Omutumwa Mufeti a xulifa

0
2355
dav

Komutoolinghundana

OKONGO – Omufita waELCIN mukulu, oo a li omutumwa kOkongo moshitukulwa shaHangwena Josia Mufeti okwa xulifa mepupi leedula 91.
Mufeti oo ali omukalimo womOkongo okwa xulifila meumbo laye momafiku 6 Apilili neudo, nokwa pakwa momaendo aKongo mOlomakaya la djako.

Omupedu Minista mOshikondo shOmakwatafano Opaiwana, Dr. Peya Mushelenga oo popifa ovalilafya, okwa dimbulukifa ongelki yaELCIN opo i ha efe etumo. Ta ti nonande omutumwa Josia Mufeti a xulifa, etumo loo nali kale nomwenyo.
Pandjokonona, nakufya Mufeti odalele yomomukunda Omundudu moshikandjohoololo Endola moshitukulwa shaHangwena, a dalwa momafiku 29 Maalisa 1926.

Ofikola okwe i hovela pOmundudu taka twikila koseminali yOvamati kOngwediva, nokwa pita ouhongifikola pOniipa, momudo 1947. Mufeti okwa hombola Rauna Muetufajo Shimueefeleni momafiku 19 a Novemba 1957. Okwa twikila nelihongo fiyo a yapulilwa oshilonga shoufita momafikui 19 Aguste 1959 pamwe novafita vakwao 11. Mokati kovayapulwa ve fimbo laye, omubisofi e li moshipundi shetulumuko Dr. Kleopas Dumeni oye aeke e li momwenyo.

Ongeleki yaELCIN oya didilika ongushu ya muMufeti, noye mu tuma keilongo koSoomi pokati ko1962-1965, va ya pamwe nomufita Abisai Shejavali. Konima okwa nangekwa onga omufita omuwiliki menongelo mEngela.

Molwomhumbwe metumo natango Mufeti okwa tumwa kOkongo a ya ponhele yomutumwa Errki Hijonena. Pamwe novaneumbo laye omufita Mufeti okwa lekelwa momafiku 15, a Deseba 1974 a ye ketumo kOkongo nokwa udifila eedi da fya enota ondaka yevaangeli.
Ovadalwa vanakufya Mufeti ova pandula epangelo eshi la valula xe onga omukondjelimanguluko, tava ti omauwa oo a pewa okwa kwafa eyakulo laye.

Omutumwa Mufeti, okwa hepekwa ponhele yeongalo, a pita moita ilula ndee ina sholola, netumo inali mwena. Mufeti okwa pita momaudjuu konima yefyo lovakwaneongalo 17 moboma pamwe nomufita waKongo Gebhard Shangheta momafiku 15 a Kotoba 1978. Omakwafo okudja kOniipa, okwa li haa pitile kOkavango. Moku kwatafana nongerki okwa li hava longifa okaZero-Zero. Fiku a wanifa eedula 50 okwe li danena mokamba yeembulu koMboloka, okwa dengwa fiyo a lemana monho. Eumbo laye ola kondekwa nokuhadwa luhapu, naashi a ponokelwa komakakunya eshi a li ta ningi oandaxa okwe va imbila eimbilo” Kalunga oy’epopilo”.

Ekakunya ole mu lombwela kutya ngee ola valula oikando fiyo ya ninga 10 ndee ina amena, otali mu yashe. Okwa twikila neilikano, eshi la umba, oholo inai kwata Mufeti, nekakunya la tameka kulila tali ti, otali di mo moita molwoshikumwifalonga sha ningilwa Mufeti.

Meumbo laye omwa tekulwa vahapu vomihoko da yooloka, pefimbo loita okwa yakula oikulo,nokonima yoita vamwe ova tulwa meumbo laye opo va ilwe mo kovapambele. Okwa longifa ovakwanghala vane va ninga ovanashilonga. Mufeti omutumwa e shi Oshilatina, Oshigreka, Oshisoomi, Oshimbulu, Oshiingilisa, Oshikwanghala nokwa fimaneka yoo omunhu keshe.
Konima yefyo lomukulukadi waye meme Rauna muDeseba 2004, ounghundi waye owa yuka komesho fiyo osheshi a mana oweenda pehovelo lohani ei.

Mufeti ovali va dalwa vatano, ashike vamwaina Ileni naJohannes ovo aveke veli momwenyo. Okwa fiya ko ovana vaheyali, ovatekulu 13 novatekululwa vatatu. Poshivilopako opa li ovahekeleki vahapu va dja keembinga neembinga doshilongo novaSoomi va dja koSuomi, ovafitaongalo, ovaleli veendodo da yooloka moshiwana neeministeli dokabinete.

LEAVE A REPLY

Please enter your comment!
Please enter your name here