Ounona moKavango otava holoka momhangu molwooimbuluma

0
37

OHN MUYAMBA

Rundu- Omafiku aa, ounona vahapu moRundu nomudingonoko waRundu ova kala nokuholoka momhangulilo omolwa oimbuluma ya yooloka oyo va kala tava ningi.
Oshimbuluma shitalala osho sho sha longwa kokamatyona keedula 17 komolukanda laKehemu moRundu, eshi vati kambofaula nokudipaa neembele kaume kako omunamido 21, Negoli Vaino Ndeshipanda onguloshi yEtine loshivike shadjako keshi ningila molukanda lavo. Kamatyona ou okwa kwatelwe po mEtitano ladja ko eshi eli yandja yeemwene kopolifi.
Omutamanekwa ou wedina Usuvi Lukas Ngunda, okwa holoka nale komesho yomupanguli Helen Oliaya. Steven Haradoeb oye a li a kalela po epangelo, noshibofa osha undulilwa komafiku 26 Juni opo opolifi i pewe omhito i konaakone oshimbuluma eshi.
Oshikulumuna shikwao sha ningwa kokaana moRundu, osha longwa momafiku 27 Malitsa, omo okaana keedula 14 ka dipaa kamwaina keedula 17 nombele. Otaku hokololwa ounona ava vomolukanda laSauyemwa moRundu vali tava kondjele ongodi ya ina yopeke, eshi aka ka nini ka kufa ombele nokutwa omukulu wako.

MuFebruali neudo, okaana kokakadona keli moGrade 10 kofikola Rukonga Vision School, oka tulwa moipandeko eshi ka ekela shi okaana mokaminola (mokandama). Otaku hokololwa okaana aka ka wa edimo ndele okaana kako keka ekela mokaminola keli konima yofikola. Mupya munene, ovanafikola vakwao oveka mona novalopotela omunailongo wokuwapaleka mofikola efiku la landula ko. Okaana okwa kwatwa po nokutwalwa koshipangelo.

“Okaana aka ina tu ka kwata po shaashi ka wa edimo. Okudja edimo kakushi okunyona oveta. Ashike eshi ka ninga osho sheka eta opo ka kwatwe po. Okali kena oku lopotela opolifi ndele, haku ekela shi okaana ngaashi ka ninga,” osho Omukonaakoni a kula woimbuluma moKavango yokOushilo Deputy Commissioner Willie Bampton a ti.

Bampton okwa yelifa kutya, okaana aka kokakadona ina ka tulwa modolongo, ashike oka efiwa ka shune kofikola. Epeko loshimbuluma shako ola tuminwa kombelewa yomupanguli-ndjai opo a tokole osho shina okuningwa po, na opo nee taka ka holoka momhangulilo.
Natango exuliloshivike ladjako, okamatyona komido 15, oka kwatwa po shinanasha nekwatonghonga eshi vati kaya moixulo nakamwaina keedula 12 keenghono. Eshi osha ningilwa molukanda laNdama moRundu. Ounona ava ova dalwa kuxe imwe ashike oo ina ova yooloka nova kala hava di meumbo naxe naina yomufekelwa. Omufekelwa ou ina holoka natango momhangu.

LEAVE A REPLY

Please enter your comment!
Please enter your name here