Ya pandulwa sho ya longa nawa omapya

0
60

LOIDE JASON

OUTAPI-Omukalelipo gwehumokomeho lyaayelele, Ovatue nosho wo Ovahimba moshitopolwa shaMusati, Senia Endjala okwa ti okwa nyanyukwa molwashoka aayelele ya longa omapya gawo nawa nuumvo.
Endjala okwa hokolola kutya okupitila mombelewa yawo oyali ya kumagidha aayelele mbaka opo ya longe oshoka oyena elago ye na omapya omawanawa naambaka oya vulika ke kumagidho ndika.
Ashike Endjala okwa ti nonande aayelele mbaka oya longa nuudhiginini onkee ngaa iilya yawo tayi lika po kiimuna oshoka ka ye na oondhalate dhili nawa.

“Aantu mbaka ngashingeyi otaya nyanyudha niilonga yawo, ashike iilikolomwa yawo otayi yonwa po kiimuna oshoka kayena mpoka taya kutha iilongitho mbyoka yo ku gamena omapya gawo,” Endjala ati ngaaka.

Endjala okwa holola ishewe euvo nayi sho aniwa yamwe yomaakwashigwana inaa ya simaneka iilonga yaayelele no ha ya vulu oku thiga omiyelo dhoongumbu dhawo inaa ye dhi edhila ndele iilya yawo ta yi lika po .
Shino okwa ti otashi ya pehulilo mbala oshoka ombelewa oya mona kutya aantu mbaka otaya longo noonkondo no ya pumbwa eyambidhidho opo omapya gawo ga vule okugamenwa.

Okwa ti sho a talele po oshikandjohogololo shaElim moshitopolwa omo tuu moka omasiku ga ziko okwa li wo uuvu nawa oshoka otashi ulike kutya aayelele ayehe oyena omukomo nonando ka ye na iilongitho ayihe ya pumbiwa.
Okwa ti onkalo ndjoka otayi shunitha aayelele mboka ye na oonkondo dho ku lima monima , oshoka otaya mono oshimaliwa nuudhigu okulimitha nokupulula, ihe natango iilongomwa yawo otayi yonwa po owina.

“ Aantu mbaka oya ulika kutya oya hala oku lima ashike shoka she ya kwata iilongitho yomepya nosho wo oondhalate. Ihe shika ombelewa yetu ota yi longo nasho,” Endjala a ti ngaaka.

Ihe okwa ti ngashingeyi ombelewa oyi li nale metifa oku gongela oondando dhiipumbiwa mbyoka opo mbaka ya mone ekwatho meendelelo, omanga eteyo lyawo inaa li yiwa moshipala.

Okwa ti nuumvo omvula oya loka nawa neteyo lili nawa olya tegelelwa oku kala lya monika.
Endjala okwa dhenge omuthindo kutya nonando aayelele oha ya mono oshikukuta kepangelo okwa hala wo nayo ya kale ye na iigandhi yi na iilya ngaashi aakwashigwana yalwe.

Okwa kumagidha aayelele nosho wo omihoko ndhoka dha thigala konima yesiga ngaashi Aahimba naaTue opo ya kuthe oshiholelwa kaantu mboka ya lima nawa oshoka otashi etitha oonkondo.

LEAVE A REPLY

Please enter your comment!
Please enter your name here