Aatue ya pumbwa oodokumente dhopashigwana

0
29

Loide Jason

EENAWA-Ofamili yAatue ndjoka opo yi itsuwa momukunda Eenawa moshikandjohogololo shaRuacana moshitopolwa Omusati oya indile epangelo opo li yi kwathe mbala ngaashi ta shi vulika yi monenwe oombapila dhuuthemba wopashigwana.
Oya ningi eindilo ndika taya ti epangelo nali ya kwathe oku ya kongela uuyelele opo ya vule okupewa omikanda dhuukwashigwana waNamibia yo ya kale taya mono omauwanawa ngoka ga nuninwa aantu mboka ya kala konima yeyokomeho ethimbo ele.
Senia Endjala Omunambelewa miilonga yehumithokomeho mOmbelewa yOmupevi Peresindente okwa ti omakonakono kombinga yuukwashigwana ohaga kutha ethimbo. Nomolwashika aantu mbaka otaya mono iihuna nonando eigidho lyOmuperesidente otali ti hamuntu ta thigala po.
Okwa ti ombelewa yawo otayi longo neitulemo opo yi monene aantu mbaka oodokumente dha pumbiwa mbala ngaashi tashi vulika.

“Okwaana omikanda dhopashigwana ndhoka odho ya pumbwa opo ya mone omayakulo okuza epangelo oshi li eshongo limwe enene mokati komashongo ngoka ge ya taalela” osho a ti.
Okwa kwashilipaleke kutya ombelewa yawo ota yi ya kongele olukalwa talu kalelele molwashoka yo oya pewa ehala lyokukala okuza kelelo lyopamuthigululwakalo.

Endjala okwa ulike oku uva nayi kwe sho ayehe mboka taya vulu okukwatha monkalo ndjika ye ethela po ashike oombelewa ndhoka hadhi kwatha aantu mboka ya kala ethimbo ele konima yesiga. Omvogu ewiliko lyoshikandjohogololo shaRuacana olya li lya tseyithilwa ekalepo lyofamili ndjika yaana omishangwa dhopashigwana naandika olya li lya kwathele opo mbaka ya vule okupewa omikanda ndhoka.
Kundana okwa uvu kutya Ombelewa yOmuperesidente moshitopolwa shAantu mboka ye li konima yesiga mOmusati oya li ya kwatha opo mwene gwegumbo lyaantu mbaka a mone okamutse , nongashingeyi oha taamba openzela yaakokele ndjoka tayi kwatha opo nguka a sile egumbo lye oshimpwiyu.

Egumbo ndika olina aanegumbo omulongo nayaali mwa kwatelwa aanona , ayehe mbaka ohaya lala owala puuyelele pwaana ondunda momukunda gwawo Eenawa.

Nuumvo pethimbo lyomvula egumbo ndika olya li hali mono iihuna mokulokwa , olya ka kwathwa ashike okutulilwa po otenda okuza kombelewa ya kansela gwoshikandjohogololo Ruacana.Otenda ndjoka moka aanegumbo mbaka ye edhililwa oye li mo ashike pakathimbo.
Ihe aanambelewa oya ti ndjika otayi ka kuthwa ko mbala molwashoka yo inaya pitikwa okugandja otenda moonkalo ngaashi ndjika yaantu ye na egumbo lyawo lya teka po. Ihe yo ohaya gandja ashike ootenda kwaamboka ye li monkalo yo pa mpumbwe.
Sackaria Sheetekela, mwene gwegumbo ndyoka okwa ti pamuthigululwkalo gwawo aantu yoludhi lwawo ihaya kala ethimbo ele pehala limwe oshoka oya kala noku tembuka okuza pehala limwe okuya kehala ekwawo moshikandjohogololo shawo shoka.

Sheetekela okuna aanona ya heyali , okuli naanona yaali omanga yalwe oya ya kaakwawo kOkaluheke moAngola.
“Shono twa mono kutya okuna oluteni moshitopolwa otwa li twa tokola opo tu hedhe popepi nomagumbo, opo tu vule okukonga iikulya mokuyi longela” Sheetekela a ti.

Sheetekela okwa pandula unene epangelo sho lye ya zimine noku ya pa iikulya yoshikukuta.
Pethimbo Kundana a thiki pegumbo lyawo okwa adha mbaka ya kuutumba potenda yawo taya hokololelathana omahokololo omanga aanona ya li taya dhana pomudhingoloko.

Popepi opwa li ondunda onkulu ya kumbwa nomwiidhi ya gwila pevi. Ondunda ndjika oyo yi li egumbo lyawo moka yo ayehe haya lala.
Pethimbo ndika egumbo ndika olya kuna omahangu nosho wo iikunwa yilwe mepya lyawo na oya tegelela eteyo eewaanawa.
Sheetekela okwa hokololele Kundana kutya yo oya longo epya oshoka oya li ya lombwelwa kaanambelewa ye shi ninge unene tuu sho yo ye li pevi ewaanawa. “Otwa tegamena eteyo ewaanawa molwashoka otwa longa noku kuna iimeno yetu ngaashi tayi monika ya ziza nawa ngaaka” osho Sheetekela a ulike.

Okwa ti otashi kala oshiwanawa ngele aanegumbo ayehe oya monenwa oodokumende unene tuu aanona mboka taya ka tameka osikola.
Omutekulu gwe gumwe gwomukiintu omunamimvo 26 na yina yaanona yane , oye gumwe gwaamboka yaana oodokumente dhopashigwana mwakwatelwa noyana mboka, nonando oohe yaanona mbaka oyo aakwashigwana yaNamibia.

LEAVE A REPLY

Please enter your comment!
Please enter your name here