyo dhawo.

Uazenga ta ti Electricity Control Board okwa uvaneke opo a kwathe aanona yatatu posikola mpoka yaza mongundu kehe, opo eya landele iikwathitholongo, yo ya vule okuya komeho nelongo lyawo.

Aalongwa oya pewa oonzapo nomakopi osho wo olupandu lwoshimaliwa okutameka pondondo yopetameko sigo ondondo onti-10, shika sha ningwa nelalakano lyetsomukumo, yo mboka inaa ya longa nawa omumvo gwa yi yiitulemo natango melongo lyawo.

Lily Meke Enkali oye uulikwa omulongwa dhingi posikola ndjoka sho a piti ondondo onti-10 niitsa 42 omumvo gwayi nokuli ngaashingeyi mondondo onti-11, Enkali okwa pewa omagano giikwathitholongo na yilwe oyindi.

LEAVE A REPLY

Please enter your comment!
Please enter your name here