Uudhano waRuacana otawu koko omvo kehe

0
38

SHIPI ELAGO

RUACANA-Uudhano wokomumvo welelo lyodoolopa yaRuacana mboka wa tseyika nawa Ruacana Easter Tournament nuumvo owa li, wa nana oosipana dhi thike po90 ndhoka dha li dha kuthombinga momaudhano ga yooloka muule wehuliloshiwike lyaPaasa.
Omupopliko guudhano mbuka Simaneka Egumbo okwa li a holola kutya oosipana dhimwe odha li dha yambuka kiitopolwa yokokule ngaashi koWalvis Bay noRundu na odha li dha eta pamwe konyala aadhani ye thike pe1200.
Ethigathano ndika li li etihamano okuza ngaa sho lya totelwe mo 2012, otali koko kehe omvula nando hali ningwa pethimbo mpoka puna iinyangadhalwa yomaudhano ogendji moodoolopa dhilwe moshilongo.

Okwa ti kakele komaudhano oosipana dha li dha kuthombinga odha li wo dha longitha ompito opo dhi talele po omahala gomapashiwaneno moRuacan ngaashi egwolyomeya nosho tuu.

Okambembe City oko ka li ka sindana po ekopi lyokatanga kokoompadhi kaayehe omanga Young Chiefs a li eya puutiyali omanga Future FC a li eetelele okano pehala etitatu.

Okatanga kokoompadhi koonelende oka li ka sindanwa po koThe Presidency, omanga Valombola VTC a li eya puutiyali, Oshana Nampol oya li ye ya pehala etitatu nolyahugunina.

Okatanga kokoompadhi kaakokele oka li ka sindanwa po kOkatana Social Club omanga United 11 a li eya pehala etiyali yo Oshakati Social Club ta yi kutha po ehala etitatu.

Walvis Bay BBC oyo enyakwa lyuudhano woBasketball omanga Ongwediva Leopards ya li ye ya puutiyali omanga Ondangwa BBC ya li ye etelele okano pehala etitatu.
Etanga lyokomake olya li lya sindanwa po kOngwediva Medipark omanga Brave Lions ye ya puutiyali ye Tropical Heat ta kutha po ehala etitatu.

Odoolopa yaRuacana oha yi tula po omutengenekofaneko kehe omumvo gwoodolaN$ 80 000 , nonuumvo oya li wo ya mono omakwashilipaleko okuziilila kehangano lyaNORED, ARTEE Engineering Consultants, Mavinga Trading naBank Windhoek.

LEAVE A REPLY

Please enter your comment!
Please enter your name here