Okahao Veterans Fc ya manitha omailongekidho nesindano

0
51

SHIPI ELAGO

OKAHAO-Osipana yaadhani aakulu yokOkahao oya li ya manitha omaidheulo gayo nesindano ehuliloshiwike lya piti, omanga aadhani mbaka inaa ki idhenga ondjila oku ka tsakanena nomanyakwa omakulu muudhano mboka ta wu tameke ehuliloshiwike ndika.
Okahao Fc oya li yi ikwata no Zim Legends ehuliloshiwike lya zi ko okwi iyupika opo ya ka tale ngele genongo ota ga fe gongombe mokwi ilongekidhila uudhano mboka ta wu ka kala owo wotango modoolopa yaKahao.
Okahao Fc oka li ka dhenge aamati yoko Zimbabwe nookola 3-2 muudhano mboka wa li ita wu nuwa meya, wa li wa dhanenwa moshilandopangelo.
Moonkundathana naKundana gumwe gwomaapopiliko yosipana ndjika Iithete Amukuyu okwa holola kutya oya manga ya pama oku za koVenduka onkene otaa indile oshigwana shomOkahao niitopolwa yopuushiinda opo ya ka paluthe omeho pokapale koseko ya Shaanika Nashilongo.
“Uudhano mboka wa kala wa tegelelwa koyendji ngashingeyi owa thika nee onkene ileni mu tale omanyakwa geni omakulu ne mu ka nyanyukilwe pamwe nago,” Iithete a ti.
Uudhano mbuka ota wu kuthwombinga kaadhani aakulu nelalakano oku yambidhidha osipana yOkahao FC.
Uudhano owa tegelelwa wu ka tameka Olyomakaya moka kwa tegelelwa oosipana omulongo dhaadhani aakulu opo dhi ka kuthe ombinga.
Otonamende ndjika oya lukilwa omusamane “Man of Action” ano tatekulu Eddy Wilbard ngoka oye a putudha aadhani oyendji mbaka aakulu nosipana ye yoCalifornia mOkahao onkene koyendji oshi li esindano enene oshoka uudhano modoolopa ndjika owa shuna monima naandjika oyo otonamende onene ta yi ningwa modoolopa ndjika uule woomimvo omulongo.
Onkene oondjika adhihe okOnekuni dha taalela ehuliloshiwike ndika

LEAVE A REPLY

Please enter your comment!
Please enter your name here