Okunwa omakaya oshina oudjuu wa shike kolutu lomunhu?

0
82

Dr Akutu Munyika
Specialist Surgeon
Ondangwa

Ovanhu ohava nhu omakaya molwomatomelo elili nokulili. Fimbo limwe omolwa efininiko lookaume hava nhu, ile omolwa ostress nosho tuu. Oshoshili kutya okunwa omakaya okuna ngaho eliudo liwa, nomunhu otashi dulika a kale eudite a pepelelwa konima yomakaya. Otashi dulika tuhena naanaa eshiivo kutya omakaya ohaa etelele shike vali molutu loye!
Apa nena ohatu yandje ouyelele kombinga yomakaya, naashi haa etelele molutu. Ita shi ti keshe eshi tashi popiwa moshinyolwa eshi oshina kuu ya kwaao hanhu omakaya, ashike oinima eyi oya monika ili luhapu movanhu ava havanhu omakaya mounyuni.
Apa opuna omusholododo woupyakadi hau dulu oku dja mokunwa omakaya.

Oku ha mona ko nawa
Oku handuka diva
Eshikisha nomukolo
Okankela yomapunga (Lung Cancer)
Ohonde ya londa
Omaadi mahapu molutu
Omikifi domutima ngaashi edengo lomutima
Oluvala lishunga, ile lilaula komayoo
Edimba leehwiki
Omukifi wosuuka
Oulumenhu itaa u longo nawa
Omafimbo omukainhu taa hulu diva
Oupyakadi womateelelo
Ehalo loku lya tali kana
Omukolo
Enyonauko lomapunga ndele itaa fuda vali nawa
Eembakiteli komapunga
Ohonde tayi ningi omangwili
Okankela yomohonde (Leukaemia)
Ominwe ta di shungala
Oshipa tashi li tonyo (wrinkling)
Omayoo a shungala
Oku ha mona oludalo
Okankela yoposhivelo shoshi dalelo

Omakaya otaa eta oupyakadi koundjolowele womunhu. Kakuna naana omukalo uhwepo woku nwa omakaya. Omakaya kamawa ashike nandenande. Nande nee haucigarette, oku nana omakaya okombiya osha nyika yoo oshiponga nasho. Vamwe ota shi dulika tava ti ngee okwa nana kombiya, ile ocigar inashi li fa noku nana oucigarette. Osha faafana ashike.
Moucigarette omuna oinima idulife pomafele a hamano (600), nongee tayi pi ohayi lundulukile meechemicals didule pomayovi a heyali (7000). Eechemicals dihapu dili moucigarette odina oudiyo, neechemicals difike pomilongo hamano nomugoyi (69) oda monika hadi eta okankela. Eechemicals dihapu dili moucigarette ohadi hangika yoo mocigars nosho yoo momakaya okombiya. ONational Cancer Institute yaAmerica oya nongonona kutya Cigars odina oudiyo u dulife nokuli womoucigarette.
Omunhu ou hanane omakaya okombiya, oha mono eechemicals nosho yoo oudiyo muhapu udilife ou ha nane oucigarette. Eembiya domakaya (pipes) odina yoo oshiponga nokomunhu ou eli popepi, nande yee ita nhu omakaya.
MoAmerica, Efyo ola indjipala luheyali mwaava hava nhu omakaya. Omakaya oo amwe omoinima eyi hayi eta efyo hali dulu oku keelelwa.
Natu tale koitukulwa yo lutu kutya ohayi etelwa shike koku nwa omakaya:

OULUVI NOMUTWE (Brain)

Imwe yomee chemicals dili momakaya oyo Nicotine, oyo hayi lundulula omaliudo omunhu. Nicotine ohayi fiki kouluvi meendelelo. Ohayi eta omunhu a kale ena ngeno eenghono dihapu. Konima ngee ya pumo molutu, omunhu ota kwatwa keloloko lidjuu, nota kala a hala okunwa vali natango (addiction).
Omakaya ohaa etele eenhumba nosho yoo oilyo yomesho ounghundi. Ohaa etelele yoo ekanifo lo ku uda omulyo woikulya nosho yoo edimba layo. Omunhu ota kala nee ehena naanaa nokulya.
Molutu omuna ohormone yostress yedina Corticosterone, oyo hayi shunifa oilanduli yoNicotine pedu. Ngee omunhu okuna ostress ihapu, okwa pumbwa oNicotine ihapu molutu opo a ude nawa komakaya. Eshi otashi eta nee omunhu anwe omakaya luhapu.
Omunhu ngee a ikilile okunwa omakaya, ohashi kala shidjuu oku a efa shaashi olutu ohali tameke tali kwatwa koumbada nokomaliudo madjuu. Onghee omunhu oha fininikwa nee opo anwe vali.

OMAPUNGA NOMININO DOMHEPO
Ngee tonhu omakaya oto nanene mo nee oudiyo tau dipaa po omapunga oye. Konima yefimbo omapunga itaa longo vali nawa nokudinda mo oi ekelwashi. Omukolo oo hau kwafa moku yeleka omininho domhepo nao itau kwafa vali, neembakiteli ota di mono nee omhito yoku tungila momapunga. Sho osho nee uwete kutya ovanhu ava hava shili omakaya, ohava kwatwa luhapu komikifi domapunga ngaashi Pneumonia, omashikisha nomikolo.
Opuna omikithi domapunga hadi ya ngee omunhu a shili omakaya efimbo lile, ngaashi emphysema nosho yoo bronchitis. Konima yefimbo omunhu ota dulu oku kwatwa koChronic Obstructive Pulmonary disease (COPD). Omuhtu nge a nu omakaya efimbo lile ota dulu oku kwatwa yo kokankela yomapunga (lung cancer).
Ounona vovakulunhu ovo hava nu omakaya ohava kwatwa yoo komashikisha nokoAsthma, nosho yoo omikolo. Ohau kwatwa yoo keembakiteli domomatwi.

OMUTIMA NOMIFIPA DOHONDE

Omakaya oe na oshiponga komutima nosho yoo komifipa dohonde. Nge oNicotine ya yi molutu osuuka oha yi yi pombanda. Konima omuntu ota kwatwa nee keleloloko, nosho yoo kongama yoku nwa natango omakaya. ONicotine oha yi eta yoo opo omifipa di kukute osho tashi eta opo ohonde yi tondoke noudjuu momifipa, osho tashi eta ohonde ya londa. Omaadi molutu ohaa ningi mahapu oo taa fitike omifipa dohonde. Omakaya ohaa eta yoo opo ohonde i ninge omangwili.
Omangwili momifipa dohonde otaa dulu yoo oku eta ostroke nosho yoo edengo lomutima. Okankela yomohonde, oyo ha yi ifanwa leukaemia, ohayi kala yihapu movanhu ava hava nhu omakaya.
Opuna yoo omaupyakadi taa dulu ku hanga omunhu oo ha shaama naau hanu omakaya. Eshi ohasi ifanwa SECOND HAND SMOKING. Omunhu ou ha shaama nomu shili womakaya ota dulu oku kwatwa koupyakadi ngaashi stroke nosho yoo kedengo lomutima (heart attack).

OSHIPA, EEXWIKI NOIPANYALA
Oitukulwa eyi yolutu oha yi nyonauka yoo ngee omunhu ohanhu omakaya. Eechemicals dili momakaya oha di shendje oshipa. Oluvala loshipa ohali shendje, oshipa tashi li tonyo nota shi kulupa diva. Oipanyala yokeenyala noshipa shomake ohaa shungala koku kwata ouciagette efimbo lile. Omayoo omunhu hanhu omakaya ohaa shungala yoo. Eexwiki ohadi kala nee nedimba lomakaya, nande omunhu okwa nwine omakaya pa pita efimbo.
Omadidiliko aa nande kaena naana uupyakadi koundjolowele, otashi dulika ngaho ena oupyakadi kolupe lomunhu.

OKANYA NOMANDJANDJA

Omunhu ngee okwa nhu omakaya efimbo lile otashi dulika a mone oupyakadi mokanya. Eenhumba odo da kwata omayoo ohadi kwatwa keembakiteli diva ngee oto nhu omakaya. Omayoo ohaa nyonauka, notashi dulika omunhu akale nedimba lii mokanya. Osho tashi eta u kale to mono ndokotola woye womayoo luhapu.
Omakaya ohaa dulu ku eta okankela yomokanya nosho yoo momunhino.
Ovanwi vomakaya otava dulu yoo oku kwatwa keekankela dikwao ngaashi deefiyo, nosho yoo endabandaba. Haucigarette ashike ndele nomakaya okombiya otaa dulu oku eta eekankela edi.
Omakaya otaa dulu kupiyaaneka omulandu wosuuka molutu, ndele omunhu ta kwatwa komukifi wosuuka.
Omunhu ngee okuna omukifi wosuuka ndele ohanhu vali omakaya, ota dulu oku kwatwa keembakiteli didjuu, edulife omunhu ou ihaa nhu omakaya.
Omakaya ohaa shunifa pedu ehalo lokulya, noitungifi molutu itayi wana naanaa nawa.

OILYO YOLUDALO

Shaashi nee oNicotine oyo hayi hangika momakaya oha yi piyaaneke omifipa dohonde, nomifipa yoo odo hadi twala ohonde koilyo yoludalo oda kwatwa yoo.
Eshi ohashi eta nee oupyakadi ngaashi wokuha mona ounona nosho yoo oulumenhu itaa u longo nawa. Movakainhu ava havanhu omakaya omafimbo avo ohaa hulu diva oku yelekanifa naava ihaava nhu omakaya.
Omakaya ohaa dulu oku eta okankela yoposhivelo shoshidalelo.
Ovakainhu ovo havanhu omakaya, ile hava kala popepi naavo havanhu omakaya, fimbo veli meteelelo ounona vavo ohava dalwa vena oshiviha shishona, ile tava dalwa vena oilyo yolutu iheli nawa.
Apa otwa yandja ouyelele kombinga yomakaya, nonghee a kwatafana noundjolowele womunhu.
Nandi endulule ngaho natango kutya, ou ouyelele wa monika paunongononi, notau ulike ngaho kutya omakaya kamawa nande komalutu etu. Olo elineekelo letu kutya oshiwana otashi kufa mo sha moshinyolwa eshi.

LEAVE A REPLY

Please enter your comment!
Please enter your name here