Moshitila Mwa Z’Ondjupa

0
157

Onkalamwenyo yaakuluntu yandje, uukwatya wawo, nonkene ye tu putudha

Okuza ngaa sho nda putuka, nda ningi oondunge onda dhimbulula kutya tate okwa li omulumentu ependa, onkulungu, omunankondo e hole iilonga yomepya noyokutakamitha iimuna. Aamwameme oyendji kaya li ye hole po pegumbo lyatate, ndele omolwiilonga ashike. Iilonga oya kala nduno haye yi fadhuka po haya yi ya ka menekele komagumbo goohekulu nogooyinagona. Mootate, kamwa li iilonga yaalumentu nenge yaakiintu ashike. Iilonga shaa ya holoka megumbo, kutya nduno oyoludhi luni, amuhe otamu ke yi longa ashike.
Otandi dhimbulukwa oshinima shimwe, otwa li hatu tsu oongaya nokuhanga omalovu. Ongaya ngele oya pumbwa okutsuwa, haakiintu ayeke ye na oku yi tsa, atuhe oko twa li hatu yi koshini tu ke yi tse. Shampa twe yi ndongola, tse otatu yi koshigunda tu ka piithe mo oongombe, tu ka lithe.

Mootate, kasha li nando oshidhila kaamati nege kaakadhona okulonga pelugo, poshini nenge kuusita wiimuna. Pethimbo lyoondima, uuna aantu ya zimbuka, iimuna ohayi ka hugilwa. Konima yaashoka, mboka yena olufo lwokuusita taa ka litha, naamboka ye na olufo lwokukala pegumbo, taya tsikile niilonga yomegumbo. Nando onga wo tate oye a li ha tokola kutya aakadhona nima nanima oyo naa ye koongombe, omanga aamati taa kala mepya, nenge a tye aamati oyo naa takamithe egumbo, manga aakadhona taa yi koongombe. Kakwa li kuna ondjoolola kutya, oongombe odhaalumentu nege odhaakiintu.

Mokuti otwa li hatu ka komangela omiti pamwe naakiintu. Shaashi katwa li tu na omatemba nenge iihauto, otwa li hatu humbata iiti komapepe okuza mokuti pamwe naakulukadhi, osho wo naanona ayehe yomegumbo noku yi eta megumbo.
Pethimbo lyokulima mepya, mba ya li haa kala komeho ya thiga po yakwawo miimpungu, ano ya tsitha ko oonku dhawo, oyo ya li haya ka lya tango omwiha. Mboka mwa thigilwa omashila kuyakweni, ohamu yi mu ka lye ngele mwa tsitha ko oonku dheni, ndhoka mwa tendelwa. Kape na ngoka to yi kiikulya nandenande, wu na onku inoo yi tsitha ko nenge inaayi polwa. Oondjambi dhokulima maandjetu odha li hadhi kala mo owala omalupita, ihe puushiinda odha li hadhi kala po.Maandjetu omwa kala aantu oyendji, onkene oondjambi kadha li naanaa dha pumbiwa.

Nandi shi yeleke ngeyi kutya, tate ye mwene ka li nando onganga ashike onda koneke kutya, okwa li e na euvoko lya kola miidhila nomoohedhinkalelo, ndhoka Aawambo ye dhi longitha, opo ya vulikithe oshigwana, shi kale shi na elandulathano noonkalelo dhopantu. Okwa li wo e na euvoko lya kola kutya, oshipwe omukiintu e li metegelelo a longe iilonga iidhigu.
Okwa li natango e na euvoko kutya omeya ihaga tilwahi uusiku, nenge megumbo ihamu kokololwa ombiga yomudhilo uusiku.Maandjetu , oongombe dhatate ihadhi lyatwa komakondo, mo kamwa li hamu etelelwa okano, nenge wu ye mo taku tiwa to lyata shoombwa. Uukwatya neputudho ndika lyaakuluntu yetu, olye tu keelele muukakombo ilitha kanzi igalula, nomokuya omahiyanambidhi. Sho nda ningi omayulu, onda koneke kutya tate nameme oya li ta ye tu gamene, opo kaatu ye omukungu nomeya.

