Efimbo lomatango manene oliwa ashike kotoka

0
43

Osha ninga vali exuliloshivike laPaasa olo ovanhu vahapu hava kala veli pyakidila nomalweendo okuya penya naapenya, oku talela po ovaholike vavo.
Oomolwa oivilo oyo, eendjila ohadi kala di yadi neenghono osho hashi etifa ovo veheshi okuli didimika, ile veheshi okushinga, ovashingi nouhasha, eengholwe, ile tava shingi omahauto kaeli koopate va ete oiponga yomeendjila opo ihapupale.
Omushingi keshe kotoka nee opo u amene omwenyo woye mwene neemwenyo dovalongifi vondjila vakweni. Oshinima shinene hashi eta oiponga yomeendjila, elongifo nai lomalodu nomolwaasho luhapu ngee owa tale peenhele opo pa ningilwa oiponga oto mono kutya opena omakende omalodu.

Omafyo a etwa koiponga ohaa lulumike nota shi etifa omalipulo mahapu eshi ovanhu vahapu unene ovanyasha ovo vena oshilonga moshiwana tava pupo notava lemanekwa, tashi ningwa moule wefimbo lixupi neenghono. Onghalo yatya ngaha itai dulu nande oku tambulwa ko nomolwaasho otwa pumbwa tu ninge posha onga oshiwana opo oiponga yoludi eli i haae vali komesho eshi twa yuka moPaasa.
Eshi ota shi dulika ashike ngeenge oshiwana tashi longele kumwe nokukwafela omahangano oo elile po eameno lomeendjila naao ngaashi oNational Road Safety Council, oMVA Fund, oRoads Authority, Private Sector Road Safety Forum, Road Fund Administration nopolisi noshoyo omahangano oo eli moukumwe naao ngaashi elelo loshilando shaWindhoek Oshiwana osha pumbwa opo shi longele kumwe novatonateli vomeendjila shoo shi liufe keemhango.

Alikana ngeenge oveta ota i ti shingila ko 60 omolwa shike una oku shingila ke100? Omolwashike naana omunhu ena okushinga onhapo yo 200 ngeenge oveta yomeendjila da Namibia ota i ti onhapo ina i pitilila po 120.
Ovanhu ovo iha ve li ufa keemhango domeendjila luhapu ovo hava etele oiponga ovanhu vehena nande epuko. Omunhu ta shingi nawa, ndele ta ka dipawa ashike oipundja menye.

Fimbo limwe oto hange omunhu ta shingi omafele ndele oteke li hakana ashike pomalodu. Alikana shinga nawa, shinga nefimbo opo uka fike nomwenyo, ove uha etele ovanamwenyo ovakweni oiponga.

Pomhito ei Kundana okwa hala yoo okuku kumaida ovaendi vokolupadi ovo oikando ihapu hava lyatwa molwa ouhasha wavo vene.
Omahauto oinima ya nyika oshiponga, ashike oto hange ashike ovaendi vokolupadi tava ende va lambalala okandjila aka ka shunga keli komunghulo wopate. Ovanhu vena efuu loku enda mopate nokavena nande oumbada kutya oto dulu oku ngwadjulwa. Omushingi ngee okwa henuka etuwa likwao mopate kena apa teli yepele, oku na ashike okuuka kwoove. Ngee to ende kolupadi, enda kokule nopate.
Opena nee vali ava hava i koundingosho ndele omunhu eshi ta di oko kewete naapa eli. Ota tauluka ashike opate na ita dilaadila kutya omwenyo waye ouli moshiponga.
Natu kotokeni.

Kovashingi ngeenge, to shingi li mangela mo ove shilipaleka kutya ovatwaalelwa voye navo ove li mangela mo momapaya.
Ino sineya peemhito odo da nyika oshiponga, unene tuu peendalaye, nongeenge uhe wete ko komesho ile ngeenge etuwa eli tali di komesho lili popepi. Oshihauto shoye nashi kale shina oufemba wokweenda kopate shoo vali nashi kale shina eelamba adishe tadi longo. Tala omataiyela, naakale ena omuku wa wana na okuna oukolele muwa. Ngee ouna ehalo lokunwa omalodu, ino shinga, shingilwa, nongeenge oto shingi oshinano shile, kala to fuda po konima yeevili mbali keshe.
Lwa xuuninwa, Kundana oteku halele Opaasa ta yi ku mangulula momanyo oye aeshe.

LEAVE A REPLY

Please enter your comment!
Please enter your name here