Ya indile epangelo li ye oonyala mOndonga

0
142

MARIA NAMUPALA

ONIIPA – Aakwashigwana yamwe yomoNdonga oya pula epangelo li ye mo olunyala moshikumungu sho kwaa uvathana shoka tashi fofodholwa melelo lyoshilongo shOndonga. Oshiwike shika aaNdonga mboka oya li yuunganeke omunyanyo omolwoshinima shoka.
Okwa konekwa pwa kala omaipumomumwe momalenga osho wo aakwashigwana melelo lyopamuthigululwakalo lyaNdonga, shika oshe eta etopoko nokuyona ombili.

Omasiku ga ziko omwa kala anuwa ta mu ningwa iigongi mbyoka tayi popi omatopoko ngoka unene mokati komalenga, kombelewa yelelo lyOndonga, nokwa kala taku hokolololwa elelo lyOndonga lya topoka moongundu mbali shono konyala she eta ehilathano mokati komalenga osho wo aakwashigwana yoyene. Omolwoshikumungu shika ongundu yimwe yaakwashigwana taya popile aawa yOndonga oya nyanya Omaandaha, etayi fala omukanda nyenyeto gwawo poombelewa dhoshikandjohogololo Oniipa ngono gwa taambwa ko ku Ngoloneya goshitopolwa Oshikoto Henock Kankoshi. Omukanda nyenyeto ngoka gwa leshwa ku mwene gomukunda Onandjamba Jerry Kambala, ogwa pula epangelo mekwatelokomeho lya Ngoloneya Kankoshi li idhope mo mbala moshikumungu shoka sho hauhau yAandonga, po pu adhike ekandule po lyomukundu nguka nziya.
“Otwa hala opo omalenga ngoka haga longo mombelewa yoshilongo ga kuthwe mo miilonga nziya molwaashoka okwa konekwa gamwe taga piyaganeke ombili yoshilongo shOndonga, otwa hala epangelo li ye mo olunyala lyo li longe shi ikwatelela paveta nopampango yoshilongo,” ta ya popi ngaaka.

Oshinima shino osheya woo sho konima kwa lopotwa omunyekadhi goshilongo shOndonga Kuku Secilia Elifas, kuku Ester Nepando Elenga enene ndyoka lya pingene po Wilbard Lidker ngoka a kuthwa miilonga oomwedhi dha yi, osho wo Oscar Sheehama, ya yakula oombaapila ya falwa kompangu kElelelo lyopamuthigululwakalo.

Ombinga yimwe yaakwashigwana oya holola uukwawo wanankali ta yi popi kutya efalo kompangu lyaantu mboka ka lili pauyuuki, yo naya popilwe moshikumungu shika tashi eta omatopoko nokwaahena mbili mOndonga.
Momukanda ngoka oya pula natango omalenga niilyo yelelo lyombelewa yoshilongo shOndonga ya kuthwe oonkondo manga, opo shi gandje ompito ya manguluka yomakonakono gomuule, ko ku talike kutya omudhi gombepo ndjoka ogweya mo ngiini mOndonga.
Aawa taya holola kutya yo oya hala okutyapula, nokuya mondjila yawo yUuwa nUukwaniilwa pwaana omapiyaganeko, molwaashoka ngashingeyi ka yena oonkondo dhoku tyasha, ayihe oyili owala miikaha yombelewa yoshilongo.
Pethimbo ta taambako omukanda ngoka ngoloneya Kankoshi okwa ti omukanda ogwa thika pethimbo ewanawa, no ta ye ke gu tula poshitaafula nomitse ominene ye gu kundathane, yo taya tala kutya epangelo ota li yimo olunyala ngiini nziya, sho oshilongo shi kale nombili nelandulathano.

LEAVE A REPLY

Please enter your comment!
Please enter your name here