A yi moshipundi shevululuko nolupandu

0
65

Komutoolinkundana
________________________

Ondangwa -Ehangano lyIilonga yOondhila lyopashigwana nenge Air Namibia olya laleke gumwe gwomaaniilonga yalyo, ya longa ethimbo ele. Air Namibia okwa topoka na Martin Andreas ngoka a tamekele iilonga mehangano ndika, omanga lyali hali ithanwa nedhina lilwe osho wo oshilongo shali hashi ithanwa wo nedhina lya yooloka kundyoka lyonena.

Andreas ngoka a yi moshipundi shevululuko pehulilo lyomwedhi gwayi okwa li a tameke iilonga mehangano ndika momumvo 1978.
“Sho nda tameke iilonga mo-1978, ehangano olya li hali ithanwa South West Air, nokonima olya lukululwa noku ithanwa Namib Air omvo ogo tuu ngoka. Konima yemanguluko lyaNamibia mo-1990 Namib Air okwa lukululwa ishewe nokuninga Air Namibia” Andreas a ti.

Pethimbo a tameke iilonga moAir Namibia, Andreas okwa li ashike ena omimv 21, nokwa li a pewa oshinakugwanithwa shoku nwetha oondhila omahooli pokapale kaEros moVenduka. Miilonga mbika okwa li ena oshinakugwanithwa shoku tala kutya omahooli ngoka taga nunwa koondhila ogongushu ni ishewe oga yela.

‘Onda li ndi na okusoshimpwiyu kutya momahooli ka muna omeya nenge mugo ka muna ekako nando olya sha, omanga ngoka inaaga nwethwa oondhila. Uuna omahooli goondhila ga thiki pokapale ogena manga okuthikama okathimbo omanga inaa ga nwethwa ondhila. Shika ohashi ningwa opo iiyagaya nekako ndyoka lili mo tashi vulika opo li ye kohi yomahooli.Go omahooli ngoka ga yela nogo opala taga kala kombanda” osho Andreas a fatulula.

Andreas okwa yi moshipundi shevululuko a zi miilonga yewiliko lyosasiona yaAir Namibia pokapale koondhila pOndangwa. Oshali mo-1994 sho Andreas a li a ulikwa ongo oye Omunambelewa omukuluntu ta wilike nokukondolola iilonga ayihe yaAir Namibia posasiona kuumbangalantu. Okwa li omuwiliki pondondo ndjoka okuza kOshakati hoka oko kwali kuna okapale koondhila tango noku tembukila lwanima kOndangwa .

Ongomunambelewa ye okwa li ena oshimpwiyu oku mona kutya iilonga ayihe posasiona ya aAir Namibia moNdangwa otayi ende ngaashi shina okukala. Iilonga ye yesiku kehe pOndangwa oya li yo kusoshimpwiyu kutya ashihe osha longwa nawa, mwa kwatelwa etuko lyoondhila okuza pokapale , tadhi shi ningi wo pethimbo lyuuthwa

Omumvo 1981 Andreas okwa lundululilwa kongalashe yoondhila pokapale kaEros, hoka a longo ongomukwatheli inginia. Iinakugwanithwa ye oya li okupangela nokukaleka ooingina dhooshihwalala tadhi longo nawa osho wo okulundulula omataiyela gooshihwalala nokungilisha oobeelinga dhoondhila dhooshihwalala. Okwa kala miilonga mbika uule womimvo mbali omanga inaa shunwa kiilonga ye iikulu mbyoka yokunwetha oondhila omahooli.

Andreas okwa li wo ena oshinakugwanithwa shokudheula noku ulukila aaniilonga aape poshitopolwa she shokunwetha omahooli unene tuu nkene yena okutala ongushu yomahooli goondhila omanga inaa ya nwetha oondhila. Okwa kala ha nwetha oondhila okuza mo-1983 sigo okuyele momumvo 1987.

Oshinenima shimwe shomiilonga ye shoka ta kala nokudhimbulukwa ,oosho a li u ulikwa a ninge Omeninga onkuluntu yosasiona yokunwetha oondhila omahooli mokati kaKotoba 1987.

