Moshitila Mwa Z’Ondjupa: Elongitho lyiikolitha

0
160

Megumbo lyaandjetu
Oshinima shimwe tandi dhimbulukwa aakuluntu yandje nohokwe nonolupandu, osho shoka kutya, oya kumagidha ndje ndi dhiginine iilonga yomepya, osho wo okutakamitha iimuna. Oshikwawo osho shoka kutya, maandjetu aanona kaya li ya pitikwa okunwa omalovu giilya, aakuluntu oyo owala ayeke. Ethimbo ndyoka opwa li owala omalovu giilya haga hangwa megumbo, kaage shi gotombo nenge galwe. Tse aanona omalovu otwa li hatu ga nu uuna pu na oshituthi, ano to pewa mo owala oshitenga shimwe wa tsa ehunda, eta taku tiwa inda.
Pethimbo lyetu, inatu pitikwa nandonando tu kuutumbile oondjupa nenge iiyuma yomalovu. Shika osho wo sha li naanona yalwe yokomagumbo pethimbo lyeputuko lyetu. Nando ongawo, ngame inandi kala ndi hole unene omalovu, onda kala ndi hole ontaku komeho gomalovu, nonando omalovu inaga ninga ndje sha.

Okuza muunona nomokuputuka kwandje inandi nwa nando omalovu gakashingolo.
Omalovu gakashingolo , onde ke ga nwa owala momumvo 1964-1965, pethimbo ndyoka ngame ndi li nale omunangeshefa nokuli.Otwa kala hatu nu oombiila nooyakwetu sho nda zi kOmbaye, oombiila dhokuAngola, ano ooCuca nooNocal.

Pethimbo ndiyaka otwa li hatu mono owala ompito okulanda omalovu taga zi kuAngola, ihe hameni lyoshilongo, ano muNamibia. Ethimbo ndiyaka aaluudhe kaya li ya pitikwa omalovu kaakolonyeki yepangelo lyOombulu, oku ga nwa nenge oku ga landitha.

Oombulu molweitaalo lyadho nomuupombanda wadho wopashitiligane, ano dha tala kutya aaluudhe oye vulike kaatiligane moondunge, odha li dha tala kutya omuluudhe shampa a pewa omalovu , nena niilonga ite yi dhimbulukwa we.
Omalovu oga ka patuluka owala komimvo dhokomeholela.Oombaatili odho adhike pamwe naatiligane, dha li dha pitikwa okulanda omalovu noku ganwa.

Omuluudhe shampa wa adhika wu na ekende lyomalovu, oho kwatwa po ashike kaapolisi.
Osha li lwokomatango gesiku limwe mondjila yokugaluka kuushimba kOshaanda, sho nda li nda ka tala iinima yositola yandje nohauto , twa li ngaa tu li naOno yaAngula, omwana gwomusitagongalo nomuuvithi gwaELCIN, omusamane Efraim lyaAngula. Aantu yaagundjuka, mondjila mono tse otatu idhenge mo nokuli muumbiila.

Sho ngaa tatu kondo Onamutuni, mondjila ndjiyaka onkulu ya pita mOkashana kiinamwenyo, onda mono owala ohauto ya ponoka ko kopate yu uka momalambo, shaashi nani onda li tandi kotha.

Okuza mpoka onda ti : “Aupa, ombiila ndjika aawe, itayi tsu kumwe niilonga mbyoka tandi longo nandenande”. Mohauto omwa li omahalasa, sho nda ka konaakona kegumbo, onda adha ga tatuka.
Okuza kesiku ndyoka tse naOno otwa tokola twaaha nwe we oombiila. Kombinga yomumati omukwetu Ono yaAngula, okwa ningi owala mpa lya tuka,opo lya nambela.Ngame okuza mpono iikolitha ayihe, onde yi thanga omuthi. Konena momalovu giilya ohandi nu mo ngaa oshitenga owala shimwe. Ngaka omagongo ihandi ga nu nandonando, nonande mootate omwa kala ngaa mu na omigongo odhindji, ohandi nu owala oshinwa.

MOngeleki Onkwakatoolika kaRoma

Ongeleki ya Kristus muuyuni oyi ithanwa yu uvithe evaangeli lyehupitho. Mekwatathano niikolitha, ongeleki moshitopolwa shika shetu oya kala omupukululi omuwanawa. Ongeleki yetu yaKatoolika nando ya keelele aanashilonga yayo yaa longithe iikolitha, shika inashi ninga ompango ya yaga kegonga. Ashike onda dhimbulula kutya Ongeleki ya-ELCIN, oyi na omukalo gwa yaga kegonga mokati kaanashilonga yayo. Shoka nda hala okukumagidhila omunashilonga kehe kutya nduno omunangeshefa, omulongi gwopambepo, omulongisikola, omupangi, omupolisi, omukwiita, ominista, omupanguli, nakehe ngoka ta yakula komeho goshigwana ina pumbwa okunwa iikolitha. Omuntu opo wu pulakenwe nawa kwaashoka to kumagidha nenge to longo, kala omugandji gwoshiholelwa oshiwanawa. Oshinima shokugandja oshiholelwa oshiwinayi peha lyoku gandja oshiholelwa oshiwanawa, ohandi shi faathanitha nomulongi ta mitike po aanoona yosikola, nando oye e yi inekelelwa oku ya longa uunongo, noku ya ulukila ondjila ndjoka tayi ya ningi aakwashigwana aawanawa.
Ngame sigo oompaka moositola dhandje ohandi landitha omalovu, molwaasho iikolitha muuyuni omo yi li, ashike itandi popile omuntu a nwe iikolitha sha pitilila.
Omuntu na nwe ngaa sha yeleka.Pethimbo ndika onda yemata koshigwana sha pikwa kelongithonayi lyiikolitha,onkene tandi indile koongeleki dhetu dhi longe nelama, ano nomukumo mokukumagidha nomokulonga oshigwana shi yande iikolitha.

LEAVE A REPLY

Please enter your comment!
Please enter your name here