‘Kandi na mo sha meso lyaGwaTooma’ Uukule

0
3515

MARIA NAMUPALA

ONYATI –Silas Uukule ngoka eli omukalimo gomomukunda Onyati moshikandjo hogololo Onyaanya okwa pula edhina lye li yelekwe, sho omasiku gazi ko ali iithanwa kopolisi, molwaasho anuwa eetitha eso lyomukulupe Hileni GwaTooma Herman.
Otaku hokololwa omukulupe nguka amana oondjenda dhe sho iitsuwa owala a hulithila pombete, nonande ina uvika ta ngongota uuwehame nande. Otaku hokololwa kutya Uukule okuna okanona nomutekulu gwa GwaTooma ngoka, nopendji okwa kala ha kala megumbo moka.
Pakuhokolola kwe Uukule okwa yelitha kutya oshali shemu kumitha limwe lyomomasiku sho a dhengelwa ongodhi opo anuwa aka tsakanene na kansela goshikandjo hogololo Omuntele kopolisi, yo anuwa yaka kundathane oshinima sha simana.

“Molwaashoka mokuya kwandje kopolisi kandali nande nda nongela shoka tashi ithanitha ndje, onda katuka nziya, naasho ndaka thika popolisi mpoka onda adha kansela eli po naapolisi osho wo mwene gomukunda gwetu. Osha kumitha ndje mokuuva kutya nani GwaTooma sho a hulitha ongame nde eta eso lye, ashike shino kashina uushili,” Uukule ta ti.

Uukule okwa pula opo edhina lye li yelekwe kukansela Sacky Nangula, ta ti ye megumbo moka okwa kala owala ha yimo uuna i ithanwamo, nopoompito odhindji okwa kala hiithanwa a fale aakulupe koshipangelo nenge kopenzela.

Kansela Sacky Nangula mokuninga oonkundathana naye okwa koleke kutya opuna omapopyo kutya GwaTooma manga inaa hulitha okwa adhika a popya pomwana gunwe ta ti, otaka sa, oshoka ota liwa kUukule nomutekulu ngoka a valithwa ku Uukule.

Tati nakusa okwali eshi yeleke limwe lyomomasiku ta ti anuwa Uukule okwa tembukako kaandjawo nokwe ya a ninge egumbo lye lyafa omwaala, mono omo ha zi ye omo ha lala, nonande okuna mo owala okaana nomutekulu gomukulupe.
Uukule okwa ekelehi omapopyo ngoka ta ti ye megumbo moka ha mo ha zi, okuna mo owala okanona nomutekulu gomukulupe, ta ti okwa kala owala ha yi mo uuna iithanwa mo aka longe mo oshilonga nenge eke ya kwathele pamikalo dha yooloka.

Ta ti okwa hala nokuhalelela kansela ngoka pamwe naakwanezimo mboka ya kwatela oohapu ndhoka komeho ya yeleke edhina lye molwaashoka ngaashingeyi oteende tuulikwa nomilungu kaantu momahokololo kaage na uushili, ta ti iha kotha we nawa oshoka omwenyo gwe aluhe ogwa lindimana nokuli momaipulo omanene.
Ta gwedha po kutya oshinima shoka oshe eta woo nuutondwe pokati ke nookuume ke, aakwanezimo oshowo mboka aapopepi ye. Uukule ta gwedhapo kutya noponzapo yeso lyomukulupe opwa shangwa owala kutya okwasi eso lyopaunshitwe.

LEAVE A REPLY

Please enter your comment!
Please enter your name here