Taya pula etale lyawo li lafululwe

0
52

‘Ondama ndjika oyo yimwe yali hayi kala nomeya uule wethimbo, niimuna nosho wo aantu omo ya kala nokunwa ethimbo lyokwenye.’

MARIA NAMUPALA

UUKETE – Aakalimo yomomikunda dha yooloka mboka yeli pooha netale lyaAmanenge tali adhika pokati komikunda Uukete nosho wo Oniiwe B, otaya pula epangelo li ya yambidhidhe opo ya vule okulafulula etale ndyoka.

Oya holola kutya etale ndyoka monale olya kala hali pungulwa omeya ethimbo lyomvula, noga kala haga longithwa kaantu nokiimuna uuna omvula ya sheka, taya popi kutya ihali kala we nomeya molwaashoka olya filala noonkondo omolwomunoko ngoka gwa ninga ogundji.
Gumwe gomaakwashigwana yaahoka okwa ti iimuna yawo ngaashingeyi oyili muudhigu, omolwondama yawo ndjoka ihaayi kala we nomeya. “Ondama ndjika oyo yimwe yali hayi kala nomeya uule wethimbo, niimuna nosho wo aantu omo wo ya kala nokunwa ethimbo lyokwenye. Ngaashingeyi etale ndika ihali kala we nomeya, ohali pwinine ashike momwedhi Apiilili niimuna kayi na we mpa tayi nu. Shika ohashi thiminike aantu yahugile iimuna miikweyo, nosho wo moopomba nopethimbo lyomvula,” Taya popi ndhoka. Salomo Namupala ngoka eli kapatashu goshikandjo Oniiwe yaNdapanda moka tamu adhika etale ndyoka, okwa hokolola kutya okwa ningile oonkambadhala, ashike adhihe inadhi eta po sha. Tati shika oshi li omukundu omunene maakwashigwana yaa hoka. Aakwashigwana oya holola ndhika taya ti halyo alike etale lya pumbwa okulafululwa , oge li mo ogendji ta ga kwathele iimuna naakwashigwana ya kale ya pungulamo omeya gawo pethimbo lyokwenye.

Etale ndyoka okwa konekwa lya kala hali kwathele omikunda ntano (5) lwaampoka, dho dhimwe dhomomikunda ndhoka ongaashi Onaayamba, Ekuma, Oniiwe B, Onamutenya osho wo Uukete wowene.
“Otatu indile opo epangelo li uve okulila kwetu, na ye ye yetu watele opo ya lafulule omatale ngaka niimuna otayi vulu okunwa mo sigo omuDesemba shoka tashi ningi oshipu opo aantu ya longithe omeya gopomba ngoka moshilongo geli mo ga shonopala okunwetha iimuna, goga vule ashike okulongithwa kaantu. Epangelo nali watele oshigwana, naakale woo haapwilikine aakwashigwana, ndele haku ninga ashike iigongi ethimbo lyomahogololo,” Aakwashigwana taya ti ngaaka.
Otwa ningi omakwatathano na kansela goshikandjohogololo Eenhana Udeiko Haufiku, nokwa ti otaya yi mookundathana nelelo lyoshitopolwa shawo, yo ya tale kutya aakwashigwana taye ya kwathele ngiini monkugo ndjoka. Haufiku ta ti otaya kala ya mona omambakumbaku yo ya lafulule oondama ndhoka ta dhaadhika momikunda, noku pungula omeya pethimbo lyomvula.

LEAVE A REPLY

Please enter your comment!
Please enter your name here