Edimbuluko lemanguluko moAus

0
26

TUULIKKI ABRAHAM

Lüderitz – Ominster yOmudingonoko nOmapashiono Pohamba Shifeta okwa kumika oshiwana opo shi twikile okutumbaleka ovo vakanifila eemwenyo davo mekondjelomanguluko.
Shifeta edi okwe di tumbula fimbo a li ta popifa oshivilodimbuluko shomido 27 demanguluko laNamibia poAus moshitukulwa sha//Karas Olomakaya la djako.
Okwa dimbulukifa oshiwana mondoolopa oyo nokutya oshilongo oshamanguluka, ndele nee emanguluko eli inali uya po noupu, ola kosha ohonde ihapu, onghene ola pumbwa okuamenenwapo.
Etyapulo lemanguluko moshikandjohoololwa sha !Nami#nus ola danenwa pokadoolopa kaAus mehuliloshivike olo twa dja.
Shifeta okwa kumaida engafifi laavo vali vaongala nokutyapula efiku lemanguluko kutya, oshafimana neenghono opo omukwashiwana keshe akale euditeko emanguluko loshilongo eshi tali ti.
Minister,okwa fatulula nghene oshilongo Namibia ta shi wilikwa kekotamhango olo la yelifa omilandu adishe, da nghene ovanhu vena okukala moshilongo.
Okwa tofamo imwe ngaashi efimanekafano, okufimaneka ounhu womunhu, pahakale nande omudinwa. Okwa tumbula yoo kutya ovanhu nava longe noudiinini, opo ashike oshilongo tashi dulu okuya komesho.
“Otuna okufimaneka nokutumbaleka ovakondjelimanguluko ovo va yandyela eemwenyo davo emanguluko loshilongo, molwashoka ka pe na vali oita nomunhu keshe okwa manguluka, okuhanga osho ta lalakanene.
Oshi li oshinakuwanifwa shomudali keshe, tu tonatele noku pukulula omaludalo etu, a dule okuhanga osho taa lalakanene monghalamwenyo. Ehongo ohali hovele meumbo.” Shifeta osho a tumbula.
Okwa indile ounona veli tulemo mehongo, ta ti oshi li oshinakuwanifwa shounona va pwilikine komakumaido oo tava pewa kovadali vavo.
Shifeta okwa indila ovaleli vopamifyuululwakalo, va longe oilonga yavo noudiinini. Ta ti oovene vomikunda ovena oshinakuwanifwa shokukumaida ovadali va tonatele omaludalo avo.
Ovena yoo oshinakuwanifwa, va ningile ovanhu ovo veli momikunda davo oyoongalele, va kundafane noku va kumaida va longe noudiini unene tuu oilonga yokomake.
Kombinga yovawiliki vopamhepo, Shifeta okwe va indila va longe oilonga yavo. Ta ti ovawiliki vopamhepo vahapu otava kendabala ashike okuninga oinyengandunge.
Kombinga yelongifo nai lomalodu okwa tumbula kutya oshiwana oshina okulundulula onghalo yokunwa omalodu sha pitilila.
Ta ti okunwa omalodu nakukale kuna ongaba. Okwa dimbulukifa oshiwana kutya omunhu keshe moshilongo okuna oshinakuwanifwa meyambulepo loshilongo.

LEAVE A REPLY

Please enter your comment!
Please enter your name here