Ya Nangoloh ina hala Moussongela iifutile mo

0
498

MARIA NAMUPALA

ONDANGWA – Omukuluntuwiliki gwehangano lyoNamRights Phil Ya Nangoloh, oshiwike shayi okwa hokolola mompangu yamangestrata gwaNdangwa kutya omatamaneko niipotha tayi ningilwa omusita Pedro Marcellino Moussongela iinene, onkene ohofa inayi pumbwa oku mu pa ompito iifutilemo mokakuma.

Ya Nangoloh okwa popi ndhika pethimbo ali ta gandja uumbangi miikoya tayi tamanekelwa Moussongela mwa katelwa omalanditho gaantu, ekwato po mbambyona, ekutho lyomapunda shaahali paveta nayi kwao oyindji. Ya Nangolo okwa li a thikama mompangu a gama kombinga yepangelo ndjoka olyo lyi li omutamaneki gwaMoussongela.
Moussongela ngoka eli omusita gongeleka nokuli wo mwene weesikola dhedhina Mennonite anuwa okwa kala ha kutha aanona aaNamibia mwa kwatelwa waye mwene noku ke u landitha po kondje yiilongo, hoka hau ka tulwa mongeshefa yiihulo. Otaku hokololwa wo a vala nokamwanakadhona.

Ya Nangolo uumbangi mboka a gandja okwa holola kutya ye pamwe nehangano lye oya ninga omakonakono nomapekapeko ogendji kombinga yaMoussongela, nuumbangi mboka a gandja owi ikwatelela koompango, ooveta nekotampango lyoshilongo.

Ya Nangoloh ta gwedha po kutya omusita ngoka ta tamanekelwa iipotha ya yooloka Pedro Marcelino Moussongela, ina pumbwa a pewe ompito yeifutilemo mondholongo molwaashoka, iipotha mbyoka a taalela oyo iinene. Ta ti ngaashi elanditho lyaantu osho shimwe shomiipotha yi nyanyaleka muuyuni, nolundji ngele nakutamanekwa osho ta tamanekelwa iha pewa ompito yokwiifutila, oshoka okwa talika ko oye omutondi gwaantu, molwaashoka ota landithapo aantu, nokuya fala komahala ngoka gaa shiwike.

Ta tsikileko kutya Moussongela okwa mangwa po muJuni omumvo gwa zi ko, konima sho ombelewa ye ya lopotelwa oshinima shika ku gumwe gomiihakanwa, noya notheleko opolisi ndjoka ya landula omufekelwa noku mu tula miipandeko nziya.
Otaku hokololwa kutya osikola yo Mennonite Brethren Community Private School tayi adhika mOmafo moshitopolwa shaHangwena natango oyili miilonga, ashike Ya Nangoloh okwa ti opo eete po osikola ndjoka okwe yi tota po shaali paveta nokomikalo inaadhi ukilako, nelalakano lyokumona ooshali okuza kepangelo.

Uumbangi mboka wali tawu gandja ku Ya Nangoloh esiku ndyoka inau pwa, onkene egandjo lyawo nepwilikino lyobooloha olyu undulilwa komasiku 22-26 May nuumvo, opo epwiikino lyobooloha li ka manithwe.Moussongela ota kala mondjedhililo sigo esiku ndyoka ta ka holoka ishewe mohofa.

LEAVE A REPLY

Please enter your comment!
Please enter your name here