Elongifo nai loikolwifa noundjolowele woye

0
34

Ovanhu vahapu ohava nu omalodu ndele itava mono oupyakadi washa, ashike okunwa omalodu unene sha pitilila (binge drinking) efimbo lile osha nyika oshiponga koundjolowele womunhu. Omalodu a pitilila ihaa teya po ashike omunhu ye mwene, ndele ohaa teya po yoo eefamili, oshiwana, nohaa eta oiponga yokulwa nosho yo yoihauto ngeenge omunhu ta shingi a nwa. Kakele nee kokuehama kwopokafimbo ngaashi okukunga nokumbilingwa, okunwa omalodu sha pitilila efimbo lile oshina yoo oupyakadi muhapu kolutu lomunhu.
Apa ohatu i mo nee moupyakadi ou moule kanini:

Ouluvi
Okunwa omalodu sha pitilila otashi dulu oku eta okudimbwa, okukanifa omadilaadilo pakafimbo, nokukakama. Okunwa omalodu mahapu efimbo lile unene otashi dulu okweeta enyonauko louluvi nosho yoo oku ikilila ndele omunhu ita dulu noku pitifa po efiku limwe ina nwa omalodu. Omalodu kounona okwa nyika nee vali oshiponga osheshi ouluvi opo tau kulu, notaa dulu oku eta oupyakadi melihongo nosho yoo oku ha dimbulukwa oinima.

Eekaankela (Cancer)
Okunwa omalodu sha pitilila okuli ponhomola onhivali mokuetelela eekankela domokanya nosho yoo momunino omo hamu piti oikulya noikunwa. Monomhola yotete omuna okunwa omakaya. Omalodu mahapu ohaa dulu yoo okuetela exuli oupyakadi, osho tashi dulu oku eta okankela yexuli.

Omutima nohonde

Okunwa omalodu epitilila otashi dulu okueta opo onhumba yomutima ikale ya nkundipala noi tai pombo nawa ohonde. Omalodu otaa dulu oku eta ohonde ya londa. Ohonde ya londa otu i sheni nawa kutya otai dulu oku etelela omikifi dikwao ngaashi edengo lomutima nosho yoo [stroke] ombada.

Omapunga
Ovanhu ava hava nu omalodu sha pitilala ohava kwatwa luhapu koudu wokomapunga, ngaashi pneumonia.

Exuli
Omalodu a pitilila ohaa eta opo exuli li kale li yadi omaadi (fatty liver). Nongee omunhu ota twikile noku nwa unene exuli otali mono oupyakadi, osho tashi dulu ku eta li ha longe vali nawa mokudinda oinima ya pumbwa ku ekelwashi okudya molutu. Cirhosis omukifi wexuli hau etwa kokunwa omalodu mahapu efimbo lile unene. Eepersenda dihapu dovanhu vena oCirhosis ohava kwatwa kokankela yexuli. Okwa didilikwa kutya oomeme ohava kwatwa unene koupyakadi woCirhosis okuyelekanifa nootate.

Edimo
Okunwa omalodu sha pitilila ohashi eta oipute mepunda, okudja ohonde nosho yoo okankela yepunda. Omalodu okwa kwatafana yoo noku tilyaana kwepunda (inflammation or gastritis), osho hashi eta opo oikulya iha dindwe naanaa nawa.

Ondabandaba
Omalodu mahapu ohaa eta odindo kondabandaba nosho yoo neembakiteli dakolonda ile di pike ondabandaba. Eshi ohashi vele neenghono. Omunhu ota kwatwa konghungo, oupyu nekanifo loshiviha, na otashi dulu okueta efyo.
Omandjandja
Omalodu otaa dulu oku eta oipute momandjandja. Okwa kwatakanifwa yoo nokankela yendjandja lakula (colon), nohaa eta yoo ekanifo leevitamine noitungifi oyo hai dindilwa moshitukulwa shomandjandja.

