Oompango oompe dhaGIPF kombinga yomagumbo

0
260

DESIE HEITA

Windhoek-Oshiketha shOpenzela yaaniilonga mepangelo nenge GIPF osha eta po omukalo omupe ngoka tashi vulika ogo gwotango moshilongo nelalakano okutunga omagumbo kondando yi shi okwi idhidhimikilwa.

Pamukalo nguka GIPF ota landa evi koomuni yiilando ya yooloka moshilongo, ye ta longekidha omahala ngoka moku tula po omayakulo agehe gopamuni, opo ihe konima ye ote ga landitha po kaatungi yomagumbo opo mbaka ya tunge po omagumbo gena oondando oohwepo.
Ondjila nenge omukalo ngoka GIPF ta longitha ogo, okulanda evi komalelo giilando nenge okuli landa kaanafaalama mboka oyo ooyene yalyo, te li longekidha nawa ye ta pitike aatungi yomatungo nomaliko opo ya tunge po omagumbo.
Omunambelewa Omukuluntupitithi gwaGIPF, David Nuyoma okwa ti nando ehangano lye olina oshinakugwanithwa shopankalathano pamukalo nguka , shika itashi ti kutya lyo ota li yi mo ashike omolwo onkalo yopankalathano ndele ota li pungula oshimaliwa moshikondo shomagumbo. Shika GIPF ote shi ningi eshi talela meho lyongeshefa nonando ndjika otayi ke eta uuwaanawa wopankalathano, moka ehangano tali mono wo iiyemo mbyoka yili uvitithe wo uugumbo osho Nuyoma a popi moonkundathana dha mbwalangandja ndhoka ye a ningi naNew Era oshifo oshimwayina naKundana.

Ehalelo lyetu oondika kutya molwashoka otse twa landa evi yene kondando ombwaanawa, nena uuwanawa mbuka otwa hala wu monike kwaamboka taya landa omagumbo ngoka ga tungwa pevi ndyoka tse twa landa” Nuyoma a popi nomuthindo.
“Otashi ka kala iilonga iidhigu. Tse otu na oku hanagula po omaihumbato momaalaka yomagumbo ngoka ga ninga ondjigilile nopau shili wowene tatu kambadhala okukongela aantu yetu uuwanawa, no inaatu kanitha iimaliwa moku ninga ngaaka” osho a ulike.
Omuwiliki gwaGIPF okwa ti shoka yi ilongo methimbo efupi ndyoka ya tameke okuopaleka evi opo pu tungwe omagumbo ooshika kutya , omagumbo ohaga tulwa ondando yi li pombanda unene molwashoka evi ohali landwa okuza komuntu omutitatu nenge mboka haya landitha evi kondando ya ndatupalekwa naandjoka yo ye li landele.

“ Oshinima shaa tungi yomagumbo taya gwedha ko ooperesenda 100 kondando yevi, kutse itashi ka longa. Tse hasho tu lile mo mongeshefa ndjika. Tse otu li mo okugandja eyakulo ndyoka lya pumbiwa momahupilo goshilongo shetu.”osho a ti.
“Otu na okukala tu shishi nawa kutya otashi tu pula shi thike peni,[unene sho twa tseya ]kutya ka shi na ombiliha okutunga omagumbo’ ihe oshina ondilo’.
Nuyoma nando ongawo okwa ti mokulonga pamwe naatungi yomaliko ,yo oya tseya kutya omwaalu gwopevi ngoka hagu longithwa okutunga egumbo lyoondunda ndatu ogu thike peni. Okwa ti ishewe oonkundathana dhokuyele pokati komulandi gwegumbo nomutungi gwalyo ohashi pitika opo ondando yegumbo yi kale ohwepo.