Iilonga mbika oye eta mpoka kutya okwa li ena okulundulukila kOshakati moshitopolwa Oshana.
“Onda li nda nyanyukilwa iilonga mbika , molwashoka onda li ndi inekelelwa iinakugwanithwa oyindji mbyoka ya simana miilonga yokuwilika omatuko goondhila gopashigwana. Oshikwawo okutuminwa kOshakati okwa li ishewe okuwanawa molwashoka onda li nde etwa popepi nefamilia nenge naanegumbo lyandje” osho ye a popi uuvite nawa.

Sho a hokolola olweendo lwomimvo 39 miilonga yaAir Namibia, Andreas okwa popi kombinga yomalunduluko ngoka ga ningwa miilonga yomatuko goondhila dhopashigwana a ti: “Onda mono nkene Air Namibia a ende nokukoka okuza kehangano eshona noku ninga ehangano enene nolili nawa omimvo sho dhe ende tadhi piti po.”osho a hokolola.

‘Pomimvo dhopetameko Air Namibia okwa li ashike ena oondhila dhili ne , ondhila yimwe yiipundi itano, ondhila yimwe yiipundi ihetatu, yimwe yiipundi 22 nondhila onene yiipundi 55.Nena Air Namibia okuna oondhila adhihe kumwe omulongo ndhoka hadhi tuka meni nopondje yoshilongo” osho a dhimbulukwa.

Omunongompango Mandi Samson, Omuwilikipitithi ta kwathele moAir Nambia okwa popi Andreas a ti oye omuwiliki omwiifupipiki ngoka ha yakula aayakulwa ye, neifupipiko , neigandjo osho wo neitulemo.

“Okulonga kwe nawa nawa, omanga a tala onkalo ayihe osho shimwe shuuyamba mboka ye etu thigile.Eilongekidho lye okulonga sha pitilila opo oshilonga shi manithwe osha ulike eitulemo lye, okwa adha oshilalakanenwa shehangano.” Osho a ti.
Pethimbo lyiilonga ye moAir Namibia, Andreas okwi ilikolele uunongo nontseyo oyindji moshimpungu shomatuko mombepo okupitila momadheulo agehe osho wo mokulongwa . Okwa longwa okutseya iilonga mokapale koondhila.

“Uule womimvo 39 nda longele Air Namibia onde enda momadheulo ga yooloka oku za tuu nkene okapale haka longwa nako, okulonga niilonga yopevi pokapale, okulondeka iinima moondhila osho wo omadheulo gamwe ge na sha nekwatelokomeho.”
“Nonando onda nkondopekwa pethimbo nda kala miilonga mbika , ngame ondi itaala kutya uuyelele owa pumbwa okutaambathanwa opo iilonga yi kale tayi ende nawa. Pamukalo nguka ngame onde shi pondola okugandja uunongo mboka ndina kaaniilonga ooyakwetu mboka ya zi konima yandje.’ osho a ti.

Andreas okwa ti ota kala aluhe noku pandula Air Namibia sho ehangano ndika lya kala oshitopolwa shonkalamwenyo ye.
“Nonando iilonga ya kala oyo oshitopolwa oshinene shonkalamwenyo ye okwa pandula sho ndika lye mu nkondopeke opo a vule okulonga iinakugwanithwa ye mombepo yeinekelo. Iilonga mbika oya kwathele ndje wo opo ndi vule okupalutha efamilia lyandje esiku kehe, osho wo oya ningi ndje ndi kale omuntu omupe.
“Otandi ka yuulukwa efamilia lyandje lyaAir Namibia unene tuu aaniilonga yopokapale kaNdangwa, onda tungu uukuume uule womimvo adhihe.Ihe kombanda yaa ayihe otandi ka yuulukwa okutuka po noku lambela okuwanawa koondhila dha Namibia.

LEAVE A REPLY

Please enter your comment!
Please enter your name here