Okatana mafiku otaka mono onetwork

0
27

HELVY SHAANIKA

Otuwala- Ominister yomauyele nomakwatafano Tjekero Tweya okwa udanekela ovakalimo vomoshikandjohoololo shaKatana kutya otava ka mona omakwatafano opaengodi diva.

Manga ali ta popifa oshiwana moshikandjohoololo omo pomukunda Otuwala popepi nOshakati, Tweya okwa ti oshikandjohoololo Okatana oshi li shimwe shomoitukulwa moshilongo oyo ili meemhangela depangelo opo i kwatakanifwe kumwe noitukulwa ikwao moshilongo pamakwatafano opanetwork yeengodi.

Tweya ta ti Namibia okwa ninga eedula 27 a manguluka ashike ita shi ka kufa vali epangelo eedula 27 komesho opo Oshitukulwa shaKatana naikwao oyo ili momhumbwe ya faafana eedula 27 komesho opo i mone onetwork yeengodi dopeke.
Tweya okwa li ta nyamukula kekemo laKansela woshitukulwa osho Rosalia Shilenga, oo a holola kutya oshikandjohoololo shaye osho shimwe shomoikandjohoololo mOshana oyo ya palafana eengaba nodoolopa yaShakati oyo ya talika ko onga imwe yomeedoolopa dinene moshilongo, ashike nande ongaha onetwork otai i nyangwanyangwa.
“Moshikandjohoololo omu omuna omikifi mbali. Wotete omukifi wonetwork nomutivali omukifi wokuhena oilonga mokati kovanyasha,” Shilenga osho a ti.

Ta ti dimwe eenhele mOkatana odili ashike eekilometer 10 okudja mOshakati ndee ngee uli po ito dulu oku kwatafana pangodi.
Ta ti okwa kendabala oikando ihapu oku popya noMTC, nokwa yandjele yoo ekemo laye kombelewa yagavena opo ngeno pa tulwe etenda lonetwork peefikola ngaashi pOkatana, pOupumako, pIiwiyongo nopOndjondjo ndele ina pondola sha. Omolwaasho a indile Minista Tweya opo a ye mo eenyala moshinima osho.

Tweya mokunyamukula kwaashi a pulwa ku kansela, okwa udaneka kutya Okatana otake ke mu pandula diva.
Okwa ti, okukwatakanifa oshiwana nokukondjifa oluhepo mokati kovaNamibia, oshili shimwe shomomalombwelo oo a pewa ovakwanepangelo kOmupresidente Hage Geingob eshi a ya koshipundi mo2015.

Kakele komakwatafano opaengodi, Shilenga okwa ti ngeenge tashi ya keandjaneko lomeva omomikunda, oshitukulwa shaye oshi li shimwe shomoitukulwa moshilongo omo ovakashiwana itava nyeyeta omeva shaashi konyala eepelesenda 95 domaumbo omOkatana oku na ominino domeva opaumwene.

Ta ti vali ngeenge tashi ya kehongo, odula ya dja ko oshitukulwa hanga she shi endife nawa shaashi osha pitifa eepelesenda di dule 60 moGrade 10. Ta weda po kutya ounona keefikola mOkatana ohava li omusha pofikola, koshi yopologalama yokuyandja oikulya kounona vofikola.

Ashike okwati ovanyasha vahapu moshitukulwa shaye ove li monghuo ina onghambe shaashi kave na oilonga.
Shilenga okwa ti nonande omuvalu munini wa mona oilonga mopolifi nometanga leameno, onghee ngaho natango ovanyasha vomOkatana tava twikile nokweendaenda momapandaanda vehe na oilonga.

LEAVE A REPLY

Please enter your comment!
Please enter your name here