Ounona nava lukwe manga inava dalwa

0
533

Ove oto ti ngahelipi
Ehokololo lali moshifo shimwainafana naKundana shoNew Era yEtitatu loshivike eshi, ola eta omananafano kepandja laNew Era koFacebook oko ovanhu tava patafana ngeenge oshi li mondjila ile osha puka ngeenge ounona tava kala tava lukwa omanga inava dalwa, hano manga ooina veli momateelelo.

Oshinyolwa osho otashi popi kombinga yaMinista wOikwaumbo Pendukeni Iivula-Ithana oo a indile opo ovadali va kale tava luku ounona vavo omanga veli momadimo ooina.

Iivula-Ithana oku udite kutya, omukalo oo ota u kwafa opo ounona ovo ve na ooxe vehe na navo va mone eembaapila doukwashiwana pefimbo, shi dulife eshi tava kaya manga komaumbo voo ooina tava ka kala tava longo noudjuu, okukonga ooxe younona vavo, ovo efimbo limwe vehe hole oku kwafa opo ounona va mone eembapila doukwashiwana.

Epopyo laminista ola ete nee eemhata mokati koshiwana omo vamwe tava ti mOshiwambo ohaku tiwa oxupa ihai mangwa manga ongombe inai dala, yo odikwa iha i tungwa omanga okaana ina ka dalwa. Vati oinima oyo iha i ningwa nande nande.
Hano vamwe ove wetu kutya kashi li pamufyuululwakalo wOshiwambo, okuluka okaana ina ka dalwa vati oto xunu. Nomolwaasho nokuli Ovawambo ohava landele ashike ounona oikutu ngeenge va dalwa. Sha hala kutya luhapu omukainhu eli meteelelo okwali ashike ha lande ounima va nini va nafangwa, nope nee oinima ikwao ohai ka landwa ashike ngeenge a pulumuna.

Ashike Ovawambo ovo tuu ovo efimbo linya ovasamane kwali hava i kodalate (contract labourers) ova li hava fiye va luka unona vavo ngee va fiya ooina veli momateelelo. Ovali hava kala va yandja omadina kutya ‘ngeenge okamati edina lako onhumba, nongeenge okakadona edina lako ongadi’.

Nopefimbo yo loita ovakondjelimanguluko vahapu ova fiile va luka ovana omanga veli momadimo ooina. Ndee ovo va lukilwa momadimo natango opo ngaho veli tava tumwa.

Ava va fya, va fya ngoo, ndee naava va lukwa konima eshi va dalwa navo ohava fi.
Ashike oshinima eshi ina shi yela mehokololo laminista osheshi kutya mbela okaana ngeenge taka pelwa odjapo yedalo moshipangelo koo ihaka pumbwa oku kalelwa po kuxe?

Nongeenge nee pamwe oka shangwa keli kedina laina oye aeke, kedina laxe ohaka ka yako mbela naini ngeenge xe okwa tokola opo okaana kaye ka longife ofani yae?

Ashike kakele nee komapulo oo inaa nyamukulwa, omaliudo a Kundana oyaa kutya shoshili oku yandjela eedjapo domadalo kouhanana omanga ina va dja mo moshipangelo pefimbo lokudalwa otashi ningifa yoo oilonga yokeembelewa doikwaumbo opo i pupale, shaashi ngeenge okaana oka pelwa odjapo yedalo moshipangelo, ovadali ita va pumbwa vali va kaye momikweyo keembelewa deedjapo domadalo konima yomafiku eshi okaana ka dalwa.

Shikwao, ovanhu vamwe ova vadja komaushai kokule neembelewa ngeenge ooina ova pulumuna noku yuka mo momikunda davo omo, ohashi ka kala shidjuu vadje ko vali vaye keedoolopa vaka kongele ounona eedjapo domadalo.
Osho to hange nokuli okaana keli ngeno mongudu yaavo hava shangwa oku pewa oimaliwa kepangelo, ndele ita ke i mono shaashi ina opo manga taka tyatyaana naxe opo vaka kongele okaana odjapo yedalo.
Shi dulife eshi ngeno ohanana tai di moshipangelo nodjapo yayo ndele oshinima tashi pupo.
Ashike eshi kashi fi oshilonga shaKundana oku udifa ko omuleshi kutya eshi sha popiwa kuMinista Iivula-Ithana oshi li mondjila ile osha puka pamwe natu ude omadilaadilo oye kutya ove onga omuleshi oto ti ngahelipi?

LEAVE A REPLY

Please enter your comment!
Please enter your name here