Omauliko giipindi yOndangwa oga tameka

0
62

‘Omvula ndjika otwa tegelela omwaalu gwaa uliki yiipindi ogundji okuyelekanitha noomvula dha piti’

MARIA NAMUPALA

ONDANGWA – Natango lya ningi ethimbo lyomauliko giipindi mOndangwa. Omauliko ngaka haga longekidhwa kelelo lyondoolopa yaNdangwa omumvo nuumvo otaga tameke nena.

Omupopiliko gwelelo lyondoolopa ndjoka Petrina Shitalangaho sho a popi oshiwike shika okwa ti omauliko giipindi gonuumvo oya thaneka ga kale dhingi, noya tegelela aakwashigwana ya kuthombinga miipindi.
Omauliko ngaka otaga tameke nena mesiku 28Apiilili sigo omesiku 6 lyaMai nuumvo, nokwa tegelelwa ga patululwe pambelewa kuMinista goIndustrialization ,Trade and SME Development Immanuel Ngatjizeko, momasiku gaali gaMai. Esiku ndika oshigwana osha tegelelwa shi holoke momwaalu omunene.

Shika oshikando oshitiheyali (7) okuza sho elelo lyOndangwa lya tokolele oku etapo omauliko giipindi, nokugandja ompito kaanangeshefa aashona naanene ya vule okupindika noku ulika iilikolomwa niihalithomwa yawo mbyoka haya nduluka yoyene.
“Omvula ndjika otwa tegelela omwaalu gwaauliki yiipindi ogundji okuyelekanitha noomvula dha piti, molwaashoka omwaalu gwaamboka ya ninga omaindilo ogwe ende tagu koko, otwa hala opo aakwashigwana ya talele po omauliko giipindi gonuumvo ngoka twa tala taga ka kala dhingi,” Shitalangaho a ti.

Okwa ti omumvo gwa ziko oya yakulile omaindilo ogendji ashike omwaalu gwaamboka ya kuthombinga mokuulika iipindi yawo ogwa li 146 mwa kwatelwa niikondo yopapangelo, omanga 69 aanangeshefa aashona noyopokati.
Omvula ndjika omauliko giipindi otaga dhanwa kohi yoshipalanyolo “Okunkondopaleka oongeshefa dhi kale pamuthika gomangeshefelo”, okwa tegelelwa ku kale iinyangadhalwa ya yooloka nomainyanyudho kamana.

Okwa ti aa uliki yiipindi ya za komahala ga yoolokathana otaya ka kuthombinga, nokwa thanekwa ku kale omainyanyudho gethigathano lyokakadhona dhingi momauliko giipindi, osho wo omainyanyudho gaanona pethimbo yeli mefudho lyosikola.
Shitalangaho okwa pula elongelo kumwe okuza kaakalimo yomondoolopa, naayehe mboka taya talele po ondoolopa pethimbo lyomauliko giipindi ngaka, yo ya kale noku talela po iipindi noku yambidhidha aanangeshefa aashona naanene mboka taye ya okuulika iipindi yawo.
Elelo lyondoolopa olya tula po oompango nooveta osho wo oondjindikila pethimbo lyiipindi, yo taya pula ookalyamupombo yiikaleke kokule nondoolopa.

LEAVE A REPLY

Please enter your comment!
Please enter your name here