Oshipangelo shiimuna she eguluka mOmuthiya

0
56

MARIA NAMUPALA

OMUTHIYA – Omupevi Minista mUuministeli wUunamapya, omeya nomithitu Anna Shiweda, Olyomakaya ga zi ko okwa patulula pambelewa oshipangelo shiimuna tashi adhika mOmuthiya moshitopolwa shaShikoto.

Oshipangelo shika shiimuna otashi ithanwa Parest Farming noshi li mewiliko lya Parastus Nepolo, pamwe niilyo yewiliko.Omupevi minista moshipopiwa she okwa ti uunamapya owo oshinima sha simana moshilongo, nohawu koke eliko lyoshilongo, nokwe eta po omaipyakidhilo galwe moshigwana. Shiweda okwa ti uunamapya ohawu kwathele wo mokuhwepopeka onkalo yondjala nokukandula po oluhepo, nonkalo yokwaahena iilonga moshilongo. Okwa kumike aagundjuka ya landule uunamapya nuunafaalama, yo aaNamibia taya kala taya longo iilongomwa yawo yene, nokuyi tuma pondje yoshilongo.

“Ondu uvite etumba okupatulula oshipangelo shika shuunafaalama tashi gandja omayakulo koshigwana, onda hala wo okutseyitha mpaka kutya Parest Farming otayi kala tayi gandja omadheulo kaalongwa mboka tayi ilongele iinima ya pamba iimuna niimeno, yo ya mone ontseyo nuunongo pethimbo yeli meilongo lyawo,” Shiweda a ti.

Gumwe gomiilyo yehangano ndyoka Armas Amukoto sho a pulwa a tye sha kombinga yoshipangelo shika, okwa ti pethimbo ndika Parest okuna iitayi iyali shimwe tashi adhika pOshikuku, naashoka sha patululwa mOmuthiya. “Elalakano lyetu olyo ashike okunkondopaleka aanafaalama, nokuya longa nkene yena okukaleka po nokukwatela po uukolele wiinamwenyo yawo, otatu kala woo tatu gandja omayakulo nomayele aluhe kaanafaalama, oshoka uunafaalama owa simana moshilongo,” Amukoto a ti.

Ta gwedha po kutya oya hala okuundulila onkalo yokwaahena iilonga kokule, yo ya kwashilipaleke kutya oya hedhitha omayakulo popepi noshigwana ngaashi shi li shimwe shomoondjodhi dhepangelo unene ndjoka yo Vision2030. Parest Farming oya totwa po konima yoomwedhi mbali (2), ashike omadhiladhilo nomathaneko oga kala po nale. Moshipangelo muka otamu adhika omiti dhiimuna, iikulya yiimuna, osho wo omiti dhiiyimati nominzile otadhi ka monika meni lyethimbo efupi. Pethimbo ndika Parest okuna aaniilonga yahamano (6) mboka taya longele koshitayi kOshikuku, omanga oshitayi shomOmuthiya tamu adhika aaniilonga 4. Amukoto okwa ti oya hala opo sho omumvo tagu ka pwako oyena iitayi miitopolwa ayihe moshilongo, nelalakano lyokuhedhitha omayakulo popepi noshigwana. Amukoto okwa ti oya koneke okwaa hena ontseyo ya gwana mokati kaanafaalama, nokwa pula ayehe ya longithe omayakulo gawo, yo yiimonene uukolele wiimuna, yo tayi imonene uuyelele mboka wa pumbiwa.

LEAVE A REPLY

Please enter your comment!
Please enter your name here