MOmangetti ya pulwa ya konge oonzo palwe

0
81

MARIA NAMUPALA

OSHANA SHOMHEDI –Aanafaalama yaMangetti ehulilo shiwike lya piti oya kumikwa ya konge oonzo dhilwe ndhoka tadhi ya kwathele mokufaalama kwawo.
Ekumiko ndika oye li pewa kOmupeha gomukwaniilwa gwaNdonga, Filemon Shuumbwa Nangolo poshigongi shaanafaalama sha ningilwa pofaalama yomunashipundi gwaanafaalama yaMangetti, Ismael Shailemo pOshana Shomhedi muuzilo wOndonga, kombinga hoka ta ku adhika oofaalama.
Okwa yelitha kutya oyendji yomaanafaalama mboka ka ye shi omikalo ndhoka taya vulu okwe etapo, opo ya kale tayi imonene oshimaliwa ya vule okupalutha iinamwenyo yawo mbyoka yena mofaalama dhawo.
Okwa ti olundji ngaashi oongombe ohadhi si komikithi molwaashoka kapuna omiti dhoku dhi panga.
Okwa pula aanafaalama ya kale noku landitha iimuna yawo poompito ndhoka dha pumbiwa, yo yi imonene oonzo dhilwe ndhoka taya vulu okumuna nokupalutha iimuna mbyoka yena, ta ti yamwe yomaanafaalama oyena iimuna oyindji nopethimbo lyoshikukuta nondjala ondhigu iimuna mbyoka ohayi hupu nuudhigu.
“Onkalo yoshikukuta ohayi thigi aanafaalama oyendji ya dhengwa pomitima, unene ya kanitha iimuna yawo, ashike ngele oya ningi etokolo ya landithe po yimwe, otashi keya pupalela konakuyiwa ya vule noku yi palutha nawa, shi vulithe owala wuna iimuna oyindji yo tayi si po kondjala noshikukuta,” Shuumbwa ta ti.
Ehangano lyoMangetti Farmers Association olya totwapo moomvula dhonale mewiliko lyomukwaniilwa Immanuel Kauluma Elifas, nelalakano lypokukaleka po omahala guulithilo osho wo oku ga gamenena po , go ga adhike komapipi tage keya ga vule okuga longitha.
Pethimbo ndika ehangano otali wilikwa komunashipundi Ismael Shailemo, poshigongi opwali woo pwa kalwa kiilyo yewiliko lyo Namibian Brahman Breeders (NBBS), mbyoka woo nayo yali ya gandja omauyelele kaanafaalama mboka yali ya gongala.
Omukwateli komeho gwehangno ndika lyo NBBS Mecki Schneider okwati uunafaalama oshinima sha simana miilongo oyindji, neliko lyoshilongo kehe ohali tungwa po uuna aanafaalama yena ompito ombwanawa neitulemo lyawo mokumuna osho wo okulonga iilonga yuunafaalama.
Shailemo okwa ti aanafaalama oya kutha mo noku likola mo uuyelele owundji moshigongi shoka, ta ti otaya kala haya ningi iigongi aluhe, yo ya pewe uuyelele komahangano ga yooloka moshilongo. Oshigongo osha kuthwa ombinga kaanafaalama tayi ihilile po 150 yaza koombinga adhihe dhoshilongo.
Ta ti shika otashi gandja woo ompito ombwanawa kaanafaalama, ya tseye omikalo noonzo ndhoka yena okulongitha, yi imonene iiyemo yo ya kaleke po oofaalama dhawo, te ya kumike ya longe muukumwe yo ya kale aluhe taya pukululathana.

.

LEAVE A REPLY

Please enter your comment!
Please enter your name here