Geingos oshiholelwa shiwa kovanangeshefa

0
25

Eenghendabala okuxumifa komesho nokupendula po ongeshefa moshilongo ta di ningwa kOmunyekadi woshilongo Monica Geingos oda pumbwa oku pandulwa nokuhopaenenwa kovanangeshefa vakwao moshilongo.

Omafiku aa Geingos okwa patulula pambelewa Ehangano hali ifanwa One Economy Foundation olo tali kala hali pe ovo ve na omadilaadilo mawa okuninga eengeshefa dinini omikuli, ile ovanyasha veli mongeshefa va hala oku xumifa komesho eengeshefa davo.
Kakele kokuhapula oishoshela oyo itai ka wedelwa komikuli, One Economy itaka pula ovanangeshefa va tule omuvalu woshimaliwa shonhumba ile eliko lonhumba poshitaafula opo va pewe nawa omukuli, ashike otaku ka talika ashike ngeenge omunhu okuna ongeshefa ta i dulu shili okulonga nokushunifa po oshimaliwa shovanhu.

Oshinima osho sha kala efimbo noule oshiimbi osho sha kala noku ya moshipala ovalaule moshilongo opo va ha kule mongeshefa. Nomolwongeshefa oya kala ihe mo naanaa mokati kovanhu vetu, ovanhu vahapu ova kala va ningina mo menono loluhepo noku hena oilonga.
Omolwa omauwa oku mona omikuli, ovo twa tala ko onga vali veli pomaadi efimbo linya, ovali vena ouwa wokulimonena omikuli, nomolwa ouwa oo, ova dula oku tota eengeshefa, osho sha kwafa okuteya ongonga yoluhepo.

Ongonga yoluhepo mokati koiwana oyo yali konima yefiya, noyali ina i dula okumona omikuli va tote eengeshefa ota i dulu ashike oku teywa po ngeenge ava navo tava kwafelwa opo va tote eengeshefa ngaashi naanaa tashi ningwa kuGeingos.
Shamha ashike omunhu umwe mofamili okwa toto ongeshefa ta dulu oku kwafa ovaneumbo noku yandja oilonga tai yandje oiyemo komunhu nande umwe, nena oshipambu shinene shovanhu veli moluhepo osha dja mo. Shaashi omunhu ou ota dulu okufutila ovanhu ofikola, ota dulu oku yandja oilonga nokutaataa po oluhepo, kashi fi ashike mofamili yaye ndele nomeefamili davakwao yoo.
Oshinima nee eshi sha ningwa komunyekadi woshilongo osha pumbwa yoo oku landulwa kovanangeshefa ovaNamibia, opo va dule oku yambula po ongeshefa moshilongo ashishe.

Opena omikalo dihapu odo omunhu ta dulu oku longifa moku yambula po ongeshefa moshilongo. Opena shihapu osho ovanangeshefa vetu tava dulu oku ninga shihe fi ashike omakwafo opashimaliwa manene taa di mondjato yoye onga omunangeshefa munene.
Shotete, ovanangeshefa otava dulu oku li manga kumwe, noku tota po ehangano omo tava kala tava tula oshimaliwa shomwaaalu wonhumba osho tava kala nokushi longifa okukwafa ovanangeshefa vopetameko, ile eengudu dovanangeshefa vopetameko, nosho yo ovanhu ovo tave yapo nomadilaadilo mawa opangeshefa taa nyengana oku tulwa moilonga molwaashi ashike pehe na oshimaliwa.
Ovanhu vahapu ohava mono oshimaliwa shili nawa mongeshefa ashike luhapu omunhu kena ashike ehalo oku kamuka opo a kwafele omunyasha wonhumba emu wete eli penya ta kondjifa.

Kakele koshimaliwa ovaNamibia ova luvapala unene moku tukulilafana omayele ile eshiivo longeshefa. Omunhu keshe okwa hala ashike kukala ngeno oye ayeke ena ongeshefa yonhumba, ita dilaadila nande okunghonopaleka mukwao eli penya, a tukule ounongo waye opo oshilongo shixume komesho moshimhungu shonhumba shounangeshefa.

Okulonga noku yandja eshivo mongeshefa yonhumba ohashi kwafele shaashi nande owali una eshivo tete, ovo wa deula otave ke lilonga nokuku kwafa mongeshefa yoye eshi ounyuni notechologi tai ende ta ii komesho, oinima imwe ota shi dulika ukale uhe i udite ko ile ino i uda nande nande, ashike shaashi ouna ekwatafano liwa navakweni ovo uli mongeshefa navo, ito pitililwa po kosha.
Onga omunangeshefa alushe dimbulukwa kutya ouxuku vokuliyengela ihava di, koo okuyandja okutulika.

LEAVE A REPLY

Please enter your comment!
Please enter your name here