Eefiyo
Okunwa omalodu sha pitilila ohashi eta ohonde ya londa, oyo hai dulu oku eta enyonauko leefiyo (kidney failure)

Oludalo
Movalumenhu omalodu ohaa dulu okueta opo outa uha longe vali nawa, ile uha yambuke po vali nawa, nosho yoo oku ha mona ounona. Movakainhu namo omalodu mahapu otaa dulu oku eta oupyakadi woku ha mona ounona.

Omakipa
Omalodu ohaa etelele oupyakadi wokudinda oimongwa molutu, naashi ohashi eta nee opo omakipa akale inaa kola nawa (Osteoporosis).

Oshiviha sha pitilila
Omalodu oku na eeCalories dihapu. Eshi ohashi eta nee oshiviha shi ye pombada. Ashike ngee omunhu ohanhu ashike omalodu yee ita li, oshiviha otashi dulu yoo oku shuna pedu molwoipumbiwa yolutu imwe oo ili yoo moikulya.

Oshipa
Omalodu ohaa dindi omeva molutu, naashi otashi eta oshipa shi kale shihena omeva awana. Omifipa dohonde ohadi nenepala yoo, naashi ohashi eta opo oshipa shi tilyane.

Omalihumbato nomaliudo
Okunwa sha pitilila oha ku etelele okukanifa omikalo dokuyoolola ouwa nowii. Oshiholelwa ongaashi: Omunhu ngee okwa kolwa unene ota dulu okudimbwa okulongifa ongumi, osho tashi dulu okuetelela etandavelo lomikifi ngaashi HIV, hepatitis nosho tuu. Eshi otashi dulu yoo okuetelela omateelelo inaa longekidwa.

Oundjolowele wopamadilaadilo
Ovanhu vahapu otashi dulika tava dilaadila kutya okunwa omalodu ohaku kwafa opo va pite momaupyakadi elili nokulili, nosho yoo omaliudo a yooloka mokushunifa ostressa noutile pedu. Ashike omalodu a pitilila okwa kwatakanifwa nomaupyakadi mahapu opamadilaadilo mwa kwatelwa odepression, outile, okukufa omatokolo inaa tokoka nawa, elunduluko lomalihumbato omunhu nosho yoo omikifi dopamadilaadilo ngaashi eemhwengu [Schizophrenia]. Omalodu ohaa dulu yoo okuetelela elikufo lomwenyo. Omunhu ngee ohanhu sha pitilila iha kofa naanaa nawa vali, noha kwatwa yoo kostressa.
Okunwa eleongifo nai lomalodo ohali etele yoo omunhu opo a kale a dinika moshiwana, noha lii moshipala ekulo moilonga lomunhu, ngee omoilonga omo a kutwa, ile nomongeshefa nosho tuu.

EPULO LINENE OLO NEE OLO KUTYA OKUNWA SHA PITILILA ONGEENGE OMUNHU TA NU SHI FIKE PENI?
Ouyelele ou wa ulikwa apa oo umwe wo mo ma londwelo opaunongononi kombinga yomalodu. Ashike eshi sha yela osheshi kutya omalodu oovene otaa eta oupyakadi shidule okueta ouwa moiwana yetu.

Omalodu aa etu opashiwana inaa dindwa noku metwakutya okuna eepersenda ngaapi doAlcohol. Omalodu ngaashi Otombo, Epwaka, Ombike, Okatokele nosho tuu, ohaa longekidwa yoo sha yooloka kovanhu velili. Eshi otashi ti nee oshi djuu ngaho okuyandja ouyelele kombinga yomalodu aa etuvene. Eshi otashi pula opo pamwe umwe womovanafikola moNamibia vaye oshiima eshi moule opo ku talike kutya omalodu aa etuvene oena oupyakadi ile omauwa elipi po komalutu etu. Pomhito ei ohatu dulu okutya ashike; kashiimba nao okuna ngaho oupyakadi wafa womalodu opashingolo, onghee otuna oku a kotokela.

LEAVE A REPLY

Please enter your comment!
Please enter your name here