Omukiintu i ihumbata i idhipaga

0
2083

HELVY SHAANIKA

Ongwediva- Opolisi mOshana otayi konaakona oshiningwanima moka omukiitu omugundjuka ali eli metegelolo i imangeleke.
Kakukutu kOmatanga mOshitopolwa shaShana Kommissiona Rauha Amwele okwa hokolola kutya omukiintu nguka gwedhina Rachel Ndinelao Mbonge omunamivo 21, okwa adhika imangelekela moseti yomegumbo moka a li omuniilonga gwomegumbo. Nonando ina thiga po okambapila kutya omolwashike i ikuthila omwenyo, otaku hokololwa kwa dhidhilikwa kutya kakadhona nguka okwali omusimba. Ashike kaku shiwike naanaa ngele etegelelo ndyoka a li ena olyo lya eta eimangeleko.
Oshiningwanima shika osha ningilwa momukunda Onawa popepi nOngwediva megumbo lyaJason Shakalakuti ngoka anuwa oye i itsu omudhimba gomuniilonga gwe.

Esiku olyo tuu ndjoka lwopo 10h00 (10 gwongula), okwa kundanwa omulumentu gwomivo 43 a zile komukunda Oshiyenge naye anuwa iidhipaga sho i iyaha nondjembo yiilonga, omanga ali eli miilonga.

Omulumentu nguka gwedina Johannes Nembungu ali ha longele ehangano lyoFalcon Security mOshakati anuwa okwi idhipagele pOshakati Premier Electric mpoka a li a ta longele esiku ndyoka.

Nembungu anuwa okwa thigi po okambapila moka a nyola kutya omolwashike iikuthile omwenyo. Amwele kali ta vulu oku lombwela Kundana oshikalimo sho kambapila pethimbo oshifo shika shali tashi nyanyangidhwa.
Momasiku 22 gomwedhi nguka, Opolisi mOshikoto nayo oya lopotelwa oshiningwanima moka omukiintu omunamivo 25 gwedhina Yoolokeni Jason anuwa iikutha epunda lyali lina oomwedhi hetatu.

Omupopiliko gwopolishi mOshikoto Chief Inspector Edna Nawa okwa hokolola kutya omukiintu nguka anuwa okwi ikutha epunda, e ta tula okanona ke monailona noku ka ekela mongalangala ano mehala lya andjuka.

Omukiintu nguka okwa kwatwa po e ta falwa koshipangelo kOnandjokwe. Nawa ta ti opolisi otayi ningi omakonaakono taga konakona omudhimba gwokanona opo ku tali ke kutya oshike naanaa she ka dhipaga.

LEAVE A REPLY

Please enter your comment!
Please enter your name here