Meme naye wo okwa li amatha ngeyamayama miinima oyindji. Uuna ndoka wa adha a kutha ekuya ta ke, nomulumentu ite mu adha.Oshiholelwa osho shoka kutya, meme sho a ka ninga okagumbo ke konima sho ya topoka natate, ina ya mepya lya kokolwa nale, ihe okwa ka kokola omutunda go gwenegwene. Okwa tameke okufika omiti oondilika.Omiti ndhoka dha gu po komulilo, aanegumbo lye oye ya nduno oku dhi kokola iihwa noku yi fala kongumbu, yo taya kutha ko iiti mbi yu ukilila yokudhika egumbo. Epya lyameme ndyono, olya li li vule nomapya gaalumentu mboka ya li aashiinda natse. Meme moku ka ninga okagumbo ke, okwa li owala a landulwa kaamwameme mba;Paulina, Mikael, Uugwanga naAnna, ngame onda li nda thigala pootate. Kombinga ishewe yiilonga yomepya, aaye, meme etango otali mu zile eli mepya, ndele tali mu ninginine mo.Shampa wa adha a zi mo mepya shila okwa yi kiimuna.Sho a ningi egumbo lye, okwe li ningi ena iikombo noongombe.. Aamwameme yooUugwanga nooAnna, oya ningi aasita yiimuna mbyoka.

Omukulugwonale okwa tumbulile ta ti: Ina putuka, oho ti ka li nahe nayina. Aakuluntu yandje eputudho oye li talele nawa pethimbo lyawo. Okulongitha omukalo gwokudhenga, osho shimwe ya li ya tala tashi putudha aanona yawo, opo ya kale aantu ya putuka noye na omikalo.Sho osho wo sha li hashi ningwa kaakuluntu yalwe yopethimbo lyawo.Sho tandi tala, tate ye mwene okwa li ngaa a fa omuhahu..Ngele owa adha a geya dhiladhila kutya ngiika ota ka tala oshiti shoka sha gwana oku ku dhengitha. Kutya nduno omupini gwekuya a toola, nenge owala oshiti shoka sha dhika egumbo: iiti mbiya iishona hayi kala ya wanda mbi, ote shi ku dhengitha. Unene okwa li ha geyithwa kaantu mboka aanyenge, shimwe ashike puuwanawa we ka li e hole omuntu ta longo nondjala. Osha faathana ashike nameme, oshoka ashike shila kutya meme kali ha dhenge niiti.Meme okwa li he tu dhengitha onyemba niimwati.Shampa wa adha kutya owu na shoka wa ninga, ndele te ku ithana, ye oshimwati e shi holeka popepi mpono, ndele ote ku lofwele, te ku teyele tuu shili ombwati.

Nandi shi popye nuuntsa nonomuthindo kutya, aakuluntu yandje oya longa ndje iilonga. Moshili yo yene iilonga onde yi thindilwa, ndele tandi yi igilile, e tayi ningi oshitopolwa ndi shi hole monkalamwenyo yandje. Onda tameke nduno kutya, kehe shoka tashi ningwa kutate, ohandi shi tala nuutalambambi, oshoka onda hala oku shi tseya nawa. Ondi ilongo okuka iiti, okutunga oondunda nomaluhaka: okutunga omashisha : niikwawo ayihe ya fa mbyoka. Okuza mpoka onda ningi nduno omukomangeli gwomiti, omutungi gwoondunda, omutungi gwomashisha ,omudhiki nomukambi gwomikala dhegumbo lyatate. Olwindji tate okwa li ha ti: ‘Aupa, ka fuleni omukanka, e tamu dhike, ihe ongweye ulukila yakweni”.Sho nda kala mootate, onda kala ndu uvite nda fa nda tulwa ketuni, oshoka shaampoka tapu popiwa iilonga ongame nda li handi tumbulwa ndi ke yi kwatele komeho , oshoka okwa li kwa talika kutya ngele ongame tandi ke yi kwatela komeho, nena otayi ka longwa nuukeka nokugwanithwa po.

Nando nda lukula eputudho lyaakuluntu yandje, yo inaa kulupila pamwe, ngashi nde shi hokolola metetekelo. Kongashingeyi, aakuluntu yandje ayehe oya hula ko. Tate oye a hulu ko tango kuuyuni, a manene oondjenda dhe momumvo 1961. Pethimbo lyeso lyatate, ngame onda adhika omumati omunene lela, nda adhika nde enda uushimba nale nokuli.Konima yeso lyatate, meme otwa kala nooye omimvo 21.Meme okwa manene oondjenda dhe momumvo 1982. Meme sho a mana oondjenda, okwa thiga nda hokana nokuli, ashike tate sho a mana oondjenda , okwa thiga ndje inaandi hokana.

Kombinga yaamwameme yomumeme, otu li po ashike yatatu, mboka tu li natango momwenyo.Aana yeEkongo lyUugwanga ayehe oya hulu po. Nakusa Paulina , onda li nde mu tunda, oshoka okwa li omukulukadhi e na omadhiladhilo ge shi okutungilwa kugo. Tse mboka tu li momwenyo natango otuli yatatu: ngame Frans Aupa, Anna na Johannes Uugwanga.

LEAVE A REPLY

Please enter your comment!
Please enter your name here