“ Eeno otwe shi pondola okushunitha pevi oondando” okulonga pamukalo nguka.
Sigo oompaka oshiketha shoopenzela shika osha landa evi okuza komawiliko goodoolopa , nenge kaanafaalama, nomagumbo ngoka ga tungwa pehala ndika ngaashi mOmbaye oga pwa nale no ga landwa po kaaniilonga mepangelo osho wo koohandimwe mboka ya pumbwa omalukalwa.
GIPF okwa landa evi no kwi ipyakidhila okuli opaleka pamukalo nguka moodoolopa ngaashi Okahandja, Swakopmund, Otavi, Omuthiya osho wo etungo lyomagumbo pomukunda Osona muumbugantu wOkahandja , iilonga yaa ngoka ya li ye egululwa pambelewa kOmuperesidente Hage Geingob omvogu.

Pamayalulo gaGIPF konyala ooperesenda ashike 30 dhaaniilonga yepangelo ya tengenekwa yeli pomayovi 100 000 oyo ye na omagumbo gokolela. Shika otashi ti omwaalu omunene gwaaniilonga mepangelo ogwa pumbwa omalukalwa gokolela.
Nuyoma okwa ti etokolo lyoshiketha okupungula momagumbo olya nwethwamo ke igidho lyomathaneko goHarambee kutya osha pumbiwa okutungwa omagumbo 20 000 omape osho wo okuopaleka omahala mpoka tapa tungwa omagumbo omape geli 26 00 okuthika pehulilo lyondungethaneko ndjika yo HPP.
‘Otatu ti otwa hala oku longa po shomupondo oku yamukula eshongo ndyoka Omuperesidende a ga ndja momahupilo goshilongo, no twa hala eyamukulo ewaanawa.

Oshiwanawa komahupilo goshilongo shetu, noshoopalela aantu yetu osho wo oshiketha nehangano lyetu” Nuyoma a ulike ngaaka.
Okwa gandja oshiholelwa shokOmbaye a ti moka yo oya mona mo nale iiyemo iiwanawa miimaliwa mbyoka yo ya longitha, naashika oshe ya pe ompito opo ya longithe oshimaliwa shoka miilonga yehumitho komeho pOsona.Pamukalo nguka oya gandja ompito ombwaanawa kaakwiita opo ya vule okwiimonena omagumbo koondando dhili nawa okuyeleka noondando ndhoka dhili momahupilo ngashingeyi.
Piilonga yehumithokomeho pOsona GIPF okwa tala kethano enene kokutya, monakuyiwa yokokule pehala mpoka otapa ka tungwa olukanda olupe ndoka talu kala nomagumbo konyala ge li lwopomayovi 10 000.
‘Ihe nando ongaaka otatu ka kala neshongo. Owu na aatungi naa eti po yomaliko nenge yomagumbo mboka ya landa evi[ ndele ehalelo lyetu oondika kutya mbaka ya gandje uuwanawa wondando ohwepo kooyene yomagumbo ngaka. Ndyoka olyo edhiladhilo tu na nolyo ehalelo lyetu.” Osho a fatulula.

Nuyoma okwa ti GIPF ota konakona ondungedhiladhilo oku gandja ompito kiilyo ye opo yi longithe oshitopolwa shimwe shopenzela yayo okutunga omagumbo komikunda nenge pondje yoodolopa.
Nando oveta kombinga yoshinima shika oya pita, GIPF okuna okusoshimpwiyu kutya omulandu ngoka itagu ehameke omauwanawa gaamboka ta ya yi mopenzela uuna mboka ya thiki pehulilo lyomimvo dhiilonga yawo.
“Oshinakugwanithwa shoshiketha okutala kutya mboka ye li moshipundi shevululuko oye li taya mono iiyemo yi li nawa okuza koshiketha shawo shoopenzela omwedhi kehe”
Onkene oshiketha otashi longo nuukeka opo shi se oshimpwiyu kutya nonando iilyo oya longitha iipambu yimwe yopenzela okutunga omagumbo komikunda, mbika otayi kala wo ya thiga po omwaalu guli nawa ngoka tagu kwatha iilyo mbika yi mwenye nawa manga yi li moshipundi shevululuko.

LEAVE A REPLY

Please enter your comment!
Please enter your name here