Ya hala oshigunda shamuni shi pate

0
112

‘Muni ngele owa adha ta hingi oongombe nenge iimuna mbyoka oha kala ashike ta ungaunga na ngweye ta ti kutya inda kombelewa opo wu ke yi futilemo ita hala eyi ethe ngele owe mwa adha nayo’

LOIDE JASON

OMUNDJALALA-Aanamukunda yomomukunda Omundjalala mOutapi oya ti oya hala elelo lyondoolopa yaOutapi yi hulithe po oku edhilila iimuna ya wo moshigunda shamuni oshoka aniwa ka shi li mondjila.

Aanamukunda mbaka oyali ya gandja omanyenyeto gawo oshiwike shika kuKundana shoka ngashingeyi taya ti kutya oha mu kala ashike mwa edhililwa iimuna yimwe omanga yimwe hayi kala tayi napa mondoolopa.

Oyendji mboka ya popi na Kundana oya ti kutya iimuna inayi pumbwa oku kala tayi edhililwa omutenya moshigunda shaMuni ihe andola shika na shi ningwe ngele okwa toka uuna ooyene ya ndopa okuyi kongolola. Gumwe gwomwaamboka ya popi na Kundana omwene gwomukunda gwedhina Omundjalala tatekulu Antonius Shaumbwako ngoka a ti ye naanamukunda ye oya kala noku ithana elelo lyondoolopa yOutapi opo ye ye ya kundathane kombinga ye edhililo lyiimuna ihe elelelo olya tindi thiluthilu. “Oshinima tashi uvitha nayi ooshika kutya oongombe ndhika ohadhi edhililwa nomutenya omanga omutenya dha pumbwa oku kala tadhi napa omanga uunona mboka hawu edhilile wu li kosikola,” Shaumbwako ati ngaaka.

Shaumbwako okwa tsikile ko ta ti iimuna oyindji mbyoka hayi kala ya edhililwa moshigunda moka oombyoka yaakulupe mboka itaa ya vulu okulitha oshoka oyeli momagumbo oyo ayeke omanga aanona yeli koosikola.

“Ihe nande muni owa adha ta hingi oongombe nenge iimuna mbyoka oha kala ashike ta ungaunga na ngweye ta ti kutya inda kombelewa opo wu ke yi futilemo ita hala eyi ethe ngele owe mwa adha nayo. Shoka shi li sha puka noonkondo adhihe,” mwene gwomukunda ati ngaaka.
Shaumbwako okwa ti yo ongaanamukunda kayena ompinge nehumokomeho ihe yo oya hala ashike ehumokomeho li ende pauyuuki nelongelokumwe ngaashi shina oku kala.
Okwa hokololwa kutya moshigunda moka iimuna ohayi kala ashike ya sa enota nondjala oshoka iikulya ohayi ka etwa konima yomasiku gontumba, shoka ewete kutya edhipago lyiimuna yoonaku yilikola.

“Ngame nangame ondali nda adha oshikombo shandje sha edhililwa ngame otandi ti nandi shi pewe ondali nda lombwelwa ndi galuke esiku lya landula . Ihe sho nda galuka onda adha sha sa,” mwene gwomukunda a ti ngaaka.
Okwa hokolola kutya konima sho oshikombo she shasi moshigunda moka nena okwa lombwelwa opo a ka ninge egano kopolisi ndyoka tali ulike kutya oshikombo oshe na oshili okwe shi adha sha sa.
Ihe okwa ti ndhoka inadhi pondola sha oshoka muni kena sho a ninga po sho oshimuna she sha sila momake ge.
Okwa popi kutya ondoolopa yOutapi oyi li pehala mpoka pwali omapya niimuna oyindji opo ya valelwa mpoka , onkee oshidhigu okuyi keelela okuya ko hoka.
Sho Kundana a ningi omakwatathano nomukuluntu pitithi gwelelo lyandoolopa yOutapi Ananias Nashilongo okwa ti elelo lyondoolopa ota li longo lya landula omautho noompango nomalandulathano ngoka ga tulwa po kaatokoli naatulipo yooveta dhoshilongo.
Okwa ti ombelewa ye oya mona omanyenyeto ogendji unene oku ziilila kaanangeshefa taya nyenyeta iinima yawo tayi yonagulwa po kiimuna mbyoka.
“ Ngame ondi li po woo tandi lundilwa kutya elelo lyandje ka lili nawa oshoka aniwa otali etha iinima yaantu tayi yonagulwa po kiimuna,” Nashilongo ati ngaaka.
Okwa ti kutya ye ita itaale kutya elelo olya tinda oku kundathana naanamukunda oshoka nayo otaye shi panda ngele aanamukunda oya hala okupopya nayo.
Ihe okwa zimina kutya iimuna mbyoka oyi na uupu okusila mo kondjala oshoka oya edhililwa yili mondoolopa kashili paveta.

LEAVE A REPLY

Please enter your comment!
Please enter